ดอ โฆว 45
45
ลอง อาโยว แตห อีกัด อัน นับ อัน มูห อาเซ
1อายูดา แฮะ ฮอต กาลาง โฆรห ตี, อาโยว อาว ฮู คัม ดี กอย ดี อาต แดเจณ อัน. อัน ดัด ต็อห, “แตห ดอน อี เลห โดง กอย โอว.” ปาย ตี อาว มึห อาเซ กอย ยึร ดอ กาลาง อาโยว ดี อีกัด อัน อาเซ อัน มูห. 2อัน ยี ยาม ตาง, แตห เฆ แดเจณ อาโมยว แอฆึบ ปึอน ดี โทม. ปัน ตี เฆ วี กาลาง แตห คูนดีคัม กอ นับ ลอง อัน ตี.
3อาโยว ตึอน ยี ต็อห ดี อีกัด เฆ วา อัน, “โอว มูห อาโยว. เหมา ฆูณ โอว? อัน แฮะ คัะ ฆยามซา?” เฆ อีกัด ยี ตู แป ดี เวียะ โฆรห อัน. เฆ อาม กาเซา.
4อัน ยี ต็อห, “แตห เบ ตัห กาตัด, ยอด โอว.” เฆ แฮะ ฮอต ตัห กาตัด, อัน วี ต็อห, “โอว มูห อาโยว. โอว มูห วา เบ อี ปี ดึอม ย็อง เบ แตห อัน ฮาว ฌัม มืง แอฆึบ. 5ดอ ตี นี แกวะ แตห เบ โยว. แกวะ แตห เบ ต็อห, อึณ มูห หมาบ เบ. มาแล อึณ มูห เฌาพรา อี ตึย โอว แยต ดี อาต เบ, แตห เอ บอกาเฆลียด มึห อาซาก. 6ดอ ตี นี, อาคราว เอต โบม แฮะ โนะ อา ซีนัม. อึณ ซี กอย ปอ พัน ซีนัม. ดอ อัน ตี อึณ ตู ลัต มาเซ แคง โดง นา. 7โคว อัน ตี เฌาพรา แฮะ ตึย โอว แยต ดี อาต เบ, แตห อัน คยอด เบ, แตห อึณ หมึอม อาม กาเซา, แกวะ แตห เบ ยัม ปี เฆ ดูอี กืน.
8ปาย ตี อึณ ตู มูห เบ อี แฮะ ตึย โอว ฌัม ดี นี. อึณ มูห เฌาพรา. อัน แฮะ โบง แตห โอว แบน ปี ฆูณ คูนดีคัม, แตห โอว แบน ดา กาณา อี อึบ บอ อึณโฮม อัน บอ มืง แอฆึบ บอ มืง. 9ดอ ตี นี, แตห เบ ฮาว เวณ แฮ แฮ, ฮาว ฌัม โดง กอย ฆูณ โอว. แตห เบ วี กาลาง ดี อัน, ‘ฆอน แม อี มูห อาโยว, อัน ต็อห, เฌาพรา แฮะ โบง แตห โอว แบน ดา กาณา อี อึบ มืง แอฆึบ บอ มืง. แตห แม ตัห โดง กอย อัน อู เฌณ. 10โอว ดี แตห แม กอย โดง จืร โฆวเซน, แตห แม กอย กาตัด โอว. บอ แม บอ หลูกหลาน แม บอ มาบู เฆ มาแป บอ โตต โตต อี มูห โกรวกราม แม, แตห แม ดึห ตัห โตต ดอน โมยว. 11โอว ดี เฮียง แม โฮม แคง มืง ตี. อาคราว เอต โบม อึณ ซี กอย ปอ พัน ซีนัม. บอ แม บอ อึณโฮม แม, เฆ อี โดบ แม, โอว ตู แตห เบ ฌูด ลูด มาเซ.’”
12อัน วี ต็อห ดี เฆ, “แฮะ มูห, บอ เบ บอ อาเบนยาม ตี, แตห เบ ยอด ซีคยา, อึณ มูห โอว, อาโยว อี กาลาง โฆรห ดี เบ. 13แตห เบ ฮาว กาลาง โตต ดี ฆูณ โอว ลอง แฮะ แบน โอว ดา ตาง แคง มืง แอฆึบ. แตห เบ กาลาง โตต แปะ แฮะ ยึร เบ ดี นี. แตห เบ ยี ฮาว แฮ แฮ, ตัห ตึย ฆูณ โอว ฌัม ดี นี.”
14อัน แฮะ ฮอต กาลาง ปาย ตี อัน วี เงียม วา อัน อี มูห อาเบนยาม, บอ ยาม. บอ อาเบนยาม ตึอน แฮะ ยาม. 15ปัน ตี อัน วี อูห อีกัด อัน ดอน อี, บอ เงียม เฆ บอ ยาม. แฮะ ฮอต โบง ปาย ตี เฆ อีกัด อัน แฮะ วี ยัะ กาลาง โฆรห ดี อัน.
16ปัน ตี วี มึห อี กาลาง ดี คูนดีคัม. เฆ ต็อห, “เฆ อูกัด อูวา อาโยว ตึอน แฮะ ตัห.” บอ คูนดีคัม บอ เฆ อามู อามาด อัน แฮะ ดาคึย. 17คูนดีคัม วี กาลาง ดี อาโยว ตึอน, แตห อัน วี กาลาง ดี อีกัด อัน ปี ดี โลว โบง เฆ. แตห เฆ ดาง ปี ดี โฮม แดง กาตูะ มาโลว เฆ, วีว มืง กานัณ ตึอน อู เฌณ. 18แตห เฆ วี แดะ บอ ฆูณ เฆ บอ อึณโฮม เฆ, วี ตัห ฌัม ดี นี. อัน ต็อห ดี ดัว เฆ กอย แคง โดง หมึอม หลึอม ดอน โปละ แคง มืง บอ มืง. แตห เฆ ปึอน ดี โฮม แคะ เลห แคง โดง นา เฆ.
19คูนดีคัม วี ต็อห, “แม วี โลว ต็อห ดี อีกัด แม, ‘แตห เบ ดึห ลักเลา แคง มืง แอฆึบ, ฮาว มืง เบ. แตห ฆูณ เบ บอ อีบึณ เฆ ฆอน เบ ป็อะ ลักเลา ตี, ตัห ฌัม ดี ตี. 20แกวะ แตห น็อห เบ แหม ลอง โกรวกราม เบ. แคะ มึห โกรว อี หมึอม แคง มืง แอฆึบ, อึณ ดี แบน โกรว เบ.’”
21วาย อัน ตี ฆอน อาโกบ ตึอน, เฆ วี โบง ปี จัร อาโยว เฆ โบง. อาโยว ดัว เฆ ป็อะ ลักเลา, แตห อึณ ปี ปี จัร คูนดีคัม. อัน บอ ดัว บอ ปี ดี โฮม อาดา อาคราว ดอ ฮาว เฆ โดบ อึณเตณ. 22อัน บอ ดัว ครึง กามาย ดี เฆ. ดี อาเบนยาม ตึอน อัน ยี ดัว รึอน โอย มาย็อห โบ็ง. อัน บอ ดัว ครึง ดี ชึบ แบน ฌึม แบน ฌึม. 23อัน บอ ตึย โกรวกราม ดี ฆูณ อัน. อึณ มูห มาโลว ฆึร โดว. เฆ ดาง โกรว หมึอม กาเซา อี เลห แคง มืง แอฆึบ. อัน บอ ตึย มาโลว อาหยาง ฆึร โดว อี ดาง โหงว บอ คามูน บอ ปี ดี โฮม อาดา ฆูณ อัน ดอ ฮาว อัน โดบ อึณเตณ. 24ปัน ตี อัน บอ ตึย อีกัด อัน ฮาว. อัน ต็อห, “แกวะ ลาย กาเอห กาแทณ ดอ ฮาว เบ โดบ อึณเตณ.”
25ปัน ตี เฆ วี เลห มืง แอฆึบ, ฮาว โดง กอย ฆูณ เฆ, อี จืร อาโกบ ตึอน, อี กอย แคง มืง กานัณ. 26เฆ แฮะ ฮอต ฌัม, เฆ วี ต็อห, “อาโยว ตึอน ซี กอย. อัน แฮะ แบน ดา กาณา อี อึบ มืง แอฆึบ.” ดอ อัน ตี น็อห อัน กอ ฆว็อง, อาว ปึอน หณึม โฆรห เฆ. 27เฆ ยี กาลาง โตต อี มึห แคง มืง แอฆึบ. อัน บอ ยึร ลักเลา ปี ป็อะ ตัห เฆ มืง แอฆึบ, ปี ตึย อาโยว ตึอน แตห อัน ป็อะ. ดอ อัน ตี น็อห อัน บอ วี ดาคึย. 28ปัน ตี อัน ต็อห, “แฮะ มูห ฆอน โอว, อาโยว ตึอน ซี อีม. โอว ดี ฮาว ยอด อัน อู เฌณ อาต ยัม โอว.”
अहिले सेलेक्ट गरिएको:
ดอ โฆว 45: pce
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2021, Wycliffe Bible Translator, Inc. All rights reserved.