MATIU 3
3
Jɔn Nguamɔi Yewɔ Yia Lelei
(Mak 1.1-8; Luk 3.1-18; Jɔn 1.19-28)
1A watii na, Jɔn Nguamɔi i wɛilɔ Judia yeendɔgbɔ lambɛi ma i tɔtoo a Ngewɔ yiɛi lɛla 2yɛ, “A wounve wu jumbuisia ma ajifa Ngelegoohu Mahayɛi ma i gutua!” 3#Ais 40.3 Jɔn lɔ wɔɔ Ngewɔ layie lemɔi Aisaya i ngi yɛpɛ leni ji i ndeni yɛ,
“Numu yila lɔ hee lama ndɔgbɔ
lambɛi ma yɛ,
‘A pele la Ndemɔi wɛ; wu pele wɔnangɔ la
ngi jiava la!’ ”
4 #
2Mah 1.8
Jɔn maguleisia ti gbatɛngɔ yɛla a nyɔma yomboi lɔ, hua-gɔlɛi yeehakpɛi i ngi lia, tawao ngi mɛhɛɛ lɔ wɔɔ a kondeisia kɛɛ kɔmii. 5Nungaa ti yɛlɔ a wa ngi gama ta gbua Jelusalɛm kɛɛ Judia lɔlei hu gbi kɛɛ ndɔlei na i yɛ Jɔdan yɛi gblanga. 6Ti yɛlɔ a gaye a ti jumbuisia, a ti wua a Ngewɔ yɛi Jɔdan hu.
7Kia Jɔn i Farisii gboto lɔni kɛɛ Sadusiisia ta wa ngi gama ti wuavaa, i ndeilɔ ti ma yɛ, “Wu kaalingɛi jisia kaasoo va! Yee lɔ wu lahii wila va kpaalɛi ma Ngewɔ i njeima hugutungɔ? 8A hindei nasia wie ta kɛ kɛ wu wounvenga wu jumbuisia ma. 9Tawao waa gili la kɛ kpaalɛi a veelalɔ wu ma ji wa nde wɛɛ, ‘Mu gbuanga Ebraham hu lɔ’; gbamaile, gbɛɛ ngi nde wu ma, Ngewɔ gungɔe a piela kɔtii jisia ti ndeengaa le Ebraham wɛ. 10Kiahuna koonii lɛngɔenga nguliisia ti hapiisia mahu; ngulu gbi ii wuɛilɔ a nguluwa yekpengaa Ngewɔ a pɔlɔ i pili ngɔmbui hu. 11Nga wu wua a njɛi lɔ kɛva kɛ wu wounvenga wu jumbuisia ma, kɛɛ numu lɔ wama nya wooma i leweni nya ma poloŋ, ngi gɔwɛi vulii ngii gbekpeni houva mba. A wu wua a Ngewɔ Yafei lɔ kɛɛ ngɔmbui. 12Ngi vɛɛlei lɔ ngi yeya witii kpɛlɛɛ yafɛva. A witi yekpei lɛlɔ ngi gbuwui la, i yeekɛi mɔ a ngɔmbui na ɛɛ lufe kunafɔ.”
Jɔn Lɔ Yesu Wuama
(Mak 1.9-11; Luk 3.21-22)
13A watii na Yesu i gbuailɔ Galili i wa Jɔn gama Jɔdan yɛi la aako Jɔn i ngi wua. 14Kɛɛ Jɔn longɔ yɛla i pie ngi lii i wote, faale i ndeilɔ yɛ, “Bia mia mahoungɔ bi nya wua. Gbɛe na bɛɛ ngi bi wua?”
15Yesu i ndeilɔ ngi ma yɛ, “I wie hii a watii ji. Gbamaile hii ma pie aako mu Ngewɔ liimɛi wie.” Kɛ Jɔn i lumanga.
16Kia lekee Jɔn i Yesu wuani, i gbuani njɛi hu, ngelei i lawoilɔ kɛ i Ngewɔ Yafei lɔnga a yei kia bomukuloi na, i hei ngi ma; 17#Jɛn 22.2; Saam 2.7; Ais 42.1 kɛ ngoo i gbuanga ngelegoohu yɛ, “Nya liima Hindoloi lɔ a ji, ngi hinda i nya goohu nɛngɔ wa le.”
अहिले सेलेक्ट गरिएको:
MATIU 3: MENNT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Mende New Testament © The Bible Society of Sierra Leone, 2002.
