Tshibangidilu 1
1
KU MBANGILU
Mvidi Mukulu udi ufuka bintu ne bantu
1Dituku dia kumpala Mvidi Mukulu kufuka diulu ne buloba.#1.1 Badi mua kusangisha kabidi kan. 1 ne kan. 2, kuandamuna ne: Pavua Mvidi Mukulu mubange kufuka diulu ne buloba, 2 buloba buvua…
2Pa buloba pavua tshianana kapayi tshintu, anu midima miaba yonsu. Mueyelu wa Mvidi Mukulu#1.2 Mueyelu wa Mvidi Mukulu: badi mua kuandamuna kabidi ne: lupepele lukole. ke uvua unyunguluka pa mayi. 3Mvidi Mukulu kuamba ne: “Butoke buenzeke!” Butoke kuenzekabu.#1.3 Tangila 2 Kor 4.6. 4Mvidi Mukulu kumona ne butoke budi buimpe, kupandukaye butoke ne midima. 5Kuinyikaye butoke ne: “Mmunya,” midima ne: “Mbutuku.”
6Dituku dibidi Mvidi Mukulu kuamba ne: “Tshibuashibuashi tshienzeke munkatshi mua mayi, bua kupandulula mayi adi muinshi ne adi mulu!” 7Mvidi Mukulu kufuka tshibuashibuashi bua kupandulula mayi adi muinshi ne adi mulu. Kuenzekabi nanku. 8Kuinyikaye tshibuashibuashi ne: “Ndiulu”.
9Dituku disatu Mvidi Mukulu kuamba ne: “Mayi onsu adi muinshi mua tshibuashibuashi adisange muaba umue, buloba bume bumueneke.” Kuenzekabi nanku. 10Mvidi Mukulu kuinyika muaba mume ne: “Mbuloba,” mayi avua madisange ne: “Mmayi manene.” Mvidi Mukulu kumona ne bionsu bidi bimpe. 11Mvidi Mukulu kuamba ne: “Bikunyibua bitoloke pa buloba, bisosa bidi biela nzeba ne mitshi idi ikuama bimuma bia mishindu yonsu.” 12-13Pa buloba kutoloka bisosa bidi biela nzeba ne mitshi idi ikuama bimuma bia mishindu yonsu. Kuenzekabi nanku. Mvidi Mukulu kumona ne bionsu bidi bimpe.
14Dituku dinayi Mvidi Mukulu kuamba ne: “Mulu muikale bimunyi bua kuleja dishilangana dia munya ne butuku. Bimunyi abi bikale bimanyinu bia matuku, bidimu ne bikondu bia bibilu, 15bikale kabidi bitokesha pa buloba bujima.” Kuenzabi nanku. 16Mvidi Mukulu kufuka bimunyi binene bibidi: diba bua kutokesha mu munya, ngondu bua kukenkesha butuku. Kufukaye mitotu kabidi.#1.16 mitotu: mu matunga mavule ku kale, bantu bavua batendelela mitotu bu mvidie. Kadi Mukanda wa Tshijila udi ujadika ne: mitotu idi amu bintu bidi Mvidi Mukulu mufuke. 17Mvidi Mukulu kubiteka mu tshibuashibuashi bua bitokeshe pa buloba, 18diba ditokesha mu munya, ngondu ukenkesha butuku. 19Kumonaye ne: bionsu bidi bimpe.
20Dituku ditanu Mvidi Mukulu kuamba ne: “Mu mayi muikale minyinyi mishilangane, kabidi nyunyi ibuke mulu mu tshibuashibuashi!” 21Mvidi Mukulu kufuka minyinyi minene ne mikese idi yenda mu mayi ya mishindu ne mishindu, ne nyunyi yonsu idi ibuka mulu ya mishindu mishilangane. Kumonaye ne bionsu bidi bimpe. 22Mvidi Mukulu kubiela lupemba, wamba ne: 23“Nuluangane, nuwuje mayi manene, nyunyi ivulangane pa buloba bujima.”
24Dituku disambombu Mvidi Mukulu kuamba ne: “Pa buloba pikale nyama ya mishindu yonsu: bilandadi, nyama ya ditu ne bimuna.” Kuenzekabi nanku. 25Mvidi Mukulu kufuka nyama ya pa buloba ya mishindu yonsu, bimuna ne bilandadi bia mishindu mishilangane. Kumonaye ne bionsu bidi bimpe.
26Mvidi Mukulu kuamba ne: “Tufuke muntu mufuanangane netu, bua ikale mfumu wa minyinyi ya mu mayi, nyunyi ya mulu, bimuna, bilandadi ne bintu bionsu bidi pa buloba.”
27Mvidi Mukulu kufuka bantu,
bafuane Mvidi Mukulu mene.
Kubafukaye mulume ne mukaji.#1.27 bafuane Mvidi Mukulu mene: Tshib 5.1—2, 9.6; 1 Kor 11.7. — mulume ne mukaji: Mat 19.4; Mar 10.6.
28Kubelaye lupemba, wamba ne: “Tantayi, nulelangane, nuvulangane buloba bujima. Nubukokeshe, nuikale bamfumu ba minyinyi ya mu mayi, nyunyi ya mulu, bimuna, bilandadi ne bionsu bidi pa buloba.” 29Mvidi Mukulu kubambila ne: “Mbanupeshi midioku yonsu ya pa buloba idi ne ntete, ne mitshi yonsu idi ikuama bimuma, bikale biakudia bienu. 30Kadi nyama yonsu, nyunyi ya mulu ne bilandadi, mbayipeshi bidimenena, bikale biakudia biayi.” Kuenzekabi nanku. 31Mvidi Mukulu kukenketa bintu bionsu bivuaye mufuke, kumonaye ne: bidi bimpe bitambe.
अहिले सेलेक्ट गरिएको:
Tshibangidilu 1: TSH96
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible avec Livres Deutérocanoniques en Tshiluba © Société Biblique de la R. D. Congo, 1996