Yohani 5

O Piadah to Adadaay i Lawac no Pitcata a Fanaw

1Nanoya, ira ko lisin no Yutaya a tamdaw. Saka, macokacok ci Yis a tayra i Yirusalim. 2Ira i Yirusalim ko Pitcata hananay no Hipray a sowal a fanaw. I ngata no Siri hananay a 'adawang konini. Ira i taliyok noya fanaw ko lima a pangpangan.#5.2 Ira i Yirusalim ko Pitcata hananay no Hipray a sowal a fanaw. I ngata no Siri hananay a 'adawang konini. Ira i taliyok noya fanaw ko lima a pangpang -- ano ^ca i, Ira i Yirusalim ko Pitcata hananay no Hipray a kaitiraan. I ngata no Siri hananay a fanaw. Ira i taliyok nonini a kaitiraan ko lima a pangpang. 3Ira itira a mafoti' ko 'alomanay a adadaay, o mapohaway, o mapi'iway ato ma'piay a tamdaw.#5.3 Ira ko katlangay a cudad matongal i 4 a tosir Mitala cangra to nika cowaco' no nanom. Nawhani sacnacna' sa ko ccay a coyoh no Tapang a ma^pod i fanaw a micowaco' to nanom. Yo macowaco' ko nanom, ano malasa'ayaw a mikfoh i fanaw i, maadah ko masamaamaanay a adada. 5Ira itira ko ccay a adadaay a tamdaw, toloto a polo' ira ko falo no mihcaan ko nika adada ningra. 6Ma'araw ni Yis ko nika foti' ningra itira. Mafana' ci Yis to nika halafinto no adada ningra saka, <<Mangalay kiso a maadah haw?>> han Ningra a milicay.

7Paca'of sa koya adadaay, <<Singsiaw, ano macowaco' ko nanom i, awaay ko mamipakfoh i takowanan i fanaw. Yo tayrayraho kako i, maki'ayawto no tao kako a mikfoh,>> han ningra.

8Pasowal sa ci Yis i cingraan, <<Kalomowad. Alaento ko kafoti'an iso a romakat,>> han Ningra. 9Itiya i, tangsol sa a maadah koya tamdaw. Ala hanto ningra ko kafoti'an ningra a romakat.

O Pasla'an a Romi'ad itiya. 10Orasaka, pasowal sa ko kakrikridan no Yutaya a tamdaw toya maadahay a tamdaw, <<O Pasla'an a Romi'ad anini. Caay ka nga'ay a mitatoy to kafoti'an,>> han nangra.

11Paca'of sa koya tamdaw, <<Oya miadahay i takowanan ko Alaen ko kafoti'an iso a romakat sanay,>> han ningra.

12<<Cima kora Alaen ko kafoti'an iso a romakat sanay i tisowanan?>> han nangra a milicay.

13Nikawrira, caay ka fana' koya maadahay a tamdaw to nika cima koya miadahay cingraan. Nawhani miliyasto ci Yis to nika 'aloman no tamdaw itira.

14Nanoya, ma'araw ni Yis cingra i Fangcalay Pita'ongan. <<Maadahto kiso. Akato piliyaw a ciraraw. Ano miliyaw kiso a ciraraw i, ira ko ikakaay nonini a 'ilo iso,>> han ni Yis.

15Tayra sato koya tamdaw i kakrikridan no Yutaya a tamdaw a somowal, <<Ci Yis ko miadahay i takowanan,>> han ningra. 16Onini ko saka kari'angen no Yutaya a tamdaw ci Yis. Nawhani i Pasla'an a Romi'ad ci Yis a midmak tonini. 17Paca'of sa ci Yis i cangraan, <<Awaay ko sla' no tayal no Wama Ako. Saka, halo Ako a matayal,>> han Ningra.

18Saka, mangalef a mangalef ko sapipatayaw ci Yisan a faloco' no kakrikridan no Yutaya a tamdaw. Nawhani caay ka deng o piliyang ni Yis to rikec no Pasla'an a Romi'ad. <<O Kawas ko Wama Ako,>> saan Cingra a mipalcad to Kawas to tireng Ningra.

O Sakowan no Wawa

19Orasaka, pasowal sa ci Yis i cangraan, <<So'linen Ako a somowal kamo, lonok caay ko sasaan Kako o Wawa a midmak to maamaan. O dmak no Wama ko pi'arawan Ako a midmak. Ano o maan ko nidmakan no Wama Ako i, mahaento ko dmak Ako o Wawa. 20Nawhani maolah ko Wama i Takowanan o Wawa. Maolah Cingra a pahapinang i Takowanan o Wawa to dmak Ningra a ma^min. O papahapinang Cingra i Takowanan o Wawa to ikakaay nonini a malodadmaken. Ta fahka' kamo i Takowanan. 21Mato nipipalowad no Wama a pa'orip to mapatayay ko nipipafli Ako o Wawa to matatodongay i nafaloco'an Ako a tamdaw to mida'ocay a 'orip. 22Caay pisawkit ko Wama to cimacimaan a tamdaw. Mapatorodto Ningra i Takowanan o Wawa ko sasawkiten a dmak a ma^min. 23Ta matiya o nipipalatadamaan no polong no tamdaw to Wama ko nika pipalatadamaan nangra i Takowanan o Wawa. O caay ka pipalatadamaan i Takowanan a tamdaw i, o caay ka ngodo toya miocoray Takowanan a Wama.

24<<So'linen Ako a somowal kamo, o mitngilay to sowal Ako o paso'linay a miti'er to miocoray Takowanan i, ci'orip to mida'ocay. Caayto ko mamapastek i raraw, maliyasayto ningra ko patay. O caci'orip cingra to mida'ocay. 25So'linen Ako a somowal kamo, maraodayto ko pitngilan no mapatayay a tamdaw to ngiha' no Wawa no Kawas. Irato anini konini a dmak. O caci'orip ko mitngilay a tamdaw. 26Tona o tatapangan no 'orip ko Wama. Saka, haenento Ningra ko Wawa a palatatapangan no 'orip. 27Nawhani, o Wawa no Tamdaw Cingra saka, patoroden haca no Wama ko Wawa to sakacitodong a misawkit. 28Aka ka fahka' kamo tonini. Ano hakowa i, o mamatngil no matademay a tamdamdaw ko ngiha' Ako, 29ta masadak cangra nai tadem. O nga'ayay ko dmak a tamdaw i, o lalomowad a ma'orip nai patay ta ci'orip to mida'ocay. O tatiihay ko dmak a tamdaw i, o lalomowad a ma'orip nai patay ta mapastek i raraw.

O Pipawacay to Pakayniay ci Yisan

30<<Lonok caay ko sasaan Kako a midmak to maamaan. O nano sowal no Kawas ko dado^doen Ako a misawkit. Caay pido^do Kako to nafaloco'an Ako, deng o nafaloco'an no miocoray Takowanan ko dado^doen Ako. Saka, o mo^celay ko pisawkit Ako.

31<<Ano Kako ko pawacayay to pakayniay i Takowanan i, awaay ko ^poc noya pipawacay Ako. 32Nikawrira, ira ko ccay a pawacayay to pakayniay Takowanan. Mafana' Kako to nika o so'linay ko nipipawacay Ningra to saki Takowanan. 33Maocor namo ko tamdaw a patayra ci Yohanian a papilicay. O so'linay ko nipipawacay ni Yohani to pakayniay i Takowanan. 34Caay ko nipilongoc Ako to no tamdawan a pipawacay. O sakaci'oripaw namo to mida'ocay saka, pasowal Kako tonini. 35Matiya o malikatay a dawdaw a matdi ci Yohani. Nikawrira, caay ka halafin ko nika olah namo toya likat. 36Nikawrira, o papatiri' Kako i tamowanan to ikakaay ni Yohani a pipawacay to pakayniay i Takowanan. O nipatorodan no Wama i Takowanan to lalahcien a dmak, oya nidmakan Ako to ha:tiniay ko malowacay to nika o niocoran no Wama Kako. 37Haloya miocoray Takowanan a Wama a pawacay to pakayniay i Takowanan. Caayho ka tngil namo ko ngiha' Ningra. Caayho ka 'araw namo ko tireng Ningra. 38Awaay i faloco' namo ko sowal Ningra. Nawhani caay paso'lin kamo a miti'er toya niocoran no Wama. 39Pakayni i Fangcalay Cudad ko sakaci'orip niyam to mida'ocay saan ko harateng namo saka, mikadkad kamo to Fangcalay Cudad. So'linay, onini a Fangcalay Cudad ko pawacayay to pakayniay i Takowanan. 40'Arawhani, ma'osi kamo a tayni i Takowanan to sakaci'oripaw.

41<<Caay pihamham Kako to sapihmekaw no tamdaw. 42Kirami, mata'selto Ako kamo, awaay ko olah no faloco' namo to Kawas. 43O nano sowal no Wama Ako ko sakatayni Ako. 'Arawhani, caay pihamham kamo i Takowanan. Nikawrira, oya ningra sanay a harateng a tayni a tamdaw i, hamhamen namo cingra. 44Maolah kamo a masasikahmek. Nikawrira, caay ka pilongoc kamo to nai dengan a Kawas a sakahmek, saka, samaanen namo ko nipipaso'lin i Takowanan saw? 45O mitoro'ay ci Yis to raraw niyam i ka'ayaw no Wama, aka ka saan ko harateng namo. Oya pafaloco'an namo ci Mosi ko mitoro'ay to raraw namo. 46Ano so'linay ko pipaso'lin namo i ci Mosian i, kona paso'lin kamo i Takowanan. Nawhani o pakayniay i Takowanan ko nipitilid ni Mosi. 47Nikawrira, caay paso'lin kamo to nitilidan ni Mosi saka, samaanen namo ko pipaso'lin to sowal Ako saw?>>

अहिले सेलेक्ट गरिएको:

Yohani 5: AMIS2019

हाइलाइट

शेयर गर्नुहोस्

कपी गर्नुहोस्