Mateu 12
12
Sauru iyara kua Jesus
1Asui sauru rame Jesus usasawa kupixawa rupi asui sasi ainta supe yumãsi kuaita umbuewaita ape aintaumpena awati aintaumbau arama.
2Asui kuaita farizewita aintaumaa mayetaa aintaumunya, asui aintaunyee ixupe:
—Remaa kuaita rembuewaita aintaumunya kua aintausaisuwaa yamunya sauru rame.
3Maa Jesus unyee ainta supe:
—Maitaa tire será peleri Davi resewara sasi rame ixupe yumãsi kuaita yuiri sumuaraita?
4Uwike Deus ruka kiti uu arama kua meyu Deus usaisuwaa uu aintayuiri kuaita sumuaraita, nyãse saserdutita umbau aramawaa ae.
5Maitaa tiserá peleri kuera Muize umpinimawaa maye aintaupuraki templu upe sauru rame kuaita saserdutita, maa tiawa upuderi umbeu puxi aintarese?
6Kuiri hambeu penye arama, aikue yepe uikuwaa pepiterupi puranga piriwaa templu sui.
7Haputari pirasuawaa peyumaa, timaa haputari peirumu kua yasapi aramawaa uvelya, pekuawa rame maa kua hambeuwaa timaa pembeu puxi sese kua tiwa uriku pekadu.
8Aete sauru iyara kua unaseriwaa umaa ara.
Iangaiwarawaa ipu
9Asui usu aintasui uwike aintasinaguga kiti.
10Aikue yepe apigawa iangaiwarawaa ipu. Asui aintaupurandu Jesus:
—Maitaa yapuderi yamburi mãsi sauru rame? Yawe aintaunyee ixupe nyãse aintauputari aintaumbeu sese puxi.
11Asui unyee ainta supe:
—Awataa pesuiwara urikuwaa uvelya uwari rame maa iwi kuara kiti sauru rame maitaa tiserá maa usupiri ae nyã ara?
12Puranga piri apigawa uvelya sui ape yapuderi yamunya ainta supe puranga muiri ara sauru rame yuiri.
13Asui unyee ixupe kua apigawa:
—Resupiri neipu. Asui usupiri ipu, asui purangana ae maye suaxara ipu yawe.
14Asui aintausu ukara kiti kuaita farizewita, aintauyumuatiri aintaupurungita Jesus rese aintauyuká arama ae.
Jesus uyuiri aintasui
15Maa Jesus ukuawa aintarese ape usu aintasui, asui siya miraita uri sakakuera, asui umburi aintasui panye mãsi.
16Asui umundu tiarama aintaumbeu sesewara.
17Yawe Jesus umunya, umunya arama kuaye umbeuwaa yawe kua utitikawaa Izaia.
18Yawe unyee:
—Pemaa kua ixe aramawaa haparawakawaa kua haputariwaa, kua hamaawaa ixupe arama suuri. Haxari kuri ixupe arama seespiritu, uxari arama kuri aintaukuawa aintauriku aintapekadu kuaita tiwaita judeu.
19Umbaa kuri uyakawa ainta, timaa kuri usasemu ainta supe, tikuri awa usendu kirimbawa upurungita ukara kiti.
20Timaa kuri umpena pindaiwa upena putariwaa, timaa kuri umuweu lamparina yawaitentuanawaa uweu senundere uxari purangawaa umuserana ainta.
21Asuiwana kuri sera rese aintausaru aintaumaa purangawaa kuaita tiwaita judeu.
Umukaturu sesaimawaa urikuwaa demuniu
22Asui aintaururi ipiri yepe urikuwaa demuniu sesaimawaa ae muduwaa ae, asui umukaturu ae ape umaawana upurungitana yuiri kua sesaimawaa muduwaa.
23Asui kuaita miraita siyawaita aintaakayemu aintaumaa Jesus asui aintaunyee:
—Maitaa aete Davi rimiariru?
24Asui kuaita farizewita aintausendu inyenga, asui aintauyupurungita:
—Anyunte umburi aintasui demuniu Yurupari ukuawasawa irumu kua demuniwita ruixawa.
25Jesus ukuawa aintaumanduariwaa ape unyee ainta supe:
—Aintaruixawa umburi rame imiraita aintaupawa maa, yawete yuiri panye tetama puraita aintarukapuraita yuiri, aintaumaramunya rame maa anyunte aintaupawa maa.
26Yurupari umburi rame maa Yurupari uyumburi maa aepawate maitaa upuderi uiku Yuruparisawa upe.
27Hamburi rame maa demuniwita Yurupari ukuawasawa irumu awa ukuawasawa irumutaa aintaumburi ainta kuaita perairaita? Aintate kuri umbeu peresewara.
28Maa hamburi rame demuniwita Deus Espiritu irumu pekuawa kuri usikana perese peruixawa arama kua Deus.
29Maitaa yepe upuderi uwike kirimbawawaa ruka upe umunda arama iyara tirame upukuari ae senundere umunda iyaraita? Asui upukuari rire ae urasu panye.
30Kua tiwa uiku seirumu umuruanyana ixe, kua tiwa umuatiri seirumu ainta, umusãi ainta.
31Ape hambeu penye, Deus kuri uperduari aintasui panye aintapekadu panye yuiri aintaumbeuwaa puxi sese uperduari kuri aintasui ae kuaita mundu puraita, maa kua aintaumbeuwaa puxi Espiritu Santu rese timaa kuri uperduari aintasui ae.
32Deus kuri uperduari aintasui panye puxi aintaumbeuwaa sese kua unaseriwaa umaa kua mundu, maa kua aintaumbeuwaa puxi Espiritu Santu rese timaa kuri uperduari aintasui ae nẽ kuiri nẽ mairame kuri.
Mirá iya
33Pexari purangawaa kua mirá ape puranga kuri iya u pexari rame puxuwerawa kua mirá ape kuri puxuwerawaita iya, nyãse iya irumu yapuderi yakunyeseri kua mirá.
34Penye buyaita, maitaa pepuderi pepurungita purangawaa puxuwerawaita pukusawa penye? Nyãse pepia suiwara kua pemusemuwaa peyuru sui.
35Yepe apigawa purangawaa uyuka imaa purangawaa imaa riru purangawaa sui, maa kua apigawa puxuwerawa uyuka imaa puxuwerawa imaa riru puxuwerawa sui.
36Kuiri hambeu penye arama:
—Mairame kuri Deus uxari aintaupurara arama aintapekadu resewara aintaumbeu kuri sesewara panye kua aintaumbeuwaa tenyuntu.
37Nyãse nenyenga resewara puranga kuri inde, asui nenyenga resewara yuiri repurara kuri nepekadu resewara.
Juna
38Asui yepeyepe umpinimawaita farizewita yuiri aintaunyee ixupe:
—Inde rembuewaa yaputari remunya yamaa remukame aramawaa ipupe.
39Asui Jesus unyee ainta supe:
—Kuaita miraita kuiriwaraita puxuwerawaita warixiwaita aintaupurandu hamunya arama aintaumaa hamukame aramawaa ipupe, maa tihamunya ainta supe ae, anyunte hamunya kuaye umunyawaa yawe kua utitikawaa Juna.
40Kuaye Juna uikuwaa yawe pirá turusuwaa marika upe musapiri ara pituna yuiri, yawete yuiri kuri uiku iwi kuara kiti kua unaseriwaa umaa kua mundu.
41Mairame kuri Deus umbeu pekadu resewara aintaupuamu kuri kuaita Ninive upewaraita aintaumbeu Deus uxari arama pepurara pepekadu resewara, nyãse kuxima sasiyara aintaumanduari aintapekadu aintausendu irumu Juna inyenga, aikue yepe pepiterupi puranga piriwaa Juna sui.
42Kua kunya Sul suiwara aintaruixawa ae, umbeu yuiri kuri Deus uxari arama pepurara penye miraita kuiriwaraita pepekadu resewara umbeu irumu kuri pepekadu, nyãse kuxima uri apekatu sui usendu arama Salumão ukuawasawa, maa kuiri yepe uiku pepiterupi puranga piriwaa Salumão sui.
Demuniu resewara
43Usemu rire apigawa sui kua demuniu ikiawaa uwata tikangawaa upe uputari timaarese ae maa tiupuderi.
44Asui unyee kua demuniu:
—Hayuiri kuri seruka kiti hayuiriwaa sui, asui uri umaa iyaraimawaa ae upiriana ae umukaturuana senunde ae.
45Asui kua demuniu usu urasu irumu seti demuniu puxuwera piriwaita isui, asui aintauwike aintauiku arama ipia upe kua apigawa. Asui puxuwera piri uiku kua apigawa kuximawaa sui uiku ramere yepe demuniu irumu. Yawete yuiri kuri aintauiku puxi kuaita miraita kuiriwaraita.
Jesus familiaita
46Jesus upurungitare uiku aintauri aintaupuamu ukara kiti kuaita imaya imuita yuiri, aintauputari aintaupurungita irumu.
47Asui yepe unyee ixupe:
—Xukui nemaya ukara kiti nemuita yuiri aintauputari aintaupurungita neirumu.
48Asui Jesus unyee ixupe, kua umbeu aintaresewara:
—Awataa semaya, awataa kuaita semuita?
49Asui umukame ipu aintarese kuaita umbuewaita unyee:
—Aintate semaya semuita yuiri.
50Nyãse panye kuaita umunyawaita kuaye sepaya iwaka kitiwara uputariwaa yawe aintate semuita serendiraita yuiri semaya yuiri.
अहिले सेलेक्ट गरिएको:
Mateu 12: BBp
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
