Luka 4
4
Ogomo bere oburu wa kedeya Yeso
1Yeso ka deye aka suri obeno Urdung obere Ashili wa panza kai, obere Ashili me na wa tare ka kai, a wa ale ka kai o wake. 2A saname na ogomo obere oburu wa kedeya kai a nyimi tomore tuuru naaze aka ta ka lya eyapa ne, o maare tomore teme na ekomo moke kai.
3Na ogomo obere oburu bekaa kai na, “Boa baaya dongdong Kena ka Ashili, kuriyǝ lecale leena kale itǝ oborode.” 4Na Yeso bekaana, “A wela nyimi angmǝ Ashili na ‘Epaolya ta montaza oromo belle ne.’ ”
5Malo nyimi na ogomo obere oburu wa ana kai na wa ale ka kai azaa kazalo ka yende, na wa wore kai togomo teeka te zene a walau ba nyimi lerambo le ogomo shili. 6Nawa bekaa kai na, “Eyang nyau pate legoone aza togomo ka epa emea eya nyimi te, obekaana pate te teya taara tong, ma era ang nya komana ondooka ma yeme. 7Aza nyimi, ba girwǝ o tareng teyo itǝ tateo apat.”
8Na Yeso bekaana wai na, “Angmǝ Ashili a bekaana, ‘Ateokora Ashili aya bare a girwǝ a tare ai a kang eza ai ogole. Aya ayo girwǝ a eze ai ogole belle.’ ”
9Na ogomo obere oburu wa ale ka Yeso a Urushalima na wa zale ka kai ara o kala be zaati ba akwilǝ a Ashili. Awa bekaana, “Bo Kena ka Ashili a baaza canko ara kaana ko taru a deze. 10Aza o bena angmǝ Ashili bekaana, ‘A yo ote atoma Ashili o zaa shili kane wobo ane tare ka bo. 11Neyo wobo ka taara tene nangka oto jukǝ obona o oo cale ne.’ ”
12Na Yeso bekaana, “A wela angmǝ Ashili kanza na ‘Tana o kedeya Ashili Ateokora o ne.’ ”
13Nangka ogomo obere oburu wa mare okedeya Yeso ba kuruwǝ, na wa baya kai a were me suri.
A nyane Yeso a Nazarat
14Yeso ka kuri ba makeke ma Galili akaa pena ka legoone le obere orere, na oroka azaa kai wa ale kuruwame a makeke mame. 15Aka baale ne a nyimi madandaro ma o gwarzanang ma mane, na komana sabe kai.
16Nangka ka ale a apeng Nazarat araaka ka gong ne, na ka lyǝ ba nyimi o dandaro gwarzanang maYahuda a lengme lo teeseke one, nangka ka mena ezaza me. Naka ere a itǝ kaka baale angmǝ Ashili.
17Na nya kai angmǝ Ashili aka Ishaya ondo o beya angmǝ ka mawo ma Ashili wa be, naka dingi araaka a bekaana, 18“Obere Ateokora waya mi. Wa zakang kang beye ngmǝ a lebo ana o dera ocǝ. Wa tongang kang ale kang baale andaaka a tesa ne na a yo dinggǝ ne. Arǝ kanza a yo pari ne a yizi. Andaaka a noke ne ane cǝ o era. 19Kanza ang baale komana me o bekaana a were ka Ashili a yo wore yeme o ai o boza aromo wa dukǝ.”
20Malo nyimi naka gbwindari angmǝ me, aaka nya ondo eza ogole o dandaro o gwarzanang maYahuda e wela me, aka ale naka cikǝ. Na komana a nyimi arakaname kare kai yizi. 21Ka bore bekaana, “Angmǝ Ashili ana ka e kona a nannameena a pena o ngmeengme na.”
22Pate aromo kane zene arame ne kone oleba kai. A epame kang tera ne okpwe ka ngmǝ ka a susi ongmǝ kai. Ane bore opirǝ na, “Kakama a waani e paana ye nanna kena ka Yusupu tazana ne?”
23Na Yeso bekaane na, “Eng rose o bena eyo bekang angmǝ a gerpo na, ‘Ondo nyaza makang, womza okpwe o, o bekaana, eza epa eka te kona a ba eza a Kaparnahum apeng au Nazarat.’ ”
24Na kakang bekaana, “Eyang belo ying e peng eme, a ta kabare ka ondo o beya angmǝ ka mawo ma Ashil a apeng wai ne. 25Ang wale bele oying ne, a were a Ileya ondo o beya angmǝ ka mawo ma Ashili, a gwari andaye ne zene ane kang ya a nyimi o dera ne gong a nyimi Isrela. A were ame na eze mawo shenai se taaro ka mareka o taashe, ne komo gǝǝzǝ aromo a kuruwǝ a nyimi makeke mame. 26Pate ka nyimi, a ta atong Ileya a ondo one ne, atong wai ara ogeng ogwǝri ondaye apeng Zaripat a nyimi makeke Sidon. 27Agangca gong a cak a nyimi a Isrela a were a Elisha ondo o beya angmǝ ka mawo ma Ashili, a ta a womza ondo one ne, soona Naaman oromo makeke ma Suriya.”
28Pate aromo ka neye o dandaro gwarzanang maYahuda, malo kona epa eka ka beke, nane kone o kara. 29Ane ere nane sǝǝrǝ Yeso ba nyimi apeng ane, nane ale ka kai e daki oyara oka a soo apeng me ne, adorana ne turki kai a saname kaka rizi a deze ka ka gbwi. 30Pate ka nyimi naka kale a tera one, aka ale o ale okai.
Yeso ka sǝǝrǝ obere oburu ba nyimi ondo
31Na Yeso ale a Kaparnahum apeng yende a nyimi makeke ma Galili, ara namea ka lyǝzǝ o dandaro o gwarnazang maYahuda, aka baale ne koonang lengme lo teseke. 32Na o baala kai wa tere ne okpwe aza obena angmǝ okai aya susǝ ka legoone.
33A nyimi dandaro gwarzanang maYahuda mame, ondo zene waye ka obere oburu. Na oromo me rurayi a jǝng a Yeso a wa bekaana, 34“Haing. Eya manyimau ka ro, Yeso karomo ka Nazarat? Ba deya ka o wonge ro na? Ang rose obena boa mana, boa ondo surǝ Ashili.”
35Na Yeso zurki obere oburu me jǝng aka bekaana, “Kome a set, o surea nyimi lepung le oromo na.” Na obere o buru me tare oromo me a deze aza yizi komana. Nawa suri a wa baya wai zora o jukǝ wai kanza.
36Pate aromo ka neya rame nane moke ma ngmǝ mane, ane bekaa tokpwe tone naa, “Embele ya karomo kana kaa ya? Ka zurki aka beke obere oburu na suri oromo me, na wa suri.” 37Epa eka Yeso kaye na oroka wa ale kuruwǝ a pate makeke mame.
Yeso ka womza aromo a cake
38Malo oka Yeso ka suri ba nyimi o dandaro gwarzanang maYahuda a lengme leng name naka ale ba akwilǝ a Siman. Naka mana ondawa Siman me aka waya kono ka o pimǝ, nane bose Yeso adorana ka womza kai. 39Na Yeso me zungdǝ kai aka zurki o pimǝ me na o pimǝ me wa pere kai. Ko ya nyimi, naka ere ba saseya aka sele ne epaolya.
40Nangka ulyǝlu ye, pate andaaka neye ka ana o kombela kono a kapeng kame nane deese kaa ne a ka eese taara aza one ane cǝsǝ lewoma. 41Ana ondo one neya ka mabere ma buru na ma susi aza legoone le ngmǝ akai, ane gware koko ane beyaana, “Boa Kena ka Ashili.” Aza o bena ne rose o bekaana kaya Yeso, na Yeso zoole ane, aka nare ne o beya ngmǝ.
42Nangka ara a sane, na Yeso baya apeng me a ka ale araaka aromo ta zene ne. Na aromo dato gere kai kurǝwǝ, nangka ne cǝ kai nane bose kai na tana ka arnang ka ne ne. 43Na Yeso me bekaa ne na, “Ashili a tongang kang dongdong ale kale toma le lebo le togomo te ai a topepeng toyende kanza.” 44Na Yeso lya izi ko kaale aka baale aromo a nyimi madandaro ma gwarnang maYahuda a pate makeke ma Yahudiya.
अहिले सेलेक्ट गरिएको:
Luka 4: XSN
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©️2022 Luke Initiative for Scripture Translation
