प्रेरित 8
8
1त्यस हत्यामा शाऊलको पनि सहमति थियो।
मण्डली सताइएको र तितरबितर पारिएको
त्यसै दिन यरूशलेमका मण्डलीहरूका विरुद्ध ठूलो सतावट र दमन सुरु भयो; यसले गर्दा प्रेरितहरूबाहेक सबै दाजुभाइ-दिदीबहिनीहरू यहूदिया र सामरियाको इलाकामा तितरबितर भए। 2परमेश्वरका जनहरूले स्तिफनसलाई चिहानमा गाडे र उनको मृत्युमा गहिरो शोक मनाए। 3तर शाऊलले भने मण्डलीलाई नष्ट गरिरहेका थिए; तिनले पुरुषहरू र महिलाहरूलाई घर-घरबाट बाहिर घिस्याउँदै ल्याएर तिनीहरूलाई झ्यालखानामा हाल्दथे।
फिलिप सामरियामा
4ती तितरबितर भएर छरिएकाहरू जहाँ-जहाँ पुगे, तिनीहरूले वचन प्रचार गर्दैगए। 5फिलिप सामरियाको एउटा शहरमा पुगे, र त्यहाँ ख्रीष्टको प्रचार गर्न थाले। 6जब भीडले फिलिपको मुखबाट निस्केका वाणीहरू सुने, र उनले गरेका अद्भुतका चिन्हहरू देखे, तब ती सबैले तिनले बोलेका वचनहरूमा निकै ध्यान दिए। 7धेरैबाट अशुद्ध आत्माहरू चिच्याउँदै बाहिर निस्के, र धेरै पक्षघातका रोगीहरू र हिँड्न नसक्नेहरू निको पारिए। 8त्यसरी त्यस शहरमा ठूलो आनन्द छायो।
सिमोन जादुगर
9त्यसै शहरमा केही समयदेखि सिमोन नाउँको मानिसले जादुगरी गरेर सामरियाका सबै मानिसहरूलाई अचम्ममा पारेको थियो; जसले आफूलाई एउटा महान् व्यक्ति भएको दाबी गर्थ्यो। 10साना र ठूला सबैले उसको कुरा ध्यान दिएर सुन्दथे र आश्चर्य प्रकट गर्दै, “यी मानिस परमेश्वरका शक्ति, जसलाई महाशक्ति हो।” भनी मान्दथे। 11तिनीहरू त्यसको पछि लाग्थे, किनकि धेरै समयदेखि तिनीहरूलाई उसले आफ्नो जादुहरूले अचम्म पारेको थियो। 12तर परमेश्वरको राज्यको सुसमाचार र येशू ख्रीष्टको नाउँको बारेमा फिलिपले गरेका प्रचारमा तिनीहरूले जब विश्वास गरे, तब स्त्री-पुरुष सबैले बप्तिस्मा लिए। 13सिमोन आफैले पनि विश्वास गर्यो; र बप्तिस्मा लियो। फिलिप गएका सबै ठाउँमा, ऊ पनि सँगै गयो र आफूले देखेका ठूला अद्भुतका चिन्हहरू र शक्तिशाली कामहरू देखेर छक्क पर्यो।
14जब सामरियाका मानिसहरूले परमेश्वरको वचन ग्रहण गरेका यरूशलेमका प्रेरितहरूले सुने, तब तिनीहरूले पत्रुस र यूहन्नालाई सामरियामा पठाए। 15जब तिनीहरू त्यहाँ आइपुगे, ती नयाँ मानिसहरूका लागि पवित्र आत्मा प्राप्त गर्न सकून् भनेर तिनीहरूले प्रार्थना गरे, 16किनकि तिनीहरू कसैमाथि पनि पवित्र आत्मा अझै आउनुभएको थिएन। प्रभु येशूको नाउँमा तिनीहरूले खाली बप्तिस्मा मात्रै लिएका थिए। 17त्यसैकारण तिनीहरूमाथि पत्रुस र यूहन्नाले आफ्नो हात राखिदिए, अनि तिनीहरूले पवित्र आत्मा प्राप्त गरे।
18प्रेरितहरूले हात राख्दा पवित्र आत्मा पाएको जब सिमोनले देख्यो, उसले तिनीहरूलाई पैसा दिन चाह्यो, 19र भन्यो, “मलाई पनि यस्तै गर्न सक्ने अधिकार दिनुहोस्, जसले गर्दा मैले पनि जसमाथि हात राख्छु, त्यसले पवित्र आत्मा प्राप्त गरोस्।”
20यो सुनेर पत्रुसले जवाफ दिए: “तिमीसँगै तिम्रो धनसम्पत्ति पनि नाश होस्, किनकि धनसम्पत्तिबाट परमेश्वरको वरदान तिमी किन्न सक्छौ भनी तिमीले सोच्यौ! 21यस सेवा कार्यमा तिम्रो सहभागीता वा कुनै हिस्सा छैन; किनकि परमेश्वरको सामु तिम्रो हृदय ठीक छैन। 22यस दुष्ट्याइँका निम्ति पश्चात्ताप गर र प्रभुसँग प्रार्थना गर। तिम्रो हृदयको यस्तो दुष्ट विचार शायद उहाँले क्षमा गरिदिनुहुनेछ। 23किनकि म देख्दैछु, कि तिमी तीतोपनाले भरिपूर्ण छौ र पापका बन्दी भएका छौ।”
24यो सुनेर सिमोनले जवाफ दियो, “मेरा निम्ति प्रभुसँग प्रार्थना गरिदिनुहोस्, जसले गर्दा तपाईंले भन्नुभएका कुनै पनि कुरा ममाथि नआओस्।”
25जब तिनीहरूले प्रभुको वचनको घोषणा गरे, र त्यसको साक्षी दिए, तब पत्रुस र यूहन्ना यरूशलेम फर्के। फर्किएर जाने क्रममा तिनीहरूले सामरियाका धेरै गाउँहरूमा सुसमाचार प्रचार पनि गर्दैगए।
फिलिप र इथियोपियाली
26त्यसपछि प्रभुको एउटा दूतले फिलिपसँग यसो भने, “यरूशलेमबाट गाजातर्फ जाने दक्षिणतिर मरुभूमिको सडकतिर तिमी जाऊ।” 27अनि तिनी त्यतैतिर लागे। बाटोमा तिनले एकजना इथियोपियाली नपुंसकलाई भेटे। ती नपुंसक इथियोपियाली महारानी कन्दाकीको सम्पूर्ण सम्पत्तिको रेखदेख गर्ने महत्त्वपूर्ण उच्च अधिकारी थिए। ती मानिस आराधनाका निम्ति यरूशलेम गएका थिए, 28र घर फर्किदा बाटोमा आफ्नो रथमा बसेर अगमवक्ता यशैयाको पुस्तक पढिरहेका थिए। 29फिलिपलाई पवित्र आत्माले भन्नुभयो, “त्यो रथको नजिक सँगसँगै जाऊ।”
30अनि फिलिप रथतिर दौडिँदै गए, र नजिकै पुगेपछि ती मानिसले यशैया अगमवक्ताको पुस्तक पढेको तिनले सुने। अनि फिलिपले सोधे, “तपाईंले जे पढिरहनुभएको छ, के त्यो बुझ्नुहुन्छ?”
31“जबसम्म यसको व्याख्या कसैले गरिदिँदैन, म कसरी बुझ्नसक्छु?” उनले जवाफ दिए। त्यसैले तिनले फिलिपलाई रथमाथि उक्ले, र आफूसँगै बस्ने आग्रह गरे।
32ती नपुंसक पवित्रशास्त्रको यो अंश पढिरहेका थिए:
“उहाँलाई मारिन लगिएको थुमाझैं लगियो,
जसरी थुमा ऊन कत्रनेको सामु चूप लागेर बस्छ,
त्यसरी नै उहाँले पनि आफ्नो मुख खोल्नुभएन।
33उहाँको अपमानित अवस्थामा उहाँ न्यायबाट वञ्चित हुनुभयो।
उहाँका पुस्ताको कसले वर्णन गर्न सक्छ?
किनकि उहाँको जीवन पृथ्वीबाट हटाइयो।”#8:33 यशै 53:7, 8
34नपुंसकले फिलिपसँग सोधे, “कृपया मलाई भन्नुहोस्, अगमवक्ता कसका बारेमा कुरा गर्दैछन्, आफ्नै बारेमा वा अरू कसैको बारेमा?” 35त्यसपछि फिलिपले पवित्रशास्त्रको त्यही पदबाट सुरु गर्दै येशूको सुसमाचार तिनलाई भने।
36तिनीहरू बाटोमा जाँदाजाँदै, केही पानी भएको ठाउँमा आइपुगे; अनि नपुंसकले भने, “हेर्नुहोस्, यहाँ पानी रहेछ, मेरो बप्तिस्मा किन यहीं गरिदिनुहुन्न?” 37फिलिपले भने, “यदि सारा हृदयले नै विश्वास गर्नुहुन्छ भने तपाईंले बप्तिस्मा लिन सक्नुहुन्छ।” तिनले जवाफ दिए, “येशू ख्रीष्ट नै परमेश्वरका पुत्र हुनुहुन्छ भनी म विश्वास गर्दछु।#8:37 प्राचीन पा.लि.हरूमा यो पद पाइँदैन” 38अनि तिनले रथ रोक्न हुकुम दिए; अनि फिलिप र ती नपुंसक दुवै पानीभित्र पसे, र फिलिपले तिनलाई बप्तिस्मा दिए। 39जब तिनीहरू पानीबाट बाहिर आए, प्रभुको आत्माले फिलिपलाई अकस्मात् लिएर जानुभयो र त्यसपछि नपुंसकले फिलिपलाई फेरि देखेनन्; र तिनी आनन्दित हुँदै आफ्नो बाटो लागे। 40तर फिलिपले आफूलाई अश्दोदमा पाए। अनि त्यहाँबाट कैसरिया नपुगुन्जेलसम्म बाटोमा पर्ने सबै शहरहरूमा सुसमाचार प्रचार गरे।
अहिले सेलेक्ट गरिएको:
प्रेरित 8: NCV
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
पवित्र बाइबल, नेपाली समकालीन संस्करण™
प्रतिलिपि अधिकार © 1998, 2006, 2021 Biblica, Inc.
अनुमतिसहित प्रयोग गरिएको छ। सम्पूर्ण अधिकार विश्वव्यापी रूपमा सुरक्षित रहनेछ।
Nepali Contemporary Version™, New Testament
Copyright © 1998, 2006, 2021 by Biblica, Inc.
Used with permission. All rights reserved worldwide.
