भजनसंग्रह 51
51
भजन 51
सङ्गीत निर्देशकको निम्ति, दावीदले बतशेबासँग व्यभिचार गरेपछि नातान अगमवक्ता तिनीकहाँ आएपछिको दावीदको भजन।
1हे परमेश्वर, तपाईंको अचुक प्रेमअनुसार
ममाथि दया गर्नुहोस्;
तपाईंको महान् करुणाअनुसार
मेरा अपराधहरू मेटिदिनुहोस्!
2मेरा सबै अधर्महरूलाई पखालिदिनुहोस्,
र मेरो पापबाट मलाई शुद्ध पारिदिनुहोस्!
3किनकि मेरा अपराधहरू म जान्दछु;
र मेरो पाप सधैँ मेरै सामु छ।
4मैले तपाईंको विरुद्धमा, मात्र तपाईंकै विरुद्धमा पाप गरेको छु,
अनि तपाईंको दृष्टिमा जे खराबी छ, मैले त्यही गरेको छु;
यसकारण तपाईंको फैसलामा तपाईं सही हुनुहुन्छ,
र तपाईंले न्याय गर्नुहुँदा धर्मी ठहरिनुहुन्छ।
5निश्चय नै म जन्मँदै पापी थिएँ,
मेरी आमाले मलाई गर्भधारण गरेदेखि नै म पापी थिएँ।
6तपाईंले गर्भमै विश्वासयोग्यता चाहना गर्नुहुन्छ;
तपाईंले मलाई त्यो गोप्य ठाउँमा बुद्धिका कुरा सिकाउनुहुन्छ।
7हिसपले#51:7 एक प्रकारको सुगन्धित वनस्पति। शुद्धीकरण वा चोख्याउने काममा प्रयोग गर्ने सुगन्ध भएको तितेपातीजस्तै एक प्रजातिको झार मलाई शुद्ध पार्नुहोस्, र म शुद्ध हुनेछु;
मलाई धुनुहोस्, र म हिउँभन्दा सेतो हुनेछु।
8मलाई हर्ष र आनन्दका कुरा सुन्न दिनुहोस्;
तपाईंले धुलोपिठो पार्नुभएका यी हड्डीहरू आनन्दित होऊन्!
9मेरा पापहरूदेखि आफ्नो मुहार लुकाउनुहोस्,
र मेरा सारा अधर्महरू मेटिदिनुहोस्!
10हे परमेश्वर, मभित्र शुद्ध हृदय सृजना गर्नुहोस्,
र मभित्र स्थिर आत्मा पुनर्जीवित पार्नुहोस्!
11तपाईंको उपस्थितिबाट मलाई टाढा नहटाउनुहोस्,
र तपाईंको पवित्र आत्मा मबाट नलैजानुहोस्!
12तपाईंको मुक्तिको आनन्द मलाई फेरि दिनुहोस्,
र मलाई सम्हाल्न तत्पर आत्मा दिनुहोस्!
13तब म अपराधीहरूलाई तपाईंका मार्गहरू सिकाउनेछु,
ताकि पापीहरू तपाईंतिर फर्केर आऊन्।
14हे मेरा मुक्तिदाता परमेश्वर,
मलाई हत्याको दोषबाट छुटकारा दिनुहोस्
र मेरो ओठले तपाईंको धार्मिकता गाउनेछु।
15हे प्रभु, मेरा ओठहरू खोलिदिनुहोस्,
र मेरो मुखले तपाईंको प्रशंसाको घोषणा गर्नेछ।
16बलिदानहरूमा तपाईं खुशी हुनुहुन्न, नत्रता म बलिदान चढाउनेथिएँ;
तपाईं होमबलिमा प्रसन्न हुनुहुन्न।
17हे परमेश्वर, तोडिएको मन नै मेरो बलिदान हो;#51:17 अथवा परमेश्वरका बलिदानहरू हुन्
हे परमेश्वर, तपाईंले चूर्ण र पश्चात्तापी
हृदयलाई कहिल्यै तिरस्कार गर्नुहुन्न।
18तपाईंको कृपाले सियोनको समृद्धि होस्,
यरूशलेमका पर्खालहरू निर्माण गरिदिनुहोस्।
19तब तपाईं धर्मीहरूका बलिदानहरूमा प्रसन्न हुनुहुनेछ,
सिङ्गो चढाइएका होमबलिहरूमा;
तब तपाईंको वेदीमा साँढेहरू बलि चढाइनेछन्।
अहिले सेलेक्ट गरिएको:
भजनसंग्रह 51: NCV
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
पवित्र बाइबल, नेपाली समकालीन संस्करण
प्रतिलिपि अधिकार © 1998, 2006, 2021, 2024 Biblica, Inc.
अनुमतिसहित प्रयोग गरिएको छ।
सम्पूर्ण अधिकार विश्वव्यापी रूपमा सुरक्षित रहनेछ।
Holy Bible, Nepali Contemporary Version
Copyright © 1998, 2006, 2021, 2024 by Biblica, Inc.
Used with permission. All rights reserved worldwide.