Luke 7

Sa Pammatin Ni Ḵapitan

(Mat. 8:5-13)

1Nagangput ḵad nantuttudu'ḵ Jesus atta tagu, ummoy ad Capernaum. 2Inninggaw sidi kapitan da suḻdadu we iRome. Inninggaw os sammilunae pipiona, nasaḵit ḵad mamattoy. 3Dingngoḻ ḵad ni kapitan mipanggob atta ḵingwan Jesus, nambuun atta udume pallakayon da Judyu ta ayaganda'ḵ Jesus ta umoyna ḵaanon saḵit ni sammiluna. 4Ummoy da pallakayon woḵ ḵanandae nandagdagu ḵan siya, “Labbongnae badangam oḵyan kapitan, 5te ay-ayatona ditaḵu we Judyu ya siya nampaḵwa'tte sinagogani.” 6Iyyunud ḵad Jesus, nibuḻun ḵan dida.

Madam-anda ḵad atte boḻoy, imbuun ni kapitan da buḻbuḻunna ta umoyda ibaga ḵan Jesus da imbagana woḵ ḵananda, “Apu, adiḵa umali'tte boḻoyḵu ta adiḵa mataḵtaḵ. Gapu'tte ḵinapatognu naippun labbongḵu we ammangili ḵan siḵa'tte boḻoyni. 7Pun sadi gapun ni ippun labbongḵu we umoy angabot ḵan siḵa. Igammuḵe taḵon ay nu adiḵa umoy si boḻoyḵu ya abuse ibilinnu, ḵumosdoḻ sammiluḵ. 8Te taḵon ay saḵon, awad de nangatngatu ḵaḻabbonganae angipangat ḵan saḵon ya awad os da suḻdadu we ipangataḵ. Ḵad nu ḵanaḵ si osa, ‘Inḵa,’ umoy, ya nu ḵanaḵ os si osa, ‘Awwaynu,’ umali. Ḵad nu ḵanaḵ atte sammiluḵ, ‘Ḵoom anna,’ ḵoona.”

9Dingngoḻ ḵad Jesus da imbagana, nataag woḵ ḵanana'tta nibuḻun ḵan siya, “Annaya ibagaḵ ḵan diḵayu, naippun paat indasaḵ aḵ tagu'ḵ ampigsapigsa pammatina'd Israel aḵ isun ni pammatin ni annae tagu.” 10Pun nipauli da imbuun ni kapitan. Dummatongda ḵad, innilada sammilu we ḵummosdoḻ.

Sa Abeng Ni Baḻu

11Unipun, ummoy aḵ Jesus si ili'd Nain woḵ nibuḻun da disipuluna ya da amode tagu ḵan siya. 12Anna ḵade sumaaḻda'tte pudayan ni ili, inabotda da adu we tagu we umoy allibon. Sa natoy, babaḻu we abus aḵ abeng ni baḻu. 13Aḵ Jesus ḵad si innilana baḻu, amod de daguna woḵ ḵanana ḵan siya, “Agaynu we umibil.” 14Nangwa ḵad, ummoyna innonnan lungun ta guminoḵdae anaddaḻan woḵ ḵanana'tte natoy, “Babaḻu bumangonḵa!” 15Pun sa sadi ye natoy, natanuḵdu woḵ gumminga. Ḵanan Jesus atte inana, “Anna abengnu.”

16Pun naḵimtan da losane tagu woḵ indaydayawda bos aḵ Apudyus. Ḵananda, “Atopay! Sa annae profeta we ummali ḵan ditaḵu, amod pagay ḵabooḻana!” Ḵanan os da udum, “Ummali'ḵ Apudyus ta badangana ditaḵu we taguna!” 17Unipun, nandinongoḻ ugud mipanggob atta ḵingwan Jesus atte probinsiya'd Judea ya da losane nampaliḵwose ili.

Sa Imbagan Jesus Atta Disipulun John We Ambobonyag

(Mat. 11:2-19)

18Pune sadi, ummoy da disipulun John we Ambobonyag imbaga da mipanggob atta losane ḵingwan Jesus. Pun ummayag aḵ John aḵ duwa'tta disipuluna, 19woḵ imbuunna dida ḵan Jesus ta ḵanandae an-imus, “Siḵa ḵamman inkarin Apudyus we umali baḵon nu awad udum aḵ uwayonni?”

20Dummatongda ḵad si igaw Jesus, ḵananda, “Imbuun diḵani ḵan John we Ambobonyag ḵan siḵa'ḵ an-imus nu siḵa inkarin Apudyus we umali baḵon nu awad osa'ḵ mauway.”

21Sa dummaḵnganda, ḵinaan Jesus da saḵit da adu we tagu, ḵad pinaḻyawna bos da aḻan atta naaḻanan. Ḵinaanna bos ḵuḻap da naḵuḻap, 22woḵ ḵanana'tta imbuun John, “Mipauli ḵayu ḵan John ta inḵayu ibaga ḵan siya da innilayu ḵan dingngoḻyu, we da naḵuḻap, maḵailada, da napilay, maḵataddaḻanda, da naleprosy, naḵaan saḵitda, da natuḻong, naḵadongoḻda, da natoy, nataguda ḵasin ḵad sa Ambaḻu we Damag miwaḻagawag atta ḵapus.#7:22 Isaiah 35:5-6; 61:1. 23Ḵad pian tagu we adipun anduwaduwa si mipanggob ḵan saḵon.”

24Ḵesan ḵad da imbuun John, imbagan Jesus mipanggob ḵan siya'tta amode tagu sidi. Ḵanana, “Ngai ummoyyu innila si bumbummaaw? Sa potawe mibibbibbid? Naid. 25Ngai pagay lasunyu we ummoy? Ummoyyu ḵamman innila tagu we nansilup atte ampatoge silup? Naid! Te da angisilup atta ambaḻubaḻu babaḵnangda ya da boḻoy da ari inggawanda. 26Pun ngai ummoyyu innila nu? Osa ḵammane profeta? On, annaya ibagaḵ ḵan diḵayu, daldallu nu sa profeta. 27Te aḵ John nibaga si nigili ye Ugud Apudyus we ḵanana,

“ ‘Dongngonyu! Awad de ibuunḵu we umun-una nu siḵa

ta umoyna isagana daḻane ayom.’#7:27 Malachi 3:1.

28Annaya ibagaḵ ḵan diḵayu, losan atta nibuḵnag naippun nangatngatu nu aḵ John sina'd luta yaḵon sa ḵamḵama'tte ampangatan Apudyus, nangatngatu nu siya.”

29Da inninggaw sidi ye tagu ya da andadagup atta bugis, binonyagan John losan dida. Dingngoḻda ḵad da imbagan Jesus we mipanggob ḵan siya ḵananda, “Naun-unan pagay aḵ Apudyus!” 30Yaḵon da Pharisee ya da nalainge mimistulun ni lintog, indiyanda panggob Apudyus ḵan dida woḵ adidapun nampabonyag ḵan John.

31Pinagatupan os Jesus woḵ ḵanana, “Ngai angipaniyaḵ atta tagu sinsana? Isudan abenge an-ay-ayam atta pappawayan. Ḵad ḵanandae nangiyip-ipḵaw atta asin-abbengda,

32“ ‘Nanadoḵ ḵani,

yaḵon adiḵayupun nanangni.

Pun nanḵanḵanta ḵani'tta ampasuḻsuḻdunge ḵanḵanta'tta bagungon,

yaḵon adiḵayupun os naḵadomdom.’

33Dida da mipaniyan da tagu sinsana te ummali ḵad aḵ John we Ambobonyag we dam-on allaun ya adipun os uminum aḵ bayas, ḵananyu, ‘Ngaipana ḵoon ḵaḵnat? Naaḻanan!’ 34Ḵan saḵone Abeng Di Tagu, ummaliyaḵ ḵade maḵainum ya maḵaḵan, ḵananyu, ‘Ilanyu, siya ḵad bartekero ya botaḵan! Maḵabuḻbuḻun atta andadagup atta bugis ya da udume ḵabasbassuḻan!’ 35Ilanyu ḵad, nipailae ustu laing Apudyus atta biyag da losane angunud atta ḵinalaing Apudyus.”

Sa Namakawanan Jesus Si Ḵabasbassuḻane Bubai

36Pune sadi, inninggaw Pharisee ye inayagana'ḵ Jesus aḵ angan. Pun ummoy aḵ Jesus si boḻoyda woḵ naḵatuḵdu ḵan dida. 37Sa sadi ye ili inninggaw os bubai ye ḵabasbassuḻan. Dingngoḻna ḵade awad aḵ Jesus atte boḻoy ni Pharisee ye maḵaḵan, ummoy woḵ innaḻana bangbanglu we naigga si ban-oge angange alabaster. 38Nillumnoḵ ḵad, summiḵad si daḻnig Jesus woḵ ummibil. Nantottodtod luwana inggana'ḵ nas-ob suḵin Jesus. Pun pinunasana'tte buuḵna ḵan inogoḵana bos suḵina woḵ inisigna sadi ye bangbanglu si suḵin Jesus. 39Innilan ḵad ni Pharisee ye nangayag ḵan Jesus da ḵingwan ni bubai, ḵanana'tte somsomoḵna, “Nu tuttuwae profeta annae tagu, igammuna oḵyan ain ḵinatatagun ni annae bubai ye angap-appus ḵan siya! Ḵabasbassuḻan!”

40Ḵanan Jesus, “Simon, anna ibagaḵ ḵan siḵa.”

Ḵanan Simon, “Ngai sanat Mistulu?”

41Pune sadi, ḵanan Jesus we nan-ug-uggud, “Inninggaw tagu we nampagawat aḵ pilaḵ atta duwae tagu, sa osa, limanggasute palata ya limampuḻu we palata'tte osa. 42Gapu ta adidapun maḵabayad, niwawanna da utangda. Pun dinu'tta duwa daḵdaḵoḻ ayatna'tte nampagawat?”

43Ḵanan Simon, “Sa adu nin utangna ya ippun ogon.”

Ḵanan Jesus, “On, tuttuwa sanate imbagam!” 44Nansinagung atte bubai woḵ ḵanana ḵan Simon, “Ilam ḵad annae bubai! Taḵon ay nu ḵoḵoḵḵon taḵu lumnoḵ ḵad ay mangili si boḻoy ya itton taḵu danume amaḻbaḻna si suḵina, naippun nangitod aḵ danum ḵan saḵon sina. Yaḵon sa anna ḵad, binaḻbaḻana suḵiḵ atte luwana woḵ pinunasana'tte buuḵna. 45Adimpun os inogoḵan saḵon atte nan-abotanta. Yaḵon siya ḵad, inogoogoḵana suḵiḵ atte inggan ni dummaḵngaḵ. 46Adimpun os inappusan ḵidayḵu'tte bangbanglu. Yaḵon siya ḵad, inisigna bangbanglu'tta suḵiḵ. 47Pun annaya ibagaḵ ḵan diḵayu, gapu'tta ḵingwana ḵan saḵon, mipailae amod de ayatna ḵad napakawan da adu we basuḻna. Yaḵon sa tagu we aḵit basuḻnae napakawan, aḵit os ayatna.”

48Ḵanan Jesus atte bubai, “Napakawan da basuḻnu.”

49Da udum ḵade naḵaḵan, ḵananda'tte sin-ossaossa ḵan dida, “Ngai annae tagu? Sa somsomoḵna ḵamman, pakawanona da basuḻ?”

50Ḵanan Jesus atte bubai, “Sa pammatim gapun ni mataguwam. Inḵan lumin-awa somsomoḵnu!”

अहिले सेलेक्ट गरिएको:

Luke 7: kml

हाइलाइट

शेयर गर्नुहोस्

कपी गर्नुहोस्