KEJADIAN 8
8
Ik yenggeltil lahibahon ino wamburuk latfag ane
1Allahn hun Nuh men lebe ruruk angge kou fam kilapfahon arimano men fahet apeleg am fug angge wenggel haruk lit siyelu monde fibagma ik yenggeltil lahibahon ino wamburuk latfag. 2Ik kinangman laharukon ino eleha feseruk lit pohol fil sok lare fisibagma osit eleg atikim itano 3ik yenggelfahon ino firig atil wamburuk latfag. Ik ino wambuk fug angge weregman eneg hup teng fuwaben 150 atfagma wamburuk latfag. 4Pikalem sabiron fam hup nanggolop fumahen atfagma kou ino tom Ararat atelma wambibag. 5Ik ino firig atil wamburukmen eneg pikalem numon ket inam atfag sambil tom yaron arimano atel inam atuk latfag.
6Hup teng misig nubam hilag nuwalen welatfareg Nuh inowen keyenteg ele husi fibareg 7suwe gagak kut hahon wili fisibag. Wili fisibagma suwe ino ik ahum pali ke la wam turukmen eneg ik obog toho firig atuk latfag. 8Firig atikim hun Nuh inowen ik ino mondabi eleg aha ano ulug suwe yalma hahon misig wili fibag angge famen 9ik ino kinang obog toho hondo reg latfagma suwe ino hur atuk ambeg elehen nin suhuloho kou ino iraham libagma Nuh ino inggik wili fibareg lisoho kou elma kila fibag. 10Hup sabirenam welatfareg suwe yalma hahon ino nin wili fibag. 11Wili fisibag sambil ino hupmu suwe inowen e zaitun inggila olukon misig ambilikmu saluk toho walug watfagma Nuh inowen ik firig aha ulug oluk atfag. 12O sabirenam eke welatfareg Nuh inowen suwe ino nin wili fibagma libareg suhuloho watfag fug.
13Hun Nuh indag tibag sali mo ilig am wirig am turukmen teng sabit fimahen nubam hilag misig 601 atfagma pikalem misihon inam atfag sambil ik ino mondabi firig atfagma Nuh inowen kou ino ungga salfahon piyare fibareg walinggoho yet harukmen kinang lilog tegma yet hibag. 14Pikalem pirenehon fam hup teng misig atfagma kinang mondabi lilog atfag.
15Lilog atfagma Allahn Nuh fam ele uruk lit, 16”Hat huhe humalikisi unuhesi men kou famen wilip amek! 17Lebe ruruk angge kinangma larukon men pohol ke larukon men suwonet toronet anggolo amuhupteg o kema-kema welamuhuben obog toho walug wilip atlihip!” ibag. 18Ibagma Nuh ino uhe umalikisi unuhesi men kou ino famen wilip atuk lit 19lebe ruruk angge arimano ununuk wal taneg palu heheg wilip enepfag.
Hun Nuh inowen Allah fahet hubu lahapfag ane
20Wilip atfareg itano Nuh inowen Ninikni Allah fahet hubu lahapmin ulug helep sengget watfareg lebe ruruk angge kinangma larukon men pohol ke larukon men Allah fahet umbuk tehon ununuk wal taneg werehon misig-misig watfareg indok yalfag. 21Nuh inowen yalehekon amben fano ulug Ninikni Allahn ahiyeg hibareg indimuwen wenggel haruk lit, ”Fobik aben siyag ane turuk ulug Anden kinang aru huluwap tuhuk fug. Ap enebe ket su atuk liyen inindimu siyag ane eneg wenggel harukon An noluk angge famen sat wereg angge obog toho ketiya unusirikik hag toho nin fobik siyahap enebuhuk fug. 22Kinang aru eleg am fug angge wereg li suburu yaho feheg yahal teheg turuk lamuhup, molok aheg sun aheg turuk laruhu, hibi welaheg osit nenggeg turuk laruhu, hup aheg sakan teheg turuk laruhu,” ibag.
अहिले सेलेक्ट गरिएको:
KEJADIAN 8: YLI
हाइलाइट
शेयर गर्नुहोस्
कपी गर्नुहोस्
Want to have your highlights saved across all your devices? Sign up or sign in
@ LAI 2018