Génesis 6
6
Täbä nö badabö a̦fa waiteli
jaba lä ji̦limono wei tä a̦
1Ulifi jödödöwä a jamö, yanowamö täbä jaba balablou lä blaucono wei däjä, bä tääbö ca̦i balao mö fa feduolalunö, 2yai täbä bälöo mö lä feduono wei täbänö, bä moco liyäjäwä dalalemaje. Bä fa yaialalöjenö, bä dolalemaje. 3Ö̦jö däjä, Jeobaa a wa̦ falayoma.
—Täbä yanowamö demiobä, ya bufi lä lucälayono wei ya bufi nia didio shi wa̦liomi. Täbä dobloimi malä waiquii. Täbä cudiobä täbämi. Ya bä demi nia lä tabou wei, lasha 120 ya famaö fa bädaonö, ya bufi nia co̦amamou co̦o —a cuma.
4Ö̦jö lä däjä, yaläjäwä täbä ca̦i bälöo mö feduoma. Yanowamö täbä tääbö nija, yai täbänö bä ijilu lä taaqueno wejei bä lä cui, bä yaläjäwä nö quilijio fe balojooma. Jaba däjä, täbä a̦fa nö badabö waiteli lä ji̦limono wei, ö̦jö bei bä cuoma.
Bä nofi bluca lä
jushuano wei tä a̦
5Jeobaa a mamo fa showaicunö, jödödöwä tä jamö, yanowamö täbä dobloimi daa fe balojolalema. Wa̦lidiwä tä ja, showadi täbä bufi mö shino blucaoma. Bä nofi lä jushuaö wei tä fa dalalönö, 6Jeobaa a bufi wajäblaliyoma. “¿Wedi tabä yanowamö ya bä fa tablalönö, bei ya bä bälöa nö blemabou da culawä?”, a bufi jalujuwä cudaliyoma. 7Abinaja a cuma.
—Yanowamö ya bä lä tablaleno wei, ya bä bita jamö lä bälömabole, ya bä nia mladamaö. Yanowamö täbä ma cui, yalo bä bluca lä juu wei bä ma cui, wajaquemi bä wai lä joleaö wei bä ma cui, bä lä yäö wei bä ma cui, ya bä nia jödödöwä mladamaö. Ya bä ma tablaleno wei ma cui, bä dobloimi ja, ya bufi shomiblaliyoma —a cuma.
8Ö̦jö ma cui, Noewä a nofi shino ojodabou fe yadioma.
Noewänö canawä a lä
tablaleno wei tä a̦
9-10Noewänö cama ebä ca̦i lä cuaano wei, ei tä a̦ li oni.
Bei ijilubö 3 ebä cuoma, Semö, Camö, Jafede bä a̦fa lä cuono wei. Ai bä nofi bluca ma jushuano wei ma cui, Noewä a dodijaö ayaoma. Yai Bada nija a bufi cadidioma. Ö̦jö sho cäcöbö nofi shino tamayoma.
11Ö̦jö ma cui, bita jamö ai bä bluca lä bälöblai, Yai Bada tänö bä bluca wa̦lidiwä fe balojowä dalalema. Bä nofi waitelimou jushuaö nö mlaoma. 12Yanowamö täbä lä bälöblai, Yai Bada tänö täbä möö fa cuaanö, bejedi tä ulifi bluca wa̦lidio fe balojooma. Jödödöwä täbä lä bälöjono wei, bä shino yaclädii bufi lä doblao wei tä ja, bä bufi yai wa̦lidiblamolayoma. Bä bufi fa wa̦lidiblamolunö, bä bufi bluca wa̦lidia jödödöblaliyoma. 13Ö̦jö däjä, Noewä a yömölaö showadaoma.
—Bei. Jödödöwä bä lä bälöblai, ya bä nia waicaö. Bä nofi shino waitelimou jushuaö yalo, tä ulifi wa̦lidiblamaö jödödöblou a lä culajei. Ya bä mö nia watäblaö nö mlao. 14Defi lä shuu wei defibä ja, afä canawäfä bada a bada da tablalö —a cuma—. Yano fe döbädäwä a befi ca̦i cuobä. Ö̦jö wa fa tablalönö, fii fibä shuunö, u̦eshi jamö ma cui, sibosi jamö ma cui, a ya̦lea da jödödöblalö, mau ubä faö mlaobä.
15’Abinaja a blewä cuwä, wa tablabä —a cuma—. 130 wa mata quea lä blajadou wei tä blajawä lä culenaja, a labe cuobä. 22 wa mata quea lä blajadou wei tä blajawä lä culenaja, a blaucuwä cuo mö feduobä. 13 wa mata quea lä blajadou wei tä blajawä lä culenaja, a nano ca̦i ösöwä cuojolayobä. 16Feluluwä wa tä tablabä. Cojomo jamö ai tä, möamo jamö ai tä, feyaca jamö ai tä, tä canawä feluluwä cuobä. Canawä a casö wö̦nöcöblamobä jamö, tä walalawä shoqueobä. Tä lä walalai, wa mata quedou ajededou lä culenaja, tä wawädowä cuojolayobä. Canawä a leboco mashi jamö, beli wa yoca ca̦i taabä.
17’Tä ulifi befi ca̦i bluca baoblobä, mau bada ya u nia bada shömaö. Modu u maquejou lä dodijio wei ja, jödödöwä bä fö̦shöacö lä faö wei bä mö watäblou showadaobä, ya u nia shömaö. Ai bä demi nia feibloimi —Yai Bada a cuma.
18Abinaja Noewä a nowa ca̦i tama.
—Ö̦jö ya bä mö nia bluca ma watäblaö wei ma cui, cafä dodijidawä wamacö cuobä, ya tä a̦ nia wäaö. Cafä bämacö nia lä bayelibou wei tä ja, ya wa̦ nia wäo cadidio.
’Canawä a bada jamö wa nia lucälayou. Ijilufä bä sho, suwäböfä sho, tatäfä bä sho, ö̦jö wa bä nia ca̦i bluca lucälayou. 19Yalo bluca bä lä cublai, canawä a jamö bolacabö bä cudawä, wa bä ca̦i nia lucälayou. Cafä nija bä demi cuobä, wa̦lo a, suwä a bä cudawä, wa bä ca̦i lucäbä. 20Bä bluca lä yäö wei bä ma cui, bä bluca lä juu wei bä ma cui, wajaquemi bä bluca ca̦i wai lä joleaö wei bä ma cui, cafä nija bä nia waloyoluu. Bä demi cuobä, cafä nija bolacabö bä cudawä, bä nia lucäyoluu.
21’Cafänö, nii bä bluca lä waö wejei, bä bluca da dolalö. Wa bä nii fa dolalönö, canawä a jamö wa bä tablabä. Cafä wamacö iyabä, yalo bä ca̦i iyaö mö feduobä, bä nii cuobä —a nowa tama.
22Inaja showawä Noewä a cuaama. Yai Bada tänö a nosiemaö lä cuaano weinaja, a nosie juaö cadidio showaoma.
अहिले सेलेक्ट गरिएको:
Génesis 6: GUU
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2012, All Rights Reserved