Yuuẖanna 15
15
Dhugur a durna
1Nyi gwiro dhugur dhina dhiro titiganu, a Babo gwiny gwiro Kweleny gwa dhugur. 2Durna peth dina dijo diginy dina dati diriro fruuta no ŋwulurta galo; a durna peth dina diriro fruuta, ŋwuljarima dilrire fruuta gwoinyadhanu. 3Nyaŋa la liŋir ganu ŋinena gi dhuŋun dhina dhabiŋaijaje. 4Jul diginy, nyije dagalo. Gwiro ŋinena athi dhurna dhati dhuthi ŋoma dirire fruuta gwiren, ada dhati dhimaje gi dhugur no; a minoŋ ko nyaŋa lati luthi ŋoma, ada nyaŋa lati limaje diginy no. 5Nyi gwiro dhugur, a nyaŋa liro durna; gwina gwathije diginy, nyije dugun, a ŋeda gwarire fruuta gwoinyadho; abi ada nyi gwati gwimaje no, nyaŋa lati luthi ŋoma lapai dhuŋuna dheda no. 6Ada kwiji gweta gwati gwimaje diginy no, ŋwuguthini por gwiro ŋinena durna, duŋwudhe; alwareje liduŋw, alligatho kiga, alude. 7Ada nyaŋa limaje diginy, a dhuŋun dhiny je dagalo, a dhuŋun dhina dhanya dhotha galo dhina dhibupanya dhaji dhajupijo. 8A minoŋ Babo gwiny gwamajidhini, danya rire fruuta gwoinyadho; danyaro calmiz jiny. 9A gwiro ŋinena uminyina Babo, a minoŋ ko ŋajuminyi. Jul gi uminyi gwiny. 10Ada nyaŋa limamutha awaamir gwiny, nyaŋa laji laje gi uminyi gwiny; gwiro ŋinena muthudhiny awaamir gwa Babo gwiny, nyije gi uminyi gwuŋun. 11Nyi gwimajabiŋaijo dhuŋuna ibidha, di iŋir dhugore gwiny je dagalo, a di iŋir dugore gwalo meajini. 12Amr gwiny gwiro ibigwa, danya uminyi gweta gweta dagalo, gwiro ŋinena uminyajina. 13Gwati gweda gwuthi uminyuŋw gwinunu gi uminyi ibigwa no, di gweda eijo limedhigen. 14Nyaŋa liro limadhiguri ada nyaŋa limapai dhuŋuna dhina dhajidhai abiŋaijo. 15Nyi gwati gwajidhedha jiriny jan jine manaŋ no; ŋinena athathi gine liŋidhi dhuŋuna dhina dhathi kweleny gwuŋun apai no; abi nyi gwimajaici limadhiguri; ŋinena aŋajaje dhuŋuna peth dhina dhidiŋininy di Babo gwiny. 16Nyaŋa lati luthiny ganu no, ŋajibi utha ganu, ŋajiruje liji lina laji lela a nya larire fruuta, a fruuta gwalo je gwortal; a dhuŋun peth dhina dhanya dhothaije Babuŋw galo gi jiriny jiny, dhajidhedha.
Gidhila a Dhigirim dhina dhiro titiganu
17Minoŋ nyi gwimajidhedha amr ibigwa, danya uminyi gweta gweta dagalo. 18Ada gidhila gimajirini, nyabiliŋa darnu girininy kwereny nanaŋ gati girinaje no. 19Ada nyaŋa lina lirii la gidhila, a gidhila gaiiuminyi lijo legen; abi ŋinena athanya rui la gidhila no, abi nyi gwimajuthe ganu kidhila, a gi dhuŋun ibidha gidhila gajirini. 20Aŋidhanul dhuŋuna dhina dhabiŋaijaje, gadham gati ginunu di kweleny gwuŋun no. Ada liminyure ŋina, a laji lajure ŋina ko; ada lima uthejo dhuŋuna dhiny nyuni, a laji luthejo dhuŋuna dhalo nyuni ko. 21Abi dhuŋun ibidha dhaji dhajilupijo peth ŋinena ro jiriny jiny, ŋinena athil liŋidhi ŋeduŋw gwina gwukejiny no. 22Ada nyi gwina gwati gwidhii nyilabiŋaijo no, lati laii uthi dhuŋuna dhike no; abi ŋinena lati luthi dhuŋuna gi dhuŋun dhegen dhina dhike no. 23Gwina gwirininy, gwirinu Babuŋw gwiny ko. 24Ada nyi gwina gwati gwathiiapai ŋiro degen ŋina ŋati ŋathil kwiji gweda apai no, lati laiuthi dhuŋuna dhike no; abi ŋinena liminyaŋa nyilirini a Babo gwiny ko. 25Abi minoŋ di dhuŋun meajini dhina dhulinu gi naamuus gwegen darnu, Lirininy tur. 26Abi maji ma Gwimiri ila, gwina gwaji gwinyukeja dagalo ro di Babo, gwina gwiro Dhigirim dha dhuŋun dhina dhiro titiganu dhina dhidhi di Babo, ŋeda gwaji gwaro shaahid gwiny. 27A nyaŋa ko liro shuhuud, ŋinena jilo ro kwereny.
अहिले सेलेक्ट गरिएको:
Yuuẖanna 15: HBN
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
First published by the British and Foreign Bible Society in 1966.
