Maatiyoos 4
4
Paari Setan Yeesee Kɛnɔ Gun Ijaag Tikiyɛ
(Mar. 1:12-13; Luk. 4:1-13)
1Saaɓak arirɓa Wɛɛŋa sigɔ Geetitaanakik Yeesee kɛnɔ kɛɛ paatoona, nɛɓa paari sɛɛn setan kɛnɔ gun ijaag tikiyɛ. 2Nɛɓa beeɗ a ki ɗamiit ɛ ki tuu maawu, a wawuyk pɔlpɔlɛ joop pɛɛyk a kaayetun pɔlpɔlɛ joop pɛɛyk, nɛɓa lak ŋaawu. 3Nɛɓa mɛlki setan sinɛɓa paari sɛɛnik son lak Yeeseek nɛ tongeeɗ kɛ, "Ɔkɔnɓɔ iin Tɔɔn Waakoyotoŋk, tonutɔ giɗeeta sineena nɔ mɛɛyɛ a kiiwu."
4Nɛɓa Yeese jumurgeeɗ kɛ, "Taapɛɛɓa Wargatɛɛ Waakoyotoŋk kɛ, 'Ki iɗit beeɗit kiiwe dakɛɗa, ma beeɗ pɛɛnii sinaanɛ tonu Waakoyotuk baŋɛk.'"
5Saadi baŋiya diileɓa setan Yeesee Yorsaleema katamɛya sinaana geetitank, nɛɓa boŋu sɛɛn ajeeranta Gode sinɛ Geetitank, 6nɛ tongeeɗ kɛ, "Ɔkɔnɓɔ iin Tɔɔn Waakoyotoŋk, orartɔ ɛɛk ɗooka. Agut sinɔ taapɛɛɓa Wargatɛɛ Waakoyotoŋk kɛ,
'Tonukoy Waakoyot wosɛytaanaka gɛɛnak,
kɛnɔnu koorɛr kɛ ɗɔm.
Tawɛr kɔɔnu arnɛ gɛŋk,
kɛnɔ kat dertɛ deran nookɛ giɗeet.'"
7Nɛɓa Yeese jumurgeeɗ kɛ, "Taapɛɛɓa Wargatɛɛ Waakoyotoŋk kɛ, 'Kat paarin Waakoyo Suumi nook.'"
8Nɛɓa setan boŋu Yeesee kɛkar kurkuma sinɔɔna jeeɗoŋɔŋk raŋana nɛ yaaŋgeeɗ maŋgistiyɛ ɗookoŋk baŋɛ a eemɛyɔɔnak gɛŋk. 9Nɛ tongeeɗ kɛ, "Ɔkɔn ɛtin korontunɛ nɔta ugumunŋ, gaɓaa kɔna ola sigi baŋɛ."
10Nɛɓa tongeeɗ Yeese kɛ, "Iin setan, widarte ɛɛk sɔ! Agut sinɔ taapɛɛɓa Wargatɛɛ Waakoyotoŋk kɛ,
'Ugumu Suumiya nooka Waakoyota,
ijaaga sɛɛna dakɛɗa.'"
11Nɛɓa setan ŋɔr Yeesee nɛ ŋaarŋ, nɛɓa mɛlɛrki wosɛytaanak Waakoyotoŋk nɛ kɔnyɛr sɛɛniŋ.
Tuke Yeese Ijaag Nɛɛk
(Mar. 1:14-15; Luk. 4:14-15)
12Saaɓa Yeese tiyɛɛɗ korkoɗɔn Yowanisik, nɛɓa weeri Gɛlilaaka. 13Nɛɓa ŋɔr katamɛ Naajireetik, nɛ beeɗi katamɛɛ Kipirnahoomuk sinaanɛ laŋɛɛ goroo sinaanɛ obiik Gɛlilaak kɛntɛɛk sinɛ ikomu Jabiloon a Niptaleemuk. 14Nɔ ɓɛɛlɛɛɗ sinik dusanɛɛ sinɛɓa tonɛɛ ete pɛrkaakoŋk Isaayase kɛ,
15"Iin ɗoo Jabiloonuk, a ɗoo Niptaleemuk,
sinɛ ar gopɛ sinɔɔnɛ ar ɗeesɔ goroo Yordanoosuk kɛntɛɛk,
ɗoo joop Gɛlilaak sigɔ moko Ayuuduk.
16Joop gɛɛŋk sigɛ beeɗir nyuugurk tikiyɛɛkoŋkuk
dɛnɛr pɛɗɛrka sinɔ obiiŋɔŋk.
Tipeyɗi pɛɗɛrka
joopa sigaaga beeɗir nyuugur retoŋkuk sinaanɛkoy nɔkoy nɔkoyk."
17A tukiɗi saaɓak rɔɔriyaaɓa Yeese kɛ, "In weeriikɛɛ tikiyɛɛkɛ Waakoyota agut sinɔ burɛ dariyoŋk wɔɔŋkuŋ."
Riyir Yeese Nomtaanak Gɛɛŋk
(Mar. 1:16-20; Luk. 5:1-11)
18Saaɓa Yeese ɗoyiiɗ sinɔɔnɛ gɔrɔ sinɔ obiiŋɔŋk Gɛlilaak jɔkoŋk, nɛɓa dɛnɛɛr masiikeenak a pɛɛy. Sɛɛg Simion sinɛɓa riyɛ kɛ Petrosuk, a manya Indiriyaas. Nɛɓa o'ortar any nɛŋk kondiyeetoŋk gɔrɔwa, agut sinɔɓa sɛɛg joop sigɔ kondidiŋɔŋkuk. 19Nɛɓa tonu sɛɛga kɛ, "In kusɛɛ nɔte nomkɛɛ. Arakɔɔ kɔnu a ɗɔkarkɔɔ joop son lak Waakoyok oko sinɛ kondiyerɗɔ oltiirk." 20Nɛɓa sɛɛk sisa ŋɔɗar any nɛŋk kondiyeetoŋk nɛ nomɛrɗi sɛɛn.
21Nɛɓa saadi kaalɛ a balaaŋ, nɛ dɛnɛɛr masiikeenak ɔgɔ a pɛɛy sɛɛg tɔɔmɔk Jɛbdiyoosuk Yaykoob a Yowanis. Atuɓa sɛɛk emɗ tak sɛɛg a ɛpɛn nɛŋk Jɛbdiyoos a isisisar any nɛŋk kondiyeetoŋk. Nɛɓa ɓɔrɛ Yeese riyiri sɛɛgiŋ. 22Nɛɓa sɛɛk sisa ŋɔɗark emɗ nɛɛk a ɛpɛn nɛŋk, nɛ nomɛrɗi sɛɛn.
Rɔɔriy Yeese Joop Ɛ Ebɔdɛ Gortaanak
(Luk. 6:17-20)
23Weeweriiɓa Yeese sinɔɔnɛ Gɛlilaak baŋɛ, a rɔririyi sinɔɔnɛ godeyi gɛŋk tolɛɛɗoŋk Ayuuduk, a waawas Pɛɛni sinɔ Ɓɛlkɛɛstank agut burɛ Waakoyotoŋkuk, a ebɔdɛ joop sigɛ ɓɔɔkaak sigɛɓa sɛɛg gaamur goriɗak sigɔ ɓɛɛlɛr kundiyaakɛk. 24Nɛɓa tiyɛɛ ɔɔtɛ Yeeseek sinɔɔnɛ ɗoo Sooriyaak baŋɛ. Nɛɓa ɗɔkarki joop gɛɛnɛ joop sigɔɓa rakatɛr goriɗakɛ, a meetanakɛ sigɔɔgɛ ɓɛɛlɛr kundiyaakɛk, lakɛɓa gortaanakɛ gɛɛnɛ kɔɔr sigɔɓa sɛɛg gaamur wɛɛŋa sigɔ somkaanakik, ɛɓa lakɛ sigɔ latu setakɔɔk, ɛɓa lakɛ nyɔŋtaanak. Nɛɓa sɛɛg ebɔdɛ Yeese baŋɛ. 25Nomɛrɓa Yeeseye joop a ɓɔɔkaaŋ sigɔɓa kurak Gɛlilaake, a Katamɛɛkɛ sigɔɔgɛ Aarink, a Yorsaleeme, a Yuudaake, a ɗeesɔ gɔrɔ Yordanoosuk.
अहिले सेलेक्ट गरिएको:
Maatiyoos 4: KSTM
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
