LUKA 4
4
1Kugbo Yesu laga azore ku Yuka Nakiyena, ku ayite i kare laga Yorodani yu‚ druga Yuka Nakiyena ’doladru lepe i diŋo kata yu‚ 2’bo kasosoyini lo kulialo druga luluga lepe luŋa meria iŋmani. Lepe aku nyosu le’de ŋo i kulu luŋa de kata yu. Kugbo luŋa kilo laga alenga, druga magona lenga lepe. 3Kasosoyini lo kulialo druga takindra lepe adi, “Ku do laga a Ŋiro lo Ŋun‚ taki ina ŋurupi de ti yeŋundri a ’dilo.” 4Yesu druga teyitokindro lepe adi, “Awuro adi, ‘Ŋutulo ani gbo’da zoru ku nyosu ka’delo.’ ” 5Druga kasosoyini lo kulialo zonga lepe ki‚ druga kpekindra lepe tumataki naga i kani kine giri wuleŋa gele‚ 6druga takindra lepe adi‚ “Na ititikindra do ina teriŋi de ku sopo nanyena itro‚ ’bo atiki na‚ ’bo na ititiki ŋutu laga na nyadru tikindralo. 7’Bo ku do laga aruguŋo ka i teminizo na na‚ ko giri igbo’da a koluŋa.” 8Yesu druga teyitokindro lepeŋa adi‚ “Awuro adi, ‘Teminine Mata Ŋun lolu ilo, ’bo kuke lepe ’du.’ ” 9Kasosoyini lo kulialo druga zonga Yesu Yerusalema yu‚ druga tolirakindra lepe i ’dongole na kadi na Ŋun ina ki yu‚ druga takindra lepe adi‚ “Ku do laga a Ŋiro lo Ŋun, gupara mugu inide ka yu, 10igbonaga awuro adi, ‘Lepe ititikindra malaika kanye kilo i tizu na do,’ 11’bo, ‘Ko ikokomu do ku kenisi kase kilo ki yu i piri, ka’bi do ku zulokindro moko lolu i ŋurupi ki.’ ” 12Yesu druga teyitokindro lepe adi, “Atayi adi, ‘Ku momoru Mata Ŋun lolu ilo.’ ” 13Kugbo kasosoyini lo kulialo laga atutuzo luluga nanyena giri druga kolokindro lepe ku baŋe a naŋutru. 14Yesu druga yitozi bo ku teriŋi na Yuka Nakiyena Galili yu‚ ’bo kulia ti lepe kine druga kuworo mu pirito naga i nu ka de yu kine. 15Lepe druga togo’yu i kadizi kasiko naga a momoreta kine kata yu itro‚ ’bo ŋutulu kilo giri apudya lepe. 16Yesu druga tu Nazareta yu i piri na ’dudri lepe nu‚ druga lepe lubo i kadi naga a momorena kata yu beti naga bita ma lepe kondrini i luŋa lo sabatolona. Lepe druga ŋi ki i kendra. 17Druga buku na kakeyoni Isaya ina na tiki lepe. Lepe druga ŋazu bukuna druga rumbi piri naga awuro adi‚ 18“Yuka na Matalona ina kuwe ki‚ igbonaga lepe agelundra na i trukokindro na lemerika kilo kuu na’buna. Lepe asunyundro na i trukokindro na ŋutulu laga amomoka kilo kulia na lakeni ko kine ku ti ŋayi na konye ti ŋutulu laga a mudumudu kilo‚ ku yukuwe na ŋutulu laga asasanya kilo, 19ku i tokuzo na kiŋa lo ru Matalo ilo.” 20Druga lepe tragu bukuna, druga tikindra bo ku kalokonilo yu, druga gbi’diki ka‚ ti ŋutulu giri laga i kadi naga a momorena kata yu kilo kulu i gbuluzu lepe. 21Druga lepe poki i takindra na ko adi‚ “Indikinina kine kulia na wuro kine de a’duki ’doŋa kasu suwoni.” 22Ŋutulu kilo giri druga tazu kulia ti lepe kine a na’bu‚ ’bo ko arambu ’beri koru ku kulia ti ’busa na’bu na lupundro ku lepe i kutuni kine. Ko druga piza adi‚ “Ilo de ani gbo’da a ŋiro lo Yosefalo ya?” 23Yesu druga teyitokindro ko adi‚ “Na adeni soso adi ta itakindra na kulia na guguma kine de adi, ‘ ’Buni‚ torune mugu. Kulia naga ma yi yingi mo do kondri Kaperinauma yu kine‚ kone ko inide itro konu kani lepe!’ ” 24Lepe druga kulia adi‚ “Na takindra ta a ’diri‚ kakeyoni le’de ’bayi lo ruko kanye kani lepe. 25’Bo na takindra ta a ’diri‚ kazu ku ’dikona naga a’diya kiŋazi musala ku yapazi bukiye‚ ku kana naga ayeŋundra a rile mu pirito‚ i baŋe na Eliya nu kata yu‚ ti awuzio kine rodri i ka na Isiraelina kata yu. 26’Bo Eliya aku sunyuzi ku ne’de ŋutu nasiko tro‚ lepe sunyuzi Zarapeta yu ’du‚ i ka na Sidonana ku awuzi ne’de. 27’Bo kazu i baŋe na kakeyoni Elisa nu‚ ŋutulu laga ku rima kilo rodri i ka na Isiraelina kata yu‚ ’bo le’de ŋutu laga atokela ’bayi‚ ŋolo Namana laga a Suriatiolo ’du.” 28Ku ko laga ayinga kine kulia de‚ ko laga i kadi naga a momorena kata yu kilo giri katazi kilo druga trotrori trotrori. 29Ko druga ŋi ki‚ druga rikodru lepe kezini kaŋo‚ ko druga pikodru lepe i tiko na mere lo ’dukoni kezi nasena ki yu ilo‚ adi ma se ku dukundri lepe ki yu kani i muru ki ’busa. 30’Bo lepe druga rosodru kasiko i dridriŋini druga tutu ŋo nanye. 31Yesu druga yenga Kaperinauma naga a kezi na Galilina kata yu. Lepe druga togo’yu ŋutulu kilo i luŋa lo sabatolo, 32’bo ko arambu ’beri koru ku togo’yu na lepena‚ igbonaga kulia na ta lepe kine gbo ku teriŋi ina. 33Nyenaga i kadi naga a momorena kata yu‚ le’de ŋutu lu yu de laga ku dreri loro. Ŋutu ŋanilo druga resa ku teriŋi adi‚ 34“Wu wu! Yesu lo Nazaretalo‚ kulia kaya seku do kine a ti nyo ya? Do pondra i tukarakindra na yi ya? Na adeni do. Do a Ŋutu laga a Lokiye lokiye lo Ŋun ilo.” 35’Bo Yesu druga ringa drerilo adi, “Yiŋani tali‚ lupundri kaŋo ku lepe i muguni!” Kugbo drerilo laga agupakindra ŋutulo kani kasiko i dridriŋini, druga drerilo lupundro kaŋo ku lepe i muguni‚ ’bo aku konu lepe a loro. 36Ko giri druga rambu ’beri‚ druga piza ’beri kase dridriŋini adi‚ “Kine kulia de a naga anyo naga lepe takindri yukala naro kine kukuzu ku todruma ku teriŋi‚ ’bo ko druga lulupodru kaŋo ina ya?” 37Kulia ti lepe kine druga kuworo mu pirito naga i laga yu kine. 38Yesu druga lupodru i kadi naga a momorena druga tu ku lubo ku Simona kadi yu. Rumbi ti moke na Simonana‚ muguna a’urakindra kamaka koru‚ ko druga ma’yu Yesu ku lepeŋa. 39Yesu druga lira ku noka ŋanina i lagani druga ringa tuwanelo, druga tuwane ŋanilo koko lepe. Nokana druga ŋiŋiye wuleŋa gele druga konakindra ko kita. 40Kugbo kolona naga ina ’do’doro, ŋutulu giri laga ku ŋutu kase laga ku yeyengaki ka’de ka’de kilo druga zondra ko ku Yesuni‚ lepe druga tandru kenisi kanye kilo kasiko kini gele gele‚ druga toruzo ko. 41’Bo dreria loro kilo alupundro ku ŋutulu rodri i ’berini, ko druga resa adi‚ “Do a Ŋiro lo Ŋun!” Yesu druga ringa ko‚ druga gogoki ko tazu na kulia ku’de ’do‚ igbonaga ko adeni adi lepe a Kristo ina. 42Kutumaluni, ku Yesu laga alupodru‚ lepe druga utu i diŋo yu ka’delo. ’Bo ŋutulu kilo druga ga’yu lepe druga pondra ku lepeni‚ ko nyadru goza lepe adi ka’bi lepe ku kokoloki se. 43Lepe druga takindra ko adi‚ “Ti na trukoro kulia ti kuu na’bu na tumata na Ŋun ina i kezino ku’de kine kata yu itro‚ igbonaga na sunye ku kine kulia de ina.” 44Kuwade lepe druga trugo kulia kine i kadizi naga a momoreta kine kata yu Yudaya yu.
अहिले सेलेक्ट गरिएको:
LUKA 4: KNT77
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Kakwa New Testament © Bible Society of Uganda, 1974, 1977.
