गलाती 3:1-6

हे मूर्ख गलातीहरूहो! कसले तिमीहरूलाई जादूटुनाले वशमा पार्‍यो? तिमीहरूको आँखाअघि नै येशू ख्रीष्‍ट स्पष्‍ट रूपमा क्रूसमा टाँगिनुहुने कुरा बताइएको थियो। तिमीहरूबाट म एउटै कुरा मात्र जान्‍न चाहन्छु: के तिमीहरूले व्यवस्थाका काम पालन गरेर वा सुनेका सुसमाचारमा विश्‍वास गरेर परमेश्‍वरको आत्मा पायौ त? के तिमीहरू त्यति धेरै मूर्ख छौ? मतलब परमेश्‍वरको आत्मामा सुरु भएर के तिमीहरू मानवीय कार्यमा नै टुँगिन चाहन्छौ त? यदि साँच्‍चै यो व्यर्थको थियो भने के तिमीहरूले व्यर्थमा यतिका दुःख भोग्यौ? म फेरि पनि सोध्न चाहन्छु, परमेश्‍वरले तिमीहरूलाई उहाँको आत्मा दिनुभएर तिमीहरूका माझमा शक्‍तिशाली कामहरू गर्नुभएको छ, यो व्यवस्थाको कर्मद्वारा हो, अथवा तिमीहरूले सुनेका सन्देशको विश्‍वासद्वारा गर्नुभएको हो? यसरी नै, “अब्राहामले परमेश्‍वरमा विश्‍वास गरे, अनि यो उनको निम्ति धार्मिकता गनियो।”