متى 8

سِيذِيثْنغ عِيْسَى يسْݣنْفَا يج ؤُمهْڒُوْش يهْڒش س جْذَام

1وَامِي د يهْوَا عِيْسَى زݣ وذْرَار نِّي ذْفَارن-ث اَطَّاس ن ڒْغَاشِي. 2ئِقَارّب-د غَارس يِجّن ذَايس جْذَام، ئِسجّذ-اَس ينَّا-ٱس: "آ سِيذِي، شك مڒَا ثخْسذ ثْزمَّرذ اَذَايِي ثسِّيصْفِيذ."

3ئِسرْس خَاس عِيْسَى فُوْس نّس يحَاذَا-ث ينَّا-ٱس: "وَاه نش خْسغ، شك قَا ثْݣنْفِيذ." صَافِي ذݣ ومْشَان يݣنْفَا ومهْڒُوْش نِّي زِي جْذَام نّس. 4ينَّا-ٱس عِيْسَى: "خْزَر، وَار تْخبَّر حَدّ." ينَّا-ٱس: "رُوْح غَار ڒفْقي سظْهَار-اَس يخف نّش. اݣّ صّذْقث نِّي إِي زِي يوصَّا مُوْسَى حمَا اَغَارْسن ثِيڒِي شْهَاذث خ مِين يوقْعن."

لْإِيمَان ن يِجّن ن وعَسْكَارِي ذ اَمقّْرَان ن اَرُّوْمَانُوْس

5وَامِي يُوْذف عِيْسَى غَار وبِيلَاج ن كَفرْنَاحُوْم، يُوْسَا-د غَارس يجّن ن وعَسْكَارِي ذ اَمقّْرَان ن اَرُّوْمَانُوْس. ئِطَالب-يث 6ينَّا-ٱس: "آ سِيذِي، أَقَا غَارِي اَخدَّام ينُو ذ اَنشْرُوْف ذِي ثدَّارْث يتْنزْبَر اَطَّاس ذِي ثَاسُّوْث."

7ينَّا-ٱس عِيْسَى: "أَذ رَاحغ اَث سْݣنْفِيغ."

8ئِنْدق-د وعَسْكَارِي نِّي اَمقّْرَان ينَّا-ٱس: "لَّا آ سِيذِي، نش وَار سْذِيهِيدْجغ شَا اَذ تَاذْفذ غَار ثدَّارْث ينُو. إِنِي غِير يجّن ن وَاوَاڒ أُو صَافِي اَتَاف اَذ يݣنْفَا وخدَّام ينُو. 9ؤُڒَا ذ نش س يِيخف ينُو غَارِي يِنِّي خَافِي يحكّْمن. غَارِي ڒْعَسْكَار خ وفُوْس ينُو حكّْمغ خَاسن. أَذ ينِيغ إِ يِجّن: رُوْح، أَذ يرَاح. أَذ ينِيغ إِ يِجّن: أَرَاح-د، أَذ د يَاس. أَذ ينِيغ إِ وخدَّام ينُو: اݣّ ثَا، أَت يݣّ."

10وَامِي يسْڒَا عِيْسَى إِ مَانَاينِّي يتْعجّب اَطَّاس. ينَّا-ٱسن إِ يِنِّي ث يذْفَارن: "أَقَا تسْڒَام ڒْحَقّ: يِنِّي يدْجَان زِي أَيث-إِسْرَائِيل وَار ذَايْسن ؤُفِيغ بُو لْإِيمَان يمْغَر اَطَّاس اَم وَانِيتَا! 11أَقَا قَّارغ-اَوم: أَذ د اَسن اَطَّاس ن يِوْذَان زِي شَّرْق ذ ڒْغَرْب اَذ قِّيمن اَك بْرَاهِيم ذ إِسْحَاق ذ يَعْقُوْب غَار مِيسَّا ذِي ڒْمُلْك وجنَّا. 12وَلَكِن يِنِّي تُوْغَا يتْخصَّا اَذ وَرْثن ڒْمُلْك ن أَربِّـي، أَتَاف اَذ منْضَارن غَار بَارَّا ذِي ثَادْجسْت مَانِي غَا يڒِين يمطَّاون ذ وغࢲَّاࢲ ن ثغْمَاس."

13ينَّا-ٱس عِيْسَى إِ وعَسْكَارِي نِّي: "رُوْح! أَغَارش يِيڒِي اَنشْت مِين ثُوْمْنذ." ڒخْدّنِّي يݣنْفَا وخدَّام نِّي.

سِيذِيثْنغ عِيْسَى يسْݣنْفَا ثَذݣّْوَاڒْث ن بُطْرُس

14وَامِي يُوْذف عِيْسَى غَار ثدَّارْث ن بُطْرُس، يُوْفَا ثَذݣّْوَاڒْث ن بُطْرُس ذِي ثَاسُّوْث ذَايس ثِمسِّي. 15غِير يحَاذَا-ت س وفُوْس ثْرُوْح خَاس ثْمسِّي، ثكَّر ثبْذَا تْسخَّار خَاس.

16وَامِي ثغْڒِي ثْفُوْشْت غَار ثْمدِّيث، ؤُوِين-د غَار عِيْسَى اَطَّاس ن يِنِّي ذِي دْجَان جْنُوْن. س لْأَمَر نّس يسُوْفُوْغ زَّايْسن جْنُوْن يسْݣنْفَا مَارَّا يِنِّي يهڒْشن. 17مَانَاينِّي حمَا اَذ يكمّڒ وَاوَاڒ إِي ينَّا سِيذِي أَربِّـي إِ نَّبي إِشَعْيَا ذݣ يِجّن ن زْمَان: "ئِيْسِي خَانغ ڒحْرِيقَاث نّغ، يَرْبُو ڒهْڒَاشَاث نّغ."#8‏.17 خْزَر إِشَعْيَا 53‏:4.

يِنِّي يذفَّارن سِيذِيثْنغ عِيْسَى

18وَامِي يࢲْرَا عِيْسَى اَطَّاس ن يِوْذَان إِي ذَاس د ينّْضن، يكَّر يُوْمَر يمحْضَارن نّس ينَّا-ٱسن: يَالَّاه أَ نࢲْوَام غَار وجمَّاض-ين.

19ئِقَارّب-د غَارس يجّن ن ومْسڒْمَاذ ن شَّرِيعَا ينَّا-ٱس: "آ لْمُعَلِّيم، نش اَش ذْفَارغ مَانِي مَا ثْرُوْحذ."

20ينَّا-ٱس عِيْسَى: "ؤُشَّانن غَارْسن يفْرَان نْسن، ئِجْضَاض غَارْسن ڒَعْوَاش نْسن، وَلَكِن مِّيس ن بْنَاذم وَار غَارس ؤُڒَا ذ مَانِي غَا يسُوْمّث اَزدْجِيف نّس."

21عَاوذ ينَّا-ٱس يج ومحْضَار نّس: "آ سِيذِي، سَمح-اَيِي ذ اَمزْوَارُو اَذ رَاحغ اَذ نضْڒغ بَابَا."

22ينَّا-ٱس عِيْسَى: "ذْفَار-اَيِي-د." ينَّا-ٱس: "يِنِّي يمُّوْثن اجّ-يثن اَذ نضْڒن يمْتِّينن نْسن."

سِيذِيثْنغ عِيْسَى يهدّن ڒبْحَر

23ئِنْيَا عِيْسَى ذِي ثْغَرَّابُوْت، ذْفَارن-ث يمحْضَارن نّس. 24بْڒَا ڒخْبَر، ثكَّر-د يجّن ن لْعَاصِفَا ثجْهذ اَطَّاس ذِي ڒبْحَر ثبْذَا ثْغَرَّابُوْت تْعمَّر س وَامَان. عِيْسَى نتَّا تُوْغَاث يطّص. 25قَارّْبن غَارس يمحْضَارن، سْفَاقن-ث نَّان-اَس: "آ سِيذِي، نْجَّا-يَانغ اَقَا نشِّين نتْمتَّا!"

26ينَّا-ٱسن عِيْسَى: "مَايمِّي تݣّْوْذم قَاع اَمُّو؟ لْإِيمَان نْوم ذ ؤُقْلِيل." ڒخْدّنِّي يكَّر يسْبدّ اَرِّيح ذ ڒمْوَاج، يَرْسَا ڒْحَاڒ. 27قِّيمن يرْيَازن نِّي تْعجّْبن ذَايس نَّان: "مِين يعْنَا وَانِيتَان؟ ؤُڒَا ذ اَرِّيح ذ ڒبْحَر تْطَاعَان-اَس؟"

ثْنَاين ذَايْسن جْنُوْن ذِي ثْمُوْرْث ن يجَرِيثِيْين

28وَامِي يُوْوض عِيْسَى غَار وجمَّاض-ين ن ڒبْحَر غَار ثْمُوْرْث ن يجَرِيثِيْين، ڒْقَان-ث-يذ ثْنَاين ن يِوْذَان ذَايْسن جْنُوْن فّْغن-د زݣ يمضْڒَان مَانِي زدّْغن. قسْحن، شَّاثن، وَار يزمَّر حَدّ اَخَاسن يكّ خ وبْرِيذ نِّي. 29عيّضن نَّان-اَس: "مِين ثخْسذ زَّايْنغ آ مِّيس ن أَربِّـي؟ مَا ثُوْسِيذ-د اَذَانغ ثْعدّْبذ قْبڒ إِ ڒْوقْث؟"

30غَار ڒݣّْوَاج شْوَايْت، ذِنِّي يجّن ن ثْحِيمرْث ذ ثَمقّْرَانْت ن يِڒْفَان ثَرْوس.#8‏.30 ئِڒْفَان نِثْنِي ذ لْخَنَازِير نِغ يحلُّوْفن. 31جْنُوْن نِّي تَّارن زِي عِيْسَى نَّان-اَس: "مڒَا ثْسُوْفْغذ-اَنغ، سكّ-اَنغ غَار ثْحِيمرْث-ين ن يِڒْفَان حمَا اَذَايْسن نَاذف." 32ينَّا-ٱسن عِيْسَى إِ جْنُوْن نِّي: "رُوْحم!" ڒخْدّنِّي فّْغن زِي ثْنَاين نِّي ن يِوْذَان ؤُذْفن ذݣ يِيڒْفَان. ثهْوَا ثْحِيمرْث نِّي مَارَّا ذِي ثيْسَارْث غَار ڒبْحَر مُّوْثن ذݣ وَامَان. 33يِنِّي يَروّْسن اَروْڒن رُوْحن غَار وبِيلَاج، سُوْفْغن ڒخْبَار ذِنِّي خ مَارَّا مِين يوقْعن ذ مِين يوقْعن إِ يِوْذَان نِّي ذِي دْجَان جْنُوْن. 34ڒخْدّنِّي فّْغن-د مَارَّا يوْذَان ن وبِيلَاج بَاش اَذ رَاحن اَذ ڒْقَان عِيْسَى. وَامِي ث ࢲْرِين، حشّْمن-ث حمَا اَخَاسن يبعّذ زِي جِّهث نْسن.

अहिले सेलेक्ट गरिएको:

متى 8: ريف

हाइलाइट

शेयर गर्नुहोस्

कपी गर्नुहोस्