Luka 10
10
Yeshu ukutuma makumi mutanu na abili na babili
1Munyima yanebye, Mwene wahatile bamina makumi mutanu na abili na babili ngayi bayengaho kumbili yendi. Wabatumine babili, babili ku minzi na ku myanya nimwayo omwo akaya na kupita. 2#Mat 9:37-38. Yeshu wambile kukwabo ngayi, “Bya kuteza binavulu, ngoboni bakamilimo babashe. Nohobene lombelenu kuli Mwene wa bya kuteza ngayi atume bakamilimo babengi mu kuteza. 3#Mat 10:16. Yenunga! Monenu na kumituma ngo bana ba bambelele mukati ka bambinzi. 4#Mat 10:7-14; Mako 6:8-11; Luka 9:3-5. Hinga mushimba shikwama, hinge mpamba, hinge makatulo, hinga mukashangwisha muntu umo ha nzila. 5Litala nimwalyo elye mukenginamo, ha kutatika mwambe ngayi, ‘Ku mwena kwikale muno mu litala.’ 6Ndi muli muntu waku mwena, ku mwena kwenu kukekala hahendi, ngoboni ndi kaliha noho, ku mwena kwenu kukaboka kukwenu kami. 7#1Koli 9:14; 1Tim 5:18. Yikalenu mu litala limo tuhu himulya na kunwa ebye bakamipana. Ndaba mukamulimo uku fwanina kupanikiwa ndando yendi. Hinga muzingula mu litala na litala. 8Oho mukengina mu munzi ndi banamitambulu, mukalye obyo bakamiwahishila. 9Nyongomanishenu bakakukola aba mukawanamo, kami mwambe kukwabo ngayi, ‘Wene wa Nyambi uli hahepi nanenu.’ 10#Mil 13:51. Ngoboni oho mukengina mu munzi, ndi kumitambula bafwako, yenu mu zimbanza zabo, mwambe ngayi, 11‘Tukumitotomwena hinge lukungu lwa mu munzi wenu olu lunatukakatili ku mawulu, ngoboni limukenu ngayi Wene wa Nyambi uli hahepi nanenu!’ 12#Shit 19:24-28; Mat 10:15; 11:24. Nikumitongweza ngayi, ha mutena uyo, Shondoma ukatendiwa shiwahe kupitakana munzi uyo.
Minzi ya kubula kukulupila
(Mateo 11:20-24)
13 #
Isha 23:1-18; Ezek 26:1—28:26; Yowe 3:4-8; Amos 1:9-10; Zaka 9:2-4. “Makando wobe Kolazina! Makando wobe Mbeteshayinda! Ndaba ngayi bikomokesho biya byatendiwile kukwenu shinga byatendiwilile ku Tile na Shindoni, shinga baya bantu batengulukile na kuvwala bicancolo na kulifukwila mutoko! 14Ngoboni kashushwilo kenu kakenga kakanene kupitakana ka Tile na Shindoni ha Mutena wa Kuyata! 15#Isha 14:13-15. Nanobe Kapenauma! Ukuhanganika ngayi ukakatuliwa kuyilu ndi? Byo, ukayumbiwila mu ngehena!
16 #
Mat 10:40; Mako 9:37; Luka 9:48; Yowa 13:20. “Ou ukumiyuvwa, ukuyuvwa ami, ngoboni ou ukumikana ukukana ami. Kami ou ukunkana, ukukana ou wantumine.”
Kuboka kwa bayo makumi mutanu na abili na babili
17Ba makumi mutanu na abili na babili babokele na ku wahilila, niho bambile ngayi, “Mwene, hinge mayimbwe anatwombatala mu lizina lyobe!”
18Yeshu wambile kukwabo ngayi, “Namona Shatana hawa kufuma kuyilu ngo lumuni lwa mvula. 19Monenu! Ninamipana ngovu za kulyata mayoka na tupilili na kukona ngovu nimwazo za mukankole, kami kowa shikamiletela wukalu. 20Hinga mu wahilila ndaba ngayi mayimbwe anamyombatala, ngoboni wahililenu ndaba mazina wenu anatikitiwi muyilu.”
Yeshu uku wahilila
(Mateo 11:25-27; 13:16-17)
21Ha shikati shiyobene, Yeshu wawahililile mu Moyo wa Kuyela, pe wambile ngayi, “Nikukambilila kukwobe obe Tate, Mwene wa liyilu na hanci, ndaba unaholeke byuma ebye ku bakangana na bakakalimukisho, ngoboni unabihololo ku bakakubula kulilongesha. Ingoi, Tate, shili nahiyo ndaba shinakuwahililishi.
22 #
Yowa 3:35; 10:15. “Byuma nimwabyo Tate wabimpanine. Kowa muntu ukulimuka Mwana ndele Tate, kami kowa ukulimuka Tate ndele Mwana nanobo anahata Mwana ngayi amuholole kukwabo.”
23Niho Yeshu afutukile ku bandongesha bendi, wambile kukwabo kuwi ngayi, “Ali na mfuywezi meho aku mona ebye mu ku mona. 24Kami nikumitongweza ngayi bamiluwe babengi na bamyene bashingile ku mona ebye mu ku mona, ngoboni kaliha babimonene, kami bashingile kuyuvwa ebye mu kuyuvwa, ngoboni kaliha babiyuvwile.”
Nguli ya Kashamaliya wamuwahe
25 #
Mat 22:35-40; Mako 12:28-34. Ha shikati shamina mulongeshi wa ndayano wemanine na kwezeka Yeshu ngayi, “Mulongeshi, nikwinga nahiti ngayi nikone wumi wa mwaya myaka?”
26Yeshu wambile kukwendi ngayi, “Kati mu ndayano mwatikitiwa nahiti? Walabangamo bishini?”
27 #
Bal 19:18; Nday 6:5. Mulume wakumbwile ngayi, “Haka Mwene Nyambi yobe na mutima wobe nimwawo na moyo wobe nimwawo na nyala zobe nimwazo na ngana zobe nimwazo, kami haka ndambo yobe ngonehe walihaka obe mwine.”
28 #
Bal 18:5. Yeshu wambile kukwendi ngayi, “Unakumbulu shiwahe, katende noho, pe ukayoya.”
29Ngoboni mulongeshi wa ndayano ha kushinga kulyolokesha niye mwine wepwile Yeshu ngayi, “Kati ndambo yami yani?”
30Yeshu wamukumbwile ngayi, “Muntu wamina wakunkulukilenga kufuma ku Yelushalema kuya ku Yeliko, waliwanine na bezi, baya bamukamine, bamuvulile bivwalo byendi, niho bamushiyile hinga alunguka. 31Mukankombela wamina wakunkulukile na nzila iyo, oho amumonene, wamwongolokele. 32Shuma shimo kami Kalevi oho akumine ku mwanya uyo, wamumonene, kami wamwongolokele. 33#2Bya 28:15. Ngoboni Kashamaliya oho ayilenga mu nzila iyo, wakumine haya ekalile. Oho amumonene, wamuyuvwilile nceshe. 34Wayile kukwendi, wayitilile mazi na waine ha bitombo byendi, pe wabimangile, niho amukandamishile ha mbongolo yendi, wamutwalile ku litala batulilanga bayeni, pe wakamulaminineko. 35Oho kwashile lumenemene washimbile mali abili a shiliva wapanikile mwine litala lya bayeni, wambile ngayi, ‘Mukoleshenga, ebye ukaliyavwisha hahendi nimwabyo nika kuhingishilabyo nakaboka.’
36“Yani hakati kabo bahatu, ou ukuhanganika ngayi wengile ndambo kukwendi uya wawililile mukati ka bezi?”
37Mulongeshi wa ndayano wakumbwile ngayi, “Ou wamuyuvwilile nceshe.”
Yeshu wambile kukwendi ngayi, “Nanobe yanga ukatende noho.”
Yeshu ukuzingula Mata na Maliya
38 #
Yowa 11:1. Oho Yeshu na bandongesha bendi bayilenga, wenginine mu munzi muyo mbuyama umo watumbiwile Mata amutambwile mu litala lyendi. 39Wekalile na mukonzo wendi ukutumbiwa Maliya, ou wekalile ku mawulu a Mwene, ha yuvwilila ebye alongeshelenga. 40Ngoboni Mata wayakakanine na kutenda byabingi ebye abalakanyinenga. Niho ezile kuli Yeshu wambile kukwendi ngayi, “Mwene, kati kulifulankana wufwako ngayi mukonzowami unanciyi hinitenda mulimo ninkayami? Mutongweze eze anyavweko!”
41Ngoboni Mwene wakumbwile ngayi, “Mata, Mata! Unakuyakakana na kulikekula byuma byabingi, 42ngoboni shuma shimo tuhu shikushingiwa. Maliya unahata shuma shashiwahe eshe shikabula kuyangiwa kukwendi.”
अहिले सेलेक्ट गरिएको:
Luka 10: LLK
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Libuka Lya Kuyela © Bible Society of Zambia, 2020.
