MARAKO 16
16
1Kugbo sabatolo laga arosodru, Maria na Magadalana kasi Maria naga a ŋote na Yakobona, ku Salome druga gborundro kapazi lo ŋmwa sisisi kilo‚ ma ko utuni ku we’i opulo. 2Kutumalu ’bero ’bero i luŋa lo sabiti laga a kayolo‚ ko druga utu i gulo yu ti kolona alupundro azo. 3Ti ko kine i kulia kase dridriŋini adi‚ “Inde ma ŋa lo ku dukakindra ŋutu ŋurupi ina i gulo kutu yu kaŋo ya?” 4Ku ko laga aboŋadru‚ ko druga medra adi ŋurupina adukazi kaŋo azo‚ ’bo lepe a druma koru. 5Kasiko i lubo naga i gulo kata yuna‚ ko druga medra ’bulani le’de ti agbi’diki i go laga lo lutate yu‚ ti asozu mugu ku bongo nakpe. Ko druga rambu ’beri koru. 6Lepe druga takindra ko adi‚ “Ku raramita ’beri. Ta kine ga’yu Yesu lo Nazareta lo ’beko i kedini mugulo. Lepe aŋiyoro azo‚ lepe nide ’bayi. Meteta piri naga ma ko topirikindri lepena. 7’Bo utita ku trukokita lotodiniki ti lepe kilo ku Petero adi lepe lu tu kasu koŋo yu Galili yu. Ta imemedra lepe yu de be naga ma lepe takindri ta kazuna.” 8Kuwade ko druga lupodru kaŋo‚ i woke i gulo kutuni. ’Beri kasiko kine druga poki i zangu ku rambu na ’beri. Ko aku kulia ku le’de ŋutu‚ igbonaga ko akuze ina. [ 9Kuwade‚ kugbo Yesu laga aŋiye i luŋa lo sabiti laga a kayolo ’bero ’bero‚ lepe druga puku a kayo ku Maria naga na Magadalanani naga kazu ma lepe rikodri dreria loro burio ku lepe i mugunina. 10Maria ŋanina druga tu i trukokindro na ŋutulu laga kazu lo saka ku Yesu kugele kilo ma ko gbiyini ina. 11’Bo ku ko laga ayinga adi lepe lu zoru‚ adi noka ŋanina amedra lepe‚ ko aku rugo. 12I bo ŋanina Yesu druga puku ku mugu naga ka’de ku ŋutulu mure ti ko kulu woro i diŋo yu. 13Ko druga yitozi bo druga trukokindro ŋutulu ku’de kilo‚ ’bo ko aku rugo koŋa. 14I bo ŋanina Yesu ku mugu druga puku ku ŋutulu laga mere gele ku koyita gele kilo‚ ti ko agbi’diki i mesa kutu yu‚ ’bo lepe druga riringa ko ku kulia ti rugo nasiko naga ’bayi ku teiliko kasiko logo kilo‚ igbonaga ko aku rugo ŋutulu laga lo medra nye i bo na ŋiye nanyena kilo ina. 15Lepe druga takindra ko adi‚ “Utita i ka yu giri‚ ku trukokita ŋutulu giri laga agbeki kilo kuu na’buna. 16Ŋutulu laga arugo‚ laga a’deba baputizilo kilo‚ iririte, ’bo ŋutulu laga aku rugo kilo, ŋera na kuliana ititiga ko. 17Kine kpiyesi de igbogbo’da a ti ŋutulu lo rugo kilo. Ku kari kuwe kine ko iririkodru dreria loro. Ko ikukulia ku kutuzi naluduko kine‚ 18ko i’du’dumundra munuo‚ ku ko laga amozu ŋo laga lo tutuwaniki kilo‚ ko aka kondra koŋa a loroni. Ko itatandru kenisi kase kilo ku ŋutulu laga ku tatuwa kilo kini‚ ’bo ko itotoruwe.” 19Kuwade, kugbo Mata Yesu laga atakindra ko de‚ lepe druga ’dumazi ki i’diko yu‚ druga gbi’diki ka i keni lo Ŋun lo lutatelo. 20Lotodiniki kilo druga lulupodru i trugo na kulia mu pirito‚ ti Mata lu kondra kita kasi ko kugele i tolirakindra na kulia na tru ko kine ku kpiyesi naga ma ko kondrini kine.]
अहिले सेलेक्ट गरिएको:
MARAKO 16: KNT77
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Kakwa New Testament © Bible Society of Uganda, 1974, 1977.
