ይዃንስት ወንጌል 1
1
ፈወነ 1
ቃል እጅር ኣቑ
11 ቃልድ በውገ ዊኑ፤ ቃልድም እደረ ጅቅ ዊኑ፤ ቃልድም እደረ ዊኑ። 2ጘጝም በውገ እደረ ጅቅ ዊኑ። 3እጝቅ ዊገድቅ ጝዝ ፋጥርሹ፤ ፋጥርሸው ዊገይስቅ ጝዝ ኣዪጝቀ ፋጥርሸው ውረውረም እጀው። 4ጘጝ ርዅየዙ ችጝሸነ ዊኑ፤ እኒን ርዅየድም እቅዝቅ ኣቐው ብርኻን ዊኑ። 5ብርኻንም ጥመይዝ ኣቭርኸኵ፤ ጥመድም ጝት ኻቒየውም።
6እደረቲስ እፃሸው ጝሽድ ይዃንስ የነው ላው እጅር ዊኑ።#ማቲ. 3፡1፤ ማር. 1፡4፤ ሉቃ. 3፡1-2። 7ጘጝም ጝሚዝርነይዝ እጅር እጝቅ ኣምናንስ ማጥን በርኻኒዝቍዝ ሚዝር ኣጠ ተሩ። 8ብርኻኒዝቍዝ ሚዝር ኣጠ ተሩጚ ጘጝ ጝቕም ብርኻንም ዊኒየው። 9እጝቅ እጅርዝቅ ኣቭኽርኸው እማንተው ብርኻንምድ ኣልሚል ተራ ዊኑ።
10ጘጝም ኣልሚል ዊኑ፤ ኣልምድም ፋጥርሸውድ ጝዝ ኣቓንም እኳ ኣልምድ ግን ጝት ኣርቒየውም። 11ጝቕምትቍ ዊግኒዝጐ ተሩ፤ በገዘ ጝዊግንድ ግን ለምሪየቍም። 12ጝት ለምረቊዝ ጝሽዝም ኣምነቍዝቅ ግን እደረት ቝር ኣጛንስ ማጥን ስልጣን ይዉ። 13ጛይም እደረቲስ እዅርሽጚ እቀ ዚረይስ፣ ዊንም ስየዙ ፍቃዲስ፣ ዊንም ግልው በኒዝም እዅርሺየቍ።
14ቃልድም እጅር ኣቑ፤ ፃገዝመ እማንዝም እቻቕ ይናግል ጩ፤ ጚርስ ላው ጭቝ ኣቐው ዅር፣ ጚርቲስ ፃየው ክቭሪዝጘ ኣቐው ጝክቭርድየንት ቓልኑን።
15ይዃንስም፦ « ‹ይግረይል ተረውድየን ይበውገ ዊነው ኣቓንስቅ ይጊስ ዲቈኵ› የር ክታጭስ ድቈውድ እኒን የጝ» የው ቓፃ ጝማጥን ሚዝርዱ። 16ጝፃገይዙ እቻቕኒስ ይን እጝቅቅ ፃገዝ ዲጊል ፃገ ለምርንኵኑን። 17ኽግ ሙሴትጐትውዝ ነይሽቱ፤ ፃገዝመ እማንዝ ግን እየሱስ ክርስቶስትጐትውዝ ተሩ። 18መቸም እደረት ቓለው ላው እጅር እኳም እጀው፤ ዊገድ ግን ጚር ጅቅ ፅበው ላው ጭቝ ኣቐው ጝዅርድ ኣርቕሱ።
ጣምቀተ ይዃንስ ክርስቶስትቍዝ ሚዝርደጘ
(ማቲ. 3፡1-12፤ ማር. 1፡1-8፤ ሉቃ. 3፡1-18)
19-20ኣይዅዳንድ፦ «ክት ኣው የጝ?» ይጝ ጝት ዋቕርጛንስ ማጥን ካኽነጣኒዝመ ለዊዋኒዝ እየሩሳልየምስ ጝጐ እፃጛንድ ይዃንስ፦ «ያን ክርስቶስም ኣይቀር» የው ጋልፅ ሚዝርዱጚ ሚዝርደነዊስ እግርገም ዪየው። 21ጛይም፦ «እደስለ ክት ኣው የጝ? ይልያስመ?» ይጝ ዋቕር። ጘጝም፦ «ኣይቀርም» ዩ። ጛይም፦ «እደስለ ተርጡ ይሽተው ነቭይድመ?» ይ፤ ጘጝም፦ «ኣይቀርም» የው ዊሱ።#ዘዳ. 18፡15፤18፤ ምል. 4፡5። 22ኻትሸነይዝም፦ «እደስለ ክት ኣው የጝ? ይናት እፃቐቊዝ ዊሰ ይውናንስ ማጥን ክቕምትቍዝ ወረጘ ይራ?» ይ። 23ጘጝም፦ «ነቭይ ይሳያስ ዊግተጘ ያን፦ ‹ኣደረት ጒደነድ ጭቅ ሽጥን› ያ በራኸይስ ቓፀው እጅርዙ ድመ የጝ» ዩ።#እሳ. 40፡3።
24እፃሸቍ ፈሪሳኒስም ላው ላውድ፦ 25«እደስለ ክት ክርስቶስ ኣይረውዝየ፣ ዊንም ይልያስ ኣይረውዝየ፣ ዊንም ተርጡ ይሽተው ነቭይድ ኣይረውዝየ ውር ቃጥ የጝ ጣምቅረውድ?» ይጝ ዋቕር። 26ይዃንስም፦ «ያን ጣምቀውድ ኣቝዝ የጝ፤ ዊገድ ግን ክትን ኣርቓይርነው ክታማኽሊል ችብርኩ። 27ጘጝ ይግረይል ተርጡ፤ ያን ጝፃቢዙ ፃልየድ እኳ እክሰነውዝ ጥውጨርም ኣይቀር» ዩ።
28እን ዊገድቅ ኣቐውድ ይዃንስ ጣምቃ ዊነው ዮርዳኖስት እጂ ቢታንየስ በተራቨስ የጝ።
ኣልሚዙ ኽጥያትድ እክልሰው እደረት ቢገ
29ይዃንስም ጛምርሲዝ እየሱስት ጝጐ ተራንድ ቓል፦ «እንወ ኣልሚዙ ኽጥያትድ እክልሰው እደረት ቢገድ! 30« ‹ይእግረይል ተረውድ ይበውገ ዊነው ኣቓንስቅ ይጊስ ዲቈኵ› የር ክታጭስ ድቈውድ እኒን የጝ። 31ያን ይቕምም ጝት ኣርቐቅም ዊኑን፤ ኣቝዝ ጣምቃ ተጠውድም ጘጝ እስራየልት ኽዝቪዝ ጋልፅሽታንስ ማጥን የጝ» ዩ።
32እንዝ ግረም ይዃንስ እነያ ሚዝርዱ፦ «መንፈስ ቅዱስ እርግቭት ተክ ሲመይስ ጊም ጝዲጊል ጐያንድ ቓሉን። 33ያን ይቕምም ጝት ኣርቐቅም ዊኑን፤ ዊገድ ግን ኣቚዝ ጣምቃንስ ማጥን ይት እፃቐውድየን፦ ‹መንፈስ ቅዱስ ጊም ጝዲጊል ጐያንድ ቓልደው እጅርድ፣ ጘጝ የጝ መንፈስ ቅዱስዝ ጣምቀውድ› የው ይጭስ ድቁ። 34ያንም እኒንት ቓልኩን፤ ኣቓንስቅም ጘጝ እደረት ዅር ኣቐጘ ሚዝርጠኵን» ዩ።
እየሱስት በውጥ ክንደጥድ
35ጛምርሲዝም ይዃንስ ጝሊጘ ክንደጢጅቅ እንደ ገነ ጝግል ችብር ዊኑ። 36እየሱስም ጝግዝ ፃቭ ዲቋንድ ቓል፦ «እንወ እደረት ቢገድ!» ዩ። 37ሊጘ ክንደጥድም ይዃንስ እኒንት ዊግታንድ ወሽጝ እየሱስት ቲክን። 38እየሱስም ብሩ የው ጝት ቲክንጛንድ ቓል፦ «ወረጘ በንርኑ?» የው ዋቕሩ። ጛይም፦ «ረቢ#1፡38 ረቢ፦ ጝትርጕምድ «ክንሰተ» የነት የጝ። ፅብረውድ ኣውል የጝ?» ይጝ ዋቕር። 39ጘጝም፦ «ላቝጥን ቓልጥን» ዩ። እንዝ ማጥን ፊርጝ ጘጝ ፅበውድየንት ቓል፤ ጘጝ ግርየድየንትም ጝጅቅ ግርይ፤ ሰትድም ፅቃ ሰት ኣጠ ኣቕ ዊኑ።
40ይዃንስ ዊግተው ቃልድየንት ወሽጝ እየሱስት ቲክነቊስ ላውድ ስሙን ቢጥሮስትዝን እንድርያስ ዊኑ። 41እንድርያስም በውገ ጝዝን ስሙንትል ፊር፦ «መሲኽድ ችጝንኵኑን» ዩ። «መሲኽ» የነውድ፦ «ክርስቶስ» የነት የጝ። 42እንዝ ግረ እንድርያስ ስሙንት እየሱስ ትጐ ነሱ፤ እየሱስም ስሙንት ትኵር ሸው ቓል፦ «ክት የውነት ዅር ስሙን የጝ፤ ነስየ፦ «ከይፈ» ይሽትር ጭጝሽትር» ዩ፤ ከይፈ የነውድ፦ «ቢጥሮስ»#1፡42 ከይፈ፦ «ከይፈ» የው ኣረማይኪዙ ቃሊዝመ፦ «ቢጥሮስ» የው ግሪኪዙ ቃሊዝ ጝታትርጕምድ፦ «ፃፀ» የነት የጝ። የነት የጝ።
43እየሱስም ጛምርሲዝ ገሊለ ትጐ ፊርጠ በኑ፤ ፊልበውስትም ችጝ፦ «ለው ይት ቲክን!» ዩ። 44ፊልበውስም እንድርያስስመ ቢጥሮስስታጘ በተሰይደ ኻትመይዙ ዊኑ። 45ፊልበውስም ናትናየልት ችጝ፦ «ሙሴ ኽግዙ መፃፍዝ፣ ነቭያታንድም ጝማጥን ፃፍጘው ዮሴፍት ዅር ናዝሪትቱ እየሱስት ችጝንኵኑን» ዩ። 46ናትናየልም፦ «ናዝሪትስ ቀሰው ዊገ ፍጠ ቸልጡመ?» ዩ፤ ፊልበውስም፦ «ለው ተትር ቓል» ዩ። 47እየሱስም ናትናየልት ጝጐ ተራንድ ቓል፦ «እንወ ተኰል እጀው እማንተው እስራየላነ እጅር» ዩ። 48ናትናየልም፦ «ይት ኣወሽር ኣርቕሩ?» ዩ። እየሱስም፦ «ፊልበውስ ገነ ጭጚጝቀ በለስ ዘፊዙ ጅጢል ፅብራ ቓሉን» ዩ። 49ናትናየልም፦ «ክንሰተወ! ክት እደረት ዅር የጝ! ክት እስራየልት ንጕስ የጝ!» ዩ። 50እየሱስም፦ «ኣምንደውድ፦ ‹በለስ ዘፊዙ ጂጢስ ቓሉን› ዩዝመ? ገነ እኒስ ዲቈው ዊገ ቓልትር» ዩ።
51ጛጭስም ዊስ፦ «እማን እማን የኵን! ሲመይ ቢት፣ እደረት መላካንድም እጅር ዅርትል ጊምጛን ፍጛንድ ቓልትርንቅ» ዩ።#ዘፍ. 28፡12።
अहिले सेलेक्ट गरिएको:
ይዃንስት ወንጌል 1: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
