MARAKO 15
15
1Ku gbo’dini kutumaluni‚ wuleŋa gele ka’i’ila drumala kilo ku temezi kilo ku katogolo ti kukuzuna kilo ku kayolo ti kuliata kilo giri druga tunundra ’beri kugele i tazu na kulia. Ko druga todya Yesu‚ azonga lepe i tikindra na lepe ku Pilato. 2Pilato druga piza lepe adi‚ “Do laga a Mata lo Yahudilo ya?” Lepe druga teyitokindro lepe adi‚ “Do akulia ’do.” 3Ka’i’ila drumala kilo druga sosozu kuliata rodri ku lepe i muguni. 4Pilato druga piza lepe ’do adi, “Do ani teyitundro kulia ya? Mete‚ kulia naga ma ko sozi konu muguni kine rodri!” 5’Bo Yesu aku teyitundro kulia ’do‚ kuwade Pilato druga rambu mugu koru. 6Mu kolo drumala ti Roseto kine Pilato bita lakakindra ko ŋutu gele i drodrore yu laga ma ko magilo. 7I dridriŋi na ŋutulu laga lo padru kulia‚ laga a karemo kilo‚ le’de ŋutu lo luŋu a Baraba ti lu i kadi naga a drodrorena kata yu. 8Kuwade mongoyo na ŋutuluna druga pondra, druga poki i piza na Pilato ti lepe kondri be naga ma lepe bita kondrinina. 9Pilato druga piza ko adi‚ “Ta nyadru ki na lakaki ta mata lo Yahudilo ya?” 10’Bo lepe adeni adi ka’i’ila drumala kilo atikindra Yesu ku yuma. 11’Bo ka’i’ila drumala kilo azuzuza mongoyo kilo adi troru ti lepe lakaki se Baraba ayu. 12Pilato druga piza ko ’do adi‚ “Ma na kondra inyo ku ŋutu laga ma ta lungi a Mata lo Yahudilo ya?” 13Ko druga resa adi‚ “ ’Beke lepe i kedini mugu!” 14Kuwade Pilato druga piza ko adi‚ “Gbandra‚ lepe akondra toro naga a inyo ya?” ’Bo ko aresa ’do ku teriŋi arodru adi‚ “ ’Beke lepe i kedini mugu!” 15Kuwade igbonaga Pilato laga lo nyadru tikindra mongoyona nyola ina‚ lepe druga lakakindra koŋa Baraba. Ku lepe laga atikindra Yesu i kpinyani, lepe druga tikindra lepe i ’beko i kedini muguni. 16Katiyu kilo druga zonga Yesu i ’ba lo lo’bizo, laga lo luŋu a Praitoriolo kata yu. Ko druga luŋudru katiyu kilo giri kugele, 17druga sozu Yesu ku bongo naluwena. Ku ko laga atragu yogono lo kakuwa, ko druga sukindro ku lepe i kuweni. 18Ko druga romu ku lepe adi‚ “Mata lo Yahudilo‚ koŋona!” 19Ko druga pogu kuwe lo lepelo ku ’bakuzuti, druga yagu kamula ku lepe i muguni‚ druga ruguŋo ka i teminizo na lepe. 20Ku ko laga a’da’datazu lepe‚ ko druga yokoodru bongo naluwe ŋanina‚ druga sozu lepe ku bongola ti lepe lepe kine‚ druga zonga lepe i ’begu na lepe i kedini mugu yu. 21Ko druga ri’dikindra le’de ŋutu lo rosodru i kikolo‚ ti lu pondra i diŋo‚ adi ti lepe ’doke kedini laga lo ’bekoni Yesulo. Ŋutu ŋanilo a Simona lo Kurene laga a monye lasi Alekezanda seku Rufusilo. 22Ko druga zonga Yesu i piri na luŋu a Gologota nu kata yu‚ trugo adi‚ Piri na Lele na kuwe. 23Ko druga yutakindra lepe suwe ti konye ti zabibu naga aŋoŋola ku wini kine‚ ’bo lepe aku mozu. 24Ku ko laga a’begu lepe‚ ko druga kodya bongola ti lepe kine kase dridriŋini ku guma na zege‚ ma ko ku dendri ŋo laga a inyo laga ma ŋutu gele gele ’dumadrilo. 25’Bo ko a’begu lepe i kedini mugu i ’dipundro na kolo. 26Ti kulia na turani lepe kine awuro adi‚ “Mata lo Yahudilo.” 27Ko druga ’begu kola mure kugele kasi lepe‚ gele i keni lo lepe lo lutatelo yu‚ gele i keni lo kaduŋelo yu. [ 28Kuwade kulia na wuwuro na kulia adi‚ “Lepe akena i dridriŋi na ŋutu loro kilo‚” kine atorumokindro ’beri de.] 29Ŋutulu laga lo rosodru i kiko kilo druga momorozu lepe ti kulu idodonga na kuweto kase kilo‚ druga kulia adi‚ "“Hai! Do lo randru kadi na Ŋun ina‚ lo ’dugo lepe i luŋa musalalo, 30ritu mugu‚ kiyundri ka i kedini lo ’bekoni dolo!” " 31’Bo ka’i’ila drumala kilo druga ’da’datazu lepe kase dridriŋini, kasi katogolo ti kukuzuna kilo‚ druga kulia adi, “Lepe kazu ritundro ku’de kilo ŋutulu, ’bo ani romoki ritundro mugu. 32Ti Kristo‚ laga a Mata lo Isiraelilo kiyundri ka tinade i kedini lo ’bekoni nyelo‚ ma yi ku medri‚ ma yi ku rugi.” Ŋutulu laga lo ’beko kasi lepe kugele kilo amotizo lepe de itro. 33Ku gbo’dini tupara kide, kana giri druga sosomuko yeŋadru tozo i lu’balaŋa. 34I lu’balaŋani Yesu druga laiza ku roro laga gboŋa adi, “Eloi, Eloi‚ lama sabakitani?” trugo adi‚ “Ŋun lio, Ŋun lio‚ do kolokindro na gbandra ya?” 35Ku’de ŋutulu laga lo lira nyoga kilo ku ayinga kulia ŋani kine‚ ko druga kulia adi‚ “Yiŋeta‚ lepe lo lungu Eliya.” 36Le’de ŋutu druga wo i tozodru na remomolulu ku suwe ti konye ti zabibu naga potroru kine druga sukindro lepe i ’bakuzuti kutu‚ druga tikindra lepe i mozu‚ druga kulia adi‚ “Inga mada ki’do‚ kita medra kugbo Eliya ipopondra i’dukundro na lepe kani.” 37Yesu druga laiza ku roro laga gboŋa, druga ’do’doro. 38Bongo na ŋerani kata na kadi na Ŋun ina druga kendra mugu mure ŋiyu ki yu yeŋundra kani. 39Druma lo katiyu kama gele laga lo lira ku lepe i koŋonilo, kugbo amedra adi lepe ilo ’do’doro, lepe druga kulia adi, “A ’diri ilo ŋutu de a ŋiro lo Ŋun.” 40Ti wate ku’de kine kunu i medra pazo yu‚ kasiko i dridriŋini Maria naga na Magadalana ku Maria naga a ŋote na Yakobo lotrilo ku na Yosena‚ ku Salome‚ 41ko naga na kepodru bo na Yesuna‚ naga na konakindra lepe kita‚ i luŋa laga ma lepe gbo’dini Galili yu lu kine‚ ku wate ku’de kine rodri naga na pondra kasi lepe Yerusalemani kine. 42Ku gbo’dini kotriana, igbonaga luŋalo gbo a luŋa lo kukunani kapazilo‚ trugo adi a luŋa laga i sabatolo i koŋolo ina‚ 43Yosefa lo Arimataya, laga a kayoloni lo kuliata, laga lo sopo koru‚ laga lu momondru tumata na Ŋun inalo‚ lepe druga togo’yu teili‚ druga utu ku Pilato yu i magu na opu lo Yesulo. 44Kuwade Pilato druga rambu mugu koru ku ’doro na Yesu naga wulena‚ druga lungu druma lo katiyu kama gelelo‚ i piza na lepe ŋona Yesu atuwa a ’diri. 45Ku lepe laga adeni ku druma lo katiyulo i kutuni adi Yesu atuwa azo‚ lepe druga kulia adi ti opulo tikini Yosefa. 46Yosefa druga gborundro bongo naga nakpe‚ ’bo kugbo lepe laga a’dukundro opulo kani‚ lepe druga todya lepe ku bongo nakpe ŋanina‚ druga topirikindra lepe i gulo naga aluluto i lele mugu yuna kata yu. Lepe druga larakindra ŋurupi i gulo kutu yu itro. 47Maria na Magadalana seku Maria naga a ŋote na Yosefana ameri piri na topirikini lepena.
अहिले सेलेक्ट गरिएको:
MARAKO 15: KNT77
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Kakwa New Testament © Bible Society of Uganda, 1974, 1977.
