मत्ती 9
9
येशूका उ ल्वा-खेल सोक्पा मु़चु़लाई सबेट्मिडिम
(मर्कूस २:१-१२; लूका ५:१७-२६)
1मेकोतिमा येशू कुबी-बोक्साडला हुम्डिमा दिरिदिनकु होनो होम्बुनोम उनी त्वाकु शहरथो़ ख्लोम्सिम्डी। 2उ ल्वा-खेल सोक्पामा उ प्लानडा झार्ल्याक्पा कोले मु़चु़लाई मु़चु़मिमका कुर्मिडिमा येशूकाडा रेट्मिडी। मे मु़चु़मिमका गुमीडला थो़र बेम्डिम ल्वाम्डिमा येशूका उ ल्वा-खेल सोक्पा मु़चु़लाई र्वाम्डी, “छारी, गेर्सा, इमा छु़लमिम हेम्सिम्डिम बु।”
3यहूदीकु डु़म्ला सीपा पातु़म्रीडाम कोङमीका येशूका आरे र्वाम्डिम ल्वा थो़म्डी, मा त्वाप-त्वापडा आरे र्वाबोमु चो़म्मिडी, “ओरामका ने माम्चु़नीलाई डक्साका जेत्तोङा लेडु़।”
4मेर्मिमका हाम मिम्तोङा लेन्मी र्वाक्पा ल्वा येशूका चम्डिमा र्वाम्डी, “गानी हेङा इनी नडा आरेप्माम मेजो़पा मिम्निमिम? 5ओराम मु़चु़लाई हे र्वामु झापा दु़म, ‘इमा छु़लमिम हेम्स्ताम बु’ डे ‘बकामा लाम्दिया’ डे? 6लावो सुबुडा छु़लमिम हेप्साक्पा साखाम मिनीचो़नुङ बु र्वाक्पा गानी ओरामलामकाङा चनी।” मेकोतिमा गुमीका उ ल्वा-खेल सोक्पा मु़चु़लाई र्वाम्डी, “बका, इ प्लान फकामा नेम लक्सा।” 7मेराम मु़चु़ हुबक्ता, मा उ नेम लस्ता। 8सेर्पा मु़चु़का ओराम ल्वाम्डिमा छो़म ङिम्डी। मु़चु़मिमलाई आरेप्माम यु़म माम्चु़नीका ग्वाम्डिमका मेर्मिमका माम्चु़नीकु नङ कोम्डी।
येशूका मत्तीलाई येट्मिडिम
(मर्कूस २:१३-१७; लूका ५:२७-३२)
9येशू मे शहरलामका लक्तोङा बेम्डिलो मत्ती नङकाम कोले मु़चु़ कर फखोपडा गन्तासिट्पा ल्वाम्डी। मेम्मा गुमीका मेरामलाई र्वाम्डी, “गोनुङ लाम्दिया।” मेकोतिमा मेराम बक्तामा गुमीनुङ लाम्दिडा।
10येशू उनी सीसिपामिमनुङ ग्रुला पेप्डा मत्तीकु नेमडा लम्डी। मेसिन्डा कर फक्पामिम नुङ छु़लचो़मिम हापाका वो गुमीनुङ पेम्डिम बाम्डी।#लूक १५:१-२ 11फरिसीमिमका ओराम ल्वाम्डिमा येशूकु सीसिपामिमनुङ र्वाम्डी, “इनीमा सीपाका कर फक्पामिम, छु़लचो़मिमनुङ हेङा पोमी-डुमिमिम?”
12ओराम थो़म्डिमा येशूका र्वाम्डी, “मेनो़पा मु़चु़लाई डाक्टर मेबासी, लावो नो़पा मु़चु़लाई बासी। 13‘हादी-बारा सासेन्मु मेएँ, न-थो़म रेम्बेबेनी र्वाक्पा गो न बेउ।’#मत्ती १२:७; होशे ६:६ र्वाक्साका माम्चु़नीकु सिजेमका र्वामु मालु़मिम ल्वा लक्निमा थेसिथेट्नी। माम्चु़नीकु मिक्सीलामडा जो़पा बुङु र्वाक्साका मिम्सिक्पा मु़चु़मिमलाई मेएँ, छु़लचो़ र्वाक्साका मिम्सिक्पा मु़चु़मिमलाई येड्डा गो योङडोम सो़।”
उपास बुमुकु दुथाम हिलाहिसी
(मर्कूस २:१८-२२; लूका ५:३३-३९)
14कोलेम कु-रु़दु़म ग्वाक्पा यूहन्नाकु सीसिपामिम येशूकाडा रोम्डी, मा गुमीनुङ हिलाबेम्डी, “फरिसीमिम नुङ गुकु उपास बुकु, लावो इनीमा सीसिपामिम ने हेङा उपास मेबुमिमिम?”
15येशूका मेर्मिमलाई ओराम सो़म्दीलामका र्वाम्डी, “लालीकुन्दाकाम थारीका लारेपा मेर्मिमनुङ बुमिमसम्म हाम जन्तीमिम येमी-ख्राम्मी मा? लावो आरेप्माम थारी रो, मेर्मिमनुङ बाट्पा लारेपा मेर्मिमडाम वाङ दु़म। मेनेम मे जन्तीमिम उपास बुमी।
16“सु़का वो चेम्पामा भ्रो़ट्पा येडला जो़पा येका मेफिरु़, फिर्रु़ माला मे फिर्मा येका आ़क्सु़, मा ङादोमडाम वो हापा आ़सी। 17सु़का वो मालो प्लोक्तोङा लेट्पा अङ्गूरकु बिलाम#९:१७ मालो प्लोक्तोङा लेट्पा अङ्गूरकु बिलाम र्वाक्मा लाले सीसि सो़। लाले सीसि नुङ माकेम डु़म्लाकु सीसिनुङ मेघ्रो़म। ङादो बनेबेम्मा कोक्तेकु फाजीडा मेजु़लु़। जु़ल्लु़ माला मे कोक्तेकु फाजी मेरामका पियु़, मा अङ्गूरकु बिलाम हासी। मेम्मा मे फाजी वो पारिमिम दु़म। मालो प्लोक्तोङा लेट्पा अङ्गूरकु बिलाम मालो बनेबेम्मा कोक्तेकु फाजीडाङा जु़ल्मु बासी, मा निफिङा हे वो मेदु़म।”
याइरसकु चो़ सिमुलामका फम्डिम मा सोमोरीनुङमा मेसेम सबेट्मिडिम
(मर्कूस ५:२१-४३; लूका ८:४०-५६)
18येशूका मेर्मिमनुङ ओराम ल्वा र्वाक्तोङा लेट्मिडिलो घ्रो़म्दीनेमडाम ङाउ रोक्ता, मा येशूकु ङादोडा क्रचु़खुम बेत्तो आरे बु़डु़, “ङाचो़, आमा जाउमोचो़ मालोङा सिडा, लावो गानी रोक्नीमा गुडला ल्वा जु़ल्नी माला गानी गुलाई आथावो नु़बेन्मु चाम्नी।” 19मेम्मिमका येशू बम्डिमा गुनुङ लम्डी, मा उनी सीसिपामिम वो उनी चङचङ लम्डी।
20मेकोतिलोङा को-न (१२) थ आथाम सिसि लक्पा सोमोरीका लु़प्डु़म कोले मेसेम येशूकु चङलाम बिक्ता। मेम्मा उनी हुम-येकु जु़जु़ लु़प्डु़। 21हेङालोने गुका उ नडा आरे र्वाक्पा मिम्स्ताम बाइडा, “गो उनी हुम-ये कोङङा लु़प्तो माला गो सङु।”
22येशू चङथो़ ख्लोम्सीम्डिमा रेप्मिडिलो मे मेसेमलाई ल्वाम्डिमा र्वाम्डी, “ए तोङमा, मेङिसा, इमा थो़रका गाना सन्नाम बु।” मेकोतिलोङा मे मेसेम सस्ल्याड्डा।
23मे ङाउकु नेमडा येशू रोम्फाम्डी। मेकोतिलो मेसिन्डा गुमीका सिमुथारीका डु़प्मिमिम लिउसाम डु़पा#९:२३ यहूदी मु़चु़मिम सिमिलो लिउसाम डु़प्मी। नुङ सेर्पा मु़चु़ येपा-ख्रापा ल्वाम्डी। 24गुमीका मेर्मिमलाई र्वाम्डी, “पाखा लक्नी। ओराम चो़च्चो़ सिडाम मिबु, अम्चेड्डाम कोङङा।” लावो मेर्मिमका गुमीलाई रिम्साम्डी। 25येशूका सेर्पा मु़चु़लाई पाखानो ख्लुम्डिमा गुमी नेमगोनो हुम्डी। मेम्मा गुमीका मे चो़च्चो़कु ल्वाडा झेट्मिडिमा मे चो़च्चो़ हुबक्ता। 26ओराम ल्वाकु दुथाम मेसिन्डा खोत्लेथो़ फोन्सिड्डा।
मिक्सीका मेल्वापाचिप नुङ सि मेजेपा मु़चु़ येशूका सबेट्मिडिम
27येशू मेलामका लक्तोङा बेम्डिलो मिक्सीका मेल्वापा मु़चु़चिपका डोक्पु लो़लामका आरे र्वाक्तो उनी चङचङ लक्ची, “ए दाऊदकु तारापाचो़#९:२७ मसीहकु नङ, गुचुकुडला न-थो़म रेम्बेनी।”
28येशू नेमगोनो हुम्डिमा मे मिक्सीका मेल्वापाचिप वो मेसिन्डा रोक्फाच्ची। मेम्मा येशूका मेर्चिपलाई हिलाबेम्डी, “गो गाचीलाई मिक्सीका ल्वापा दु़म्बेन्मु चाम्निची र्वाक्साका हाम गाची थो़र लु़ची?”
मेर्चिपका गुमीनुङ र्वाक्ची, “थो़र लु़चु़कु।”
29मेकोतिमा गुमीका मेर्चिपकु मिक्सी लु़प्मिडिमा र्वाम्डी, “गाची थो़र लु़च्चिम होङङा इची मिक्सीका ल्वापा दु़म्ची।” 30मेम्मा मेर्चिप मिक्सीका ल्वापा दु़म्ची। “ओराम ल्वा सु़नुङ वो मेसो़मु सो़” र्वाम्डिमा येशूका मेर्चिपलाई ङिम साट्मिडिची। 31लावो मेर्चिप लक्ची, मा उनीमा दुथाम मेसिन्डा खोत्लेथो़ थो़बेट्ची।
32मेर्चिप लक्चिम चङडा मुनाङका हुप्डु़मा उ सि मेजेपा दु़स्ताम कोले मु़चु़ येशूकाडा रेट्मिडी। 33येशूका मुनाङ कोल्मिडिमा मे मु़चु़ जेमु चो़म्डु़। मेकोतिमा सेर्पा मु़चु़ ङाङाया दु़म्तो र्वाम्डी, “इस्राएलडा आरेप्माम ने हेल्लो वो दु़स्ताम मेबायावा।” 34लावो फरिसीमिमका र्वाम्डी, “ओरामका मुनाङमिमकु डोक्पुलामका#९:३४ शैतान मुनाङ कोलु़मी।”#मत्ती १०:२५; मर्क ३:२२; लूक ११:१५
खारीचो़मिम थु़र्मिनु़ र्वाक्साका सो़म्दी बोमु
(मर्कूस ६:३४; लूका १०:२)
35येशू खोत्ले शहर-शहर, देल-देल नुङ मेर्मिमकु घ्रो़म्दीनेममिमबाडे सीत्तो नुङ पाह्री-किब्दीकु दुथाम जो़पा-सेला थो़बेत्तो खिर्सिम्डी। मेम्मा खोत्ले खालकाम सोमोरीनुङमा नुङ नो़पा मु़चु़मिमलाई सबेट्मिडी।#मत्ती ४:२३; मर्क १:३९; लूक ४:४४ 36सेर्पा मु़चु़ ल्वाम्डिमा छो़म उनी थो़म भ्रो़स्ता, हेङालोने रेपा-क्रिपा मु़चु़ मान्थिम भेन्दामिम होप्माम दु़खा ल्वापा नुङ ख्लो़पा मान्थिम मेर्मिम बाम्डी।#गन्ती २७:१७; १ राज २२:१७; २ इति १८:१६; इज ३४:५; मर्क ६:३४ 37मेकोतिमा गुमीका सीसिपामिमलाई र्वाम्डी, #लूक १०:२“थोक्पा मा-के ने हापा ङा बु, लावो खारी बेपा मु़चु़मिम कति ङा बुमी। 38मेम्मिमका उनी मा-के खोम्मु खारी बेपा मु़चु़मिम थु़र्नी र्वाक्साका मा-के थोक्पा ये-दकु ङाचो़लाई सो़म्दी बेनी।”
अहिले सेलेक्ट गरिएको:
मत्ती 9: THUL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators, Inc. All rights reserved.
