भजनसंग्रह 17
17
भजन 17
दावीदको प्रार्थना।
1हे याहवेह मेरो पुकारलाई सुन्नुहोस्,
मेरो पुकार उचित छ;
निष्कपट ओठहरूबाट निस्केका
मेरो प्रार्थनामा कान लगाउनुहोस्।
2मेरो निर्दोषता तपाईंबाट ठहरिएको होस्;
तपाईंका आँखाहरूले जे सही छ, त्यही देखून्।
3यदि तपाईंले मेरो हृदय जाँच्नुभयो भने,
राति आएर मलाई जाँच गर्नुभए तापनि
तपाईंले मभित्र केही पनि दुष्ट योजना भेट्टाउनुहुनेछैन;
मैले संकल्प गरेको छु, मेरो ओठले पाप गर्नेछैन।
4यद्यपि मानिसहरूले मलाई घूस दिन खोज्छन्;
तपाईंको मुखबाट निस्केका आज्ञाद्वारा
मैले आफूलाई हिंसाको मार्गबाट जोगाइराखेको छु।
5मेरा पाइलाहरू तपाईंका मार्गमा चलेका छन्;
मेरा पाउहरू चिप्लेका छैनन्।
6हे परमेश्वर, म तपाईंलाई पुकार्छु; किनकि तपाईंले मलाई जवाफ दिनुहुनेछ;
तपाईंको कान मतिर लगाउनुहोस्, र मेरो बिन्ती सुन्नुहोस्।
7तपाईंको अचुक प्रेमको अद्भुत कार्यहरू देखाउनुहोस्;
तपाईंमा शरण लिनेहरूलाई तिनीहरूका वैरीहरूबाट
तपाईं आफ्नो दाहिने बाहुलीले बचाउनुहुन्छ।
8मलाई तपाईंको आँखाको नानीलाई झैँ रक्षा गर्नुहोस्;
तपाईंको पखेटाको छायामा मलाई लुकाउनुहोस्,
9मलाई नष्ट पार्न आइलाग्ने दुष्टहरूबाट,
मलाई घेरेर मार्न चाहने घातक शत्रुहरूबाट बचाउनुहोस्।
10तिनीहरूले आफ्ना निर्दयी हृदय बन्द गरेका छन्,
र तिनीहरूका मुखले घमण्डका कुरा गर्दछन्।
11मलाई तिनीहरूले खोजी-खोजी निकालेर चारैतिर घेरेका छन्;
मलाई जमिनमा पछार्नलाई तिनीहरू दाउ हेर्दछन्।
12तिनीहरू शिकारको निम्ति भोकाएको सिंहझैँ छन्,
तिनीहरू एउटा डरलाग्दो सिंहझैँ झाडीमा ढुकिबस्छन्।
13हे याहवेह, उठ्नुहोस्, तिनीहरूको सामना गर्नुहोस्;
तिनीहरूलाई पराजित गरिदिनुहोस्;
आफ्नो तरवारले मलाई दुष्टहरूबाट बचाउनुहोस्।
14हे याहवेह, जसको पुरस्कार यस संसारको जीवनकालमा सीमित छ,
संसारका यस्ता मानिसहरूबाट तपाईंको बाहुलीले मलाई बचाउनुहोस्।
तपाईंले साँचेर राख्नुभएका थोकहरूले दुष्टहरूको पेट भरिएको होस्;
तिनीहरूका छोराछोरीहरूले प्रशस्त खानेकुरा हसुरून्,
र तिनीहरूका आफ्ना भावी छोराछोरीहरूका लागि पनि प्रशस्त रहोस्।
15तर मचाहिँ धार्मिकतामा तपाईंको मुहार हेर्नेछु;
जब म बिउँझन्छु, तब तपाईंको मुहारको दर्शन गरेर म सन्तुष्ट हुनेछु।
अहिले सेलेक्ट गरिएको:
भजनसंग्रह 17: NCV
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
पवित्र बाइबल, नेपाली समकालीन संस्करण
प्रतिलिपि अधिकार © 1998, 2006, 2021, 2024 Biblica, Inc.
अनुमतिसहित प्रयोग गरिएको छ।
सम्पूर्ण अधिकार विश्वव्यापी रूपमा सुरक्षित रहनेछ।
Holy Bible, Nepali Contemporary Version
Copyright © 1998, 2006, 2021, 2024 by Biblica, Inc.
Used with permission. All rights reserved worldwide.