Mi cilima 34
34
Jakob bijaba tuu li panli Dina po
1Lea n den mali yaa bonpuoga Jakob po den ñani ki baa le u dogu nni bonpola. 2U dogu nni bado Hamori bijua Sikemi den laa o. O den cuo o, ki duani leni o ki biidi o. 3O yama den kua Jakob bisalo Dina niinni. O den bua o jafaano yeni, ki maadi leni mi buama, ki bua ki taa o yama. 4Sikemi den yedi o baa Hamori, taa n po o jafaano ne wan tua n pua.
5Jakob den gbadi ke o den biidi o bisalo Dina. O bijaba den ye ku muagu nni, ki kubi li yangoli, lani yaa po Jakob den ŋmini hali ban kpeni.
6Sikemi baa Hamori den gedi Jakob kani, ki maadi leni o. 7Jakob bijaba n den kpeni ku muagu po ki bandi yaala n tieni, laa jaba pala den beni ke li pabiencianli den cuo ba, kelima Sikemi den tieni ti cagindi Isidayeli yaaba siiga, ki duani leni Jakob bisalo. Laa den pundi wan tieni yeni. 8Hamori den maadi yaa maama n tie ne: «N bijua Sikemi yama kua a bisalo niinni, lanwani n mia ŋa, pa nni o wan tua o pua. 9Tin cuadi leni tiyaba. Yi baa pa ti yi bisiaba, ki taa ti yaaba mo. 10Yi baa yaa ye leni ti, yin tieni yin bua yaala. Yin yaa kaa mani ki yaa tiendi u kpendu ki pugini yi piama.» 11Sikemi den yedi Dina baa leni o kpeliba: «Yi pala n mangi leni nni, n baa pa yi yin yedi yaala kuli. 12Yin ŋaa nni yaa panpaani n yabi ki go mia nni yin bua yaa paabu boncianla, n baa pa yin yedi nni yaala, die yin pa nni o jafaano wan tua n pua.»
13Jakob bijaba den guani ki lebidi Sikemi leni o baa Hamori leni i janbi, kelima o den biidi bi waalo Dina. 14Bi den yedi ba: «Li tie yaa bonla ke ti kan fidi ki tieni, lani n tie ki pa ti waalo yaa joa n tie jifolo. Li baa yaa tie ti po yaala n gundi. 15Ti kan tuo a yanbuama, se ŋan tua nani tinba, ke bonjaga kuli yi siiga n kua ku koanciagu. 16Lanwani, ti baa pa yi ti bisiaba, timo baa taa yi yaa yaaba. Ti baa yaa ye leni yi ke tikuli n tua nibuoyendu. 17Ama yi yàá bua ki cengi ti maama ki kua ku koanciagu, ti baa taa ti bisalo ki fii ki gedi kaanto.»
18Bi maama den mangi Hamori leni o bijua Sikemi pala. 19O jawaalo den tieni laa bonla ki naa waagi ba waamu, kelima o den bua Jakob bisalo. Bi den jigini wani ki cie o baadiegu nni yaaba n sieni kuli. 20Hamori leni o bijua Sikemi den gedi bi dogu buliñoabu kani, ki maadi leni bi dogu niba yaa maama n tie ne: 21«Bi naa niba ye leni ti leni mi yanduanma, ban yaa ye mi diema nni ki tiendi u kpendu, kelima mi diema yabi ki dagidi bi po. Ti baa taa bi bisiaba ban tua ti puoba, moko bi baa taa ti bisiaba ban tua bi puoba. 22Ama laa jaba kan tuo ki yaa ye leni ti tin tua nibuoyendu, se ti bonjala kuli n kua ku koanciagu nani bani bi ba n kua ku koanciagu maama. 23Bi yangola, bi piama leni bi yandi kuli kan tua ti yaala ka te? Lanwani, tin tuo ban yedi yaala, ke ban yaa ye leni ti.»
24Yaaba n den cua ki ye u dogu buliñoabu kani kuli den cengi Hamori leni o bijua Sikemi maama. A bonjala, yaaba n den cua ki ye u dogu buliñoabu kani kuli den kua ku koanciagu. 25Li dataali, lan den koani bi po yaa yogunu, Jakob bijaliediba Simeon leni Levi, Dina kpeliba yeni, yuakuli den taa o jugisiega ki gedi ki pua u dogu yuu n den tama ke bi ye leni mi yanduanma, ki kpa a bonjala kuli. 26Bi go den kpa Hamori leni o bijua Sikemi leni ki jugisiega, ki ñani Dina Sikemi diegu nni ki kuni.
27Jakob bijaba den gedi ki landi bi tinkpiba, ki fagi u dogu kuli kelima bi den biidi bi waalo. 28Bi den taa bi yangola, bi ne, bi ŋunbi, yaala n den ye u dogu nni leni ku muagu nni kuli. 29Bi den taa bi piama kuli, bi bila, bi puoba leni yaala n ye bi diena kuli nni, ki gedini ke li tua bi po fagidi.
30Lan den pendi, Jakob den yedi Simeon leni Levi: «Yi faligi nni ki teni ke mi diema yaaba kuli nani nni, ke n baa yaa nu mi diema yaaba kuli po, ba Kanana leni Perisiti yaaba kuli po. Mii pia bi niba boncianla, se waamu bebe. Bi baa taani taani ki fii n po ki pua nni. Bi baa bolini mini leni n diegu kuli.» 31Bi den guani ki yedi o: «Naani ti baa tuo ban tieni ti waalo nani o tie li puoconconli yeni?»
अहिले सेलेक्ट गरिएको:
Mi cilima 34: BGP
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Gulmancema Protestant Bible © Bible Society of Burkina Faso, 2013.