Aposel 3
3
Pita orwo Jon tidue elio arit ina gesa
1Oklou gesa Pita orwo Jon isak kla ke Ida Tapolngon ila ninu. Ari oklou aling aling langka 3 kilok ke kirui osep Yuda ina tipolou ke Ida Tapolngon ila ninu ma tiwai itau ine.
2Alo ka tipolou olwo boto ine deka osep leklou tipaur gute ka kamla soulu ke Ida Tapolngon ila ninu ina ekreng bitna gesa ma iye dong ine. Ekreng bitna ane ina sirngen Ekreng Bitna Itau. Gute tonari kamla soulu lokono kesua alo ka tna divir iye deka divir iye langane. Ari oklou aling aling osep tipaur iye la ke Ida Tapolngon ila ninu ina ekreng bitna kene deka iye dong ine kesua iye waiki pang mani ke osep ka tisep ke Ida Tapolngon ila ninu.
3Pita orwo Jon tipolou ke Ida Tapolngon ila ninu ina ekreng bitna e tiwaiki tisepe deka gute ka kamla soulu vati isak e pang mani ke isak. 4Pita orwo Jon tiklingen gute pang mani ke isak deka amtarsak la ke iye e Pita wai ke iye langane. “Emtem me ke imorwo.” 5Deka gute bitna la ke isak e aitno mter langka ma tikar mani gesa ke iye.
6Deka Pita wai langane. “Oka. Lou mani dong ke ngong kovok e wan ka dong ke ngong ma ngalua wom ine. Eknikane Yesus Krais ka Nasaret ina ila arit due wom ma emtito emlila.” 7Deka Pita kis gute limla odung e lua iye tito vri. Deka lokono gute kamla ila bara e kamla silimu tipolou itau blang. 8E iye kopiuk kopiuk lila. Deka iye gosok Pita e Jon tisep ke omur ka lelei Ida Tapolngon ila ninu e iye lila e kopiuk kopiuk deka kakai Ida Tapolngon angaine tito la egim.
9Osep keniye ka tidong ke Ida Tapolngon ila ninu tivati iye lila e kakai Ida Tapolngon angaine tito la egim. 10Tile omur iye gute ka oglou kamla soulu e oklou aling aling dong ke Ida Tapolngon ila ninu ina ekreng bitna ka tisire Ekreng Bitna Itau e pang mani ke osep. Osep keniye ka tivati gute tonari tidigrik pula e aitno lisak mter elio ane ina poloungon batne lange?
Pita palongo osep pula ke elio arit ina batne
11Deka gute tonari kap Pita e Jon tivri ke opos gesa ka tisire Solomon ila opos. Iye dau kis isak orwo e osep pula tivati e tidigrik ke iye e tisuong tipolou ke isak. 12Pita vati osep tonari deka ile omur tidigrik deka iye wai ke isak langane. “Umu osep Israel ina ina lange umedigrik ke elio ane? Ina lange omtomu nekek dagar ke imi? Aitno lumu lange? Aitno lumu mter elio ka gute ane lila ina poloungon batne limem arit koke limem elio itau koke lange?”
13“Ida Tapolngon ka Abra-ham Ina Tapolngon e Aisak Ina Tapolngon e Jekop Ina Tapolngon e udo seia Inarak Tapolngon iye tona due elio arit ina ane. Elio arit ina ane kakai gute Yesus ka Ida Tapolngon ila gute bokongon ina angaine. Oglou umodue agegeng ke iye e umesin elio pula vri ke iye e umepli iye ke Pailat bitna. Pailat klingen lumu sinngen elio deka mgo aitno mter Yesus ila elio vri ke iye kovok deka waiki songon Yesus la. 14E dau umepli iye e ila elio kene gesa vri ke iye kovok. Iye tona ila elio keniye itau lokono vala. E dau umepmi Pailat ma iye songon gute gesa ka due burwa ma iye la e umawaiki Yesus mete. 15Deka umodue Yesus ka iye elio itau ina poloungon batne deka umomluk iye ma iye mete. Iye mete deka Ida Tapolngon due poga tito ke ina denga. E imi ane imavati iye. 16Eknikane umavati e umeile gute ane. E Yesus ka aitno limi dagar lokono ke iye ila arit due gute ane kamla polou itau blang. Aitno la dagar ke Yesus e ila arit vala due gute ane kamla polou itau blang langka umakaranga umavati.”
17“Sipmi. Ngaile langane. Oglou umogosok lumu osep ngongle umodue elio soulu ke Yesus batne umeile iye itau kovok. Aurou. Aitno lumu kaka ke iye. 18Oglou ari Ida Tapolngon due osep napaprangan ina aitno lisak deka tiwai ke elio soulu ma polou ke gute ka iye rere Krais ka lua osep. Mase dau tauni Yesus me dong kap itosep. Deka ari umeile iye itau kovok e umodue elio soulu bitna bitna ke ke iye eriar langka oglou osep napaprangan ina tisogo ine. 19Eknikane umabauluk aitno lumu ke lumu elio epmes ina e aitno lumu la dagar ke Yesus. Langka aitno lumu la dagar ke Yesus ma Ida Tapolngon sak lumu elio epmes ina la. Deka ma tivri ke umu kovok. 20Deka ma elio itau lokono polou ke umu batne ke Ida Puda. E mase ma iye pagei gute Yesus ka oglou iye rere Upu Krais iye polou ke umu. 21Eknikane Yesus dau dong ke omur heven la lama iding alo ka elio polou eriar langka oglou osep napaprangan ina tiwai ine. Oglou ari Ida Tapolngon due osep napaprangan ina aitno lisak deka tiwai langane. ‘Mase dau tauni ma Ida Tapolngon due wan bitna bitna keniye tipolou itau lokono eriar langka oglou ari alo ka elio epmes ina dau dong kovok.’ Deka alo ka elio ane polou ma Yesus duru dong ke taklak blang.”
22“Oglou ari Moses wai ke osep Yuda ina langane. ‘Oglou Ida Puda ka Ida Tapolngon rere ngong deka ngapolou ila gute napaprangan ina gesa. E eriar langka oglou iye rere ngong deka mase ma iye rere supmu kene. Deka alo ka iye polou ma umoklingen ila pelengon keniye.’ 23Deka osep seisei ka tididi ila pelengon kovok ma Ida Tapolngon due agegeng ke isak e tidong kap osep kovok. 24Mase gute napaprangan ina Samuel dong. Alo ari iye napapra osep ke taim ane. Mase osep napaprangan ina keniye ka tididi Samuel tinapapra ine blang. 25Umu ka osep Yuda ina umodue wan bitna bitna ke lumu seia ka tidong oglou ka isak Ida Tapolngon ila osep napaprangan ina. Oglou Ida Tapolngon wai ila promis ke lumu eia Abraham. Iye wai langane. ‘Ma ngadue elio itau ke osep ka pula keniye batne lem napakngan kene ka ma me.’ Pelengon ka la ke Abraham pakes duru me ke umu blang. 26Deka Ida Tapolngon didi ila pelengon dagar e pagei ila gute bokongon ina Yesus ke umu kodong. Mgongon iye polou ke umu kesua iye waiki lua umu ma umabauluk aitno lumu ke lumu elio epmes ina.”
अहिले सेलेक्ट गरिएको:
Aposel 3: ANT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
copyright 2003 New Tribes Mission, Sanford, FL 32771
