Luke 3
3
Sa Tuttudun John We Ambobonyag
(Mat. 3:1-12; Mrk. 1:1-8; Jhn. 1:19-28)
1Sa miḵasawaḻ aḵ limae tawon atte nampangatan Emperor Tiberius, aḵ Pontius Pilate Gobernor atte probinsiya'd Judea. Aḵ Herod os Gobernor atte probinsiya'd Galilee ya aḵ Philip we sunudna, nampangat atta Iturea ya ad Trachonitis. Ḵad aḵ Lysanias nampangat ad Abilene. 2Ḵad da Annas ḵan Caiaphas ḵangatuwane padin da Judyu. Sa inninggawan John we abeng Zechariah atte bumbummaaw, inninggaw impaigammun Apudyus ḵan siya. 3Pune sadi, ummoy John iwwaḻagawag atte nandomange taḻantag ni tawwang Jordan. Ḵanana, “Ibabawiyu da basuḻyu ya agayyu we angwa ya ampabonyag ḵayu ta pakawanon Apudyus diḵayu.” 4Aḵ John ḵad, siya inggilin Profeta Isaiah we ḵanana,
“Sa bumbummaaw, awad de angibagbagae ḵanana,
‘Saganaonyu oḵyan daḻan atte umaliyan Apu
ya pagodongonyu daḻane ayona.
5Sana da ḵoonyu. Panadonyu oḵyan da beleg ya da tagudtud,
piluganyu da dummallug ta tumanap,
pagodongonyu da nampiḵḵupiḵḵu,
ya panadonyu da ateḵḵeteḵḵe.
6Ta ilanda losane tagu anaguwan Apudyus.’ ”#3:4-6 Isaiah 40:3-5.
7Pune sadi, ummoy da amode tagu nampabonyag ḵan siya. Ḵanana ḵan dida, “Diḵayu we ganaḵ ni uḻog! Nankamali somsomoḵyu we nangibagae lamogyu iligsi da long-agyu'tte madusaanyu ḵan Apudyus nu pabonyag ḵayu. 8Adipun paat maḵwa te ḵasapuḻane ḵoonyu da losan ta ipailayu we tuttuwae imbabawiyu da basuḻyu ya iyyagayyu we nangwa. Ḵad adiyu pay maag ḵanane miligsi ḵayu te aḵ Abraham daḵdaḵoḻyu. Annaya ibagaḵ ḵan diḵayu te aḵ Apudyus maḵwae ambalinona da annae batu'ḵ ganaḵ Abraham! 9Sa mipaniyan ni dusayu, isun ni wasaye misaganae ampoḵpoḵ atta ḵayu ya da adipun ambaḻu bungada, mapoḵpoḵda ya niballuda'tte apuy.”
10Gapu'tte sadi, amod da tagu we ḵanandae nangim-imus, “Ḵad umpay, ngai ḵoonni?”
11Ḵanana, “Ngaimane duwa silupna, ittona oḵyan osa'tte ippun silupna. Ḵad sa ansawaḻ aḵ maḵan, angitod oḵyan atta ippun ḵanonda.”
12Inninggaw os da andadagup atta bugise ummoy nampabonyag ḵan siya woḵ ḵananda, “Mistulu, ngai ḵoonni?”
13Ḵanana ḵan dida, “Adiyu tuḻ-ayane ansingir.”
14Inninggaw os da suḻdadu we ummoy nan-imus ḵan siya woḵ ḵananda, “Diḵani ḵad, ngai ḵoonni?”
Ḵanana ḵan dida, “Adiyu ḵoḻḵogon baḵon nu pabasuḻon da ngaimane tagu ta aḻanyu da pilaḵda ḵad mat-op ḵayu oḵyan os atta tangdanyu.”
15Gapu'tta sadi ye intuttudun John, ḵanan ni awad atta somsomoḵ da tagu, “Siya nin namnamaon taḵu? Siya nin Kristu?”
16Ḵanan John ḵan dida, “Bonyagaḵ diḵayu si danum. Yaḵon sa umali ye nangatngatu nu saḵon, bonyagana diḵayu si Ispiritu Santu ḵan apuy.#3:16 Bonyagana diḵayu si apuy: Sa piona ḵanan, dusaon Apudyus da tagu we adipun ambabawi'tta basuḻda ya ansinagungda ḵan Apudyus. Sa osae piona ḵanan, pappadason Apudyus da taguna si ampaḵaḻamane isun di masgob ta pumoḻḵasda. Gapu si ḵinangatuna, naippun labbongḵu we anguḵas si sandalna. 17Naḵasaganae anguwis atta tagu ḵad mipani anḵuḵuwisna'tte tagu we naḵasaganae antopa si de wheat. Sa bogas ni de wheat, dagupona ya igappotna'tte aḻangna. Yaḵon sa losane dugi, aminona aḻan ya soggona'tte apuye adipun masobsoban.” 18Ḵaḵna intuttudun John ya indogana bos da udum atte nangibag-ana ḵan dida'tte Ambaḻu we Damag.
19Dam-on os John sinuppaḵan aḵ Gobernor Herod gapu'tte ḵingwanae inasawana'ḵ Herodias we asawan ni sunudna ya da losane ḵingwana. 20Pune sadi, ḵingwan Herod de sillumaweng te impaibaḻudna'ḵ John.
Sa Nabonyagan Jesus
(Mat. 3:13-17; Mrk. 1:9-11)
21Sa daan John mibaḻudan, sissiyae inninggaw da adu we tagu we binonyagana. Sin-aḻgawan ḵad, binonyagana bos aḵ Jesus. Pune sadi, nalluwaḻu ḵad aḵ Jesus, nabuḵtan ad langit. 22Pun dummoḻa Ispiritu Santu we isunan kalapati woḵ nansap-oy ḵan siya. Ḵanan ni gingae naḻpu'd langit, “Siḵa Abengḵu we ay-ayatoḵ ya masmas-omaḵ ḵan siḵa.”
Sa Listaan Da Danaḵḵoḻ Jesu Kristu
(Mat. 1:1-17)
23Sana nangisaḻdan Jesus we nantuttudu'tte batug di tuḻumpuḻu tawonna.
Ḵad sa ḵasomsomḵan da tagu, siya abeng Joseph. Aḵ Joseph, siya abeng Heli.
24Aḵ Heli, abeng Matthat. Aḵ Matthat, siya abeng Levi ye abeng Melchi. Aḵ Melchi, siya abeng Jannai we abeng Joseph.
25Aḵ Joseph, abeng Mattathias we abeng Amos. Aḵ Amos, abeng Nahum we abeng Esli. Aḵ Esli, abeng Naggai.
26Aḵ Naggai, abeng Maath. Aḵ Maath, abeng Mattathias we abeng Semein. Aḵ Semein, abeng Josech we abeng Joda.
27Aḵ Joda, abeng Joanan we abeng Rhesa. Aḵ Rhesa, abeng Zerubbabel we abeng Shealtiel. Aḵ Shealtiel, abeng Neri ye abeng Melchi.
28Aḵ Melchi, abeng Addi ye abeng Cosam. Aḵ Cosam, abeng Elmadam we abeng Er.
29Aḵ Er, abeng Joshua we abeng Eliezer. Aḵ Eliezer, abeng Jorim we abeng Matthat. Aḵ Matthat, abeng Levi.
30Aḵ Levi, abeng Simeon. Aḵ Simeon, abeng Judah we abeng Joseph. Aḵ Joseph, abeng Jonam we abeng Eliakim.
31Aḵ Eliakim, abeng Melea we abeng Menna. Aḵ Menna, abeng Mattatha we abeng Nathan. Aḵ Nathan, abeng Ari David.
32Aḵ David, abeng Jesse. Aḵ Jesse, abeng Obed we abeng Boaz. Aḵ Boaz, abeng Salmon we abeng Nahshon.
33Aḵ Nahshon, abeng Amminadab we abeng Admin. Aḵ Admin, abeng Arni ye abeng Hezron. Aḵ Hezron, abeng Perez, we abeng Judah.
34Aḵ Judah, abeng Jacob. Aḵ Jacob, abeng Isaac we abeng Abraham. Aḵ Abraham, abeng Terah we abeng Nahor.
35Aḵ Nahor, abeng Serug we abeng Reu. Aḵ Reu, abeng Peleg we abeng Eber. Aḵ Eber, abeng Shelah.
36Aḵ Shelah, abeng Cainan. Aḵ Cainan, abeng Arphaxad we abeng Shem. Aḵ Shem, abeng Noah we abeng Lamech.
37Aḵ Lamech, abeng Methuselah we abeng Enoch. Aḵ Enoch, abeng Jared we abeng Mahalaleel. Aḵ Mahalaleel, abeng Cainan.
38Aḵ Cainan, abeng Enos. Aḵ Enos, abeng Seth we abeng Adam we ḵingwan Apudyus.
अहिले सेलेक्ट गरिएको:
Luke 3: kml
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2019 Translators Association of the Philippines (TAP), All rights reserved.
