Genesi 5
5
Situgulwana sa Adhamu kala Nowa
(1 Dzikoronika 1:1-27)
1Eli khu libhuku nya longoloko nya situgulwana sa Adhamu.
Gikhati Nungungulu a vangidego muthu, a mu vangide nya idzosaye ni uye mune Nungungulu. 2#Wona gambe: Gen 1:27; Mat 19:4; Mark 10:6. A di va gira mwama ni nyamayi, a va giride a va kategisa, litshigu a va giridego a di va riya lina nya gukhuye “Muthu.”
3Avbo Adhamu a nga tshanganisago lizana ni magumararu (130) myaga, a di velega gyanana nya mwama, nya mufananiso ni giyemo nya idzosaye ni uye, a gi riya lina nya gupwani khu Seta. 4Hwane nya gu na velegide Seta, Adhamu vbanyide livbandre na mararu mazana (800) myaga, a gu velega talo nya sanana nya vama ni vanyamayi. 5Adhamu fude nari ni livbandre na mana mazana ni magumararu (930) myaga nya guvelegwe gwaye.
6Seta nari ni lizana ni livbandre myaga nya guvelegwe gwaye, a di velega Enosi. 7Hwane nya gu na velegide Enosi, Seta vbanyide yimbe livbandre na mararu mazana ni livbandre na mivili (807) myaga, a gu velega talo nya sanana nya vama ni vanyamayi. 8Seta Fude na vbanyide livbandre na mana mazana ni likhumi na mivili (912) myaga.
9Nari ni livbandre na mana magumi (90) myaga nya guvelegwe gwaye, Enosi a di velega Kayinani. 10Hwane nya guvelege Kayinani, Enosi a di vbanya gambe yimbe livbandre na mararu mazana ni likhumi na livbandre (815) myaga, a gu velega talo nya sanana nya vama ni vanyamayi. 11Gupata yatshavbo, Enosi vbanyide livbandre na mana mazana ni livbandre (905) myaga, afa.
12Kayinani a diri ni livbandre na mavili magumi (70) myaga nya guvelegwe gwaye, gikhati a velegidego Mahalaleli. 13Hwane nya guvelegwe ga Mahalaleli, Kayinani vbanyide gambe yimbe livbandre na mararu mazana ni magumana (840) myaga. A gu velega talo nya sanana nya vama ni vanyamayi. 14Kayinani vbanyide livbandre na mana mazana ni likhumi (910) myaga, afa.
15Mahalaleli nari ni livbandre na limwedo magumi ni livbandre (65) myaga, a di velega Jaredhi. 16Na velegide Jaredhi, vbanyide gambe yimbe livbandre na mararu mazana ni magumararu (830) myaga, a gu velega talo nya sanana nya vama ni vanyamayi. 17Mahalaleli fude na tshanganiside livbandre na mararu mazana ni livbandre na mana magumi ni livbandre (895) myaga.
18Jaredhi nari ni lizana ni livbandre na limwedo magumi ni myaga mivili (162), a di velega Enoki. 19Hwane nya gu velegwe Enoki, Jaredhi vbanyide gambe livbandre na mararu mazana (800) myaga, a gu velega talo nya sanana nya vama ni vanyamayi. 20Jaredhi fude na vbanyide tanga nya livbandre na mana mazana ni livbandre na limwedo magumi ni myaga mivili (962).
21Enoki nari ni livbandre na limwedo magumi ni livbandre (65) myaga nya guvelegwe gwaye, a di velega Metusalema. 22Hwane nya gu na velegide Metusalema, Enoki vbanyide gipimo nya mazana mararu (300) myaga na gu landrisa gugola gwa Nungungulu, a di velega talo nya sanana nya vama ni vanyamayi. 23Matshigu yatshavbo nya guvbanye ga Enoki, mazana mararu ni livbandre na limwedo magumi ni livbandre (365) myaga. 24Enoki a di landrisa gugola ga Nungungulu gikhati gyatshavbo, a di mwalalega nyamba wonwa gambe. Kholu Nungungulu a di mu dzega aya khala naye.
25Nari ni lizana ni livbandre na mararu magumi ni livbandre na mivili (187) myaga nya guvelegwe gwaye, Metusalema a di velega Lameki. 26Hwane nya gu na velegide Lameki, Metusalema a di vbanya gambe livbandre na mavili mazana ni livbandre na mararu magumi ni myaga mivili (782), a gu velega talo nya sanana nya vama ni vanyamayi. 27Metusalema fude na vbanyide livbandre na mana mazana ni livbandre na limwedo magumi ni livbandre na mina (969) myaga.
28Lameki na tshanganiside lizana ni livbandre na mararu magumi ni myaga mivili (182) nya guvelegwe gwaye, a di velega gyanana nya gikhwathana, 29a gu gi riya lina nya gupwani khu Nowa, kholu a di khuye: “Egi gi na hi vbungulela sigaradzo ni gulemela nya mithumo ya mandza yathu, nya mafu yaya ma vadwego khu Pfhumu Nungungulu.” 30Hwane nya guvelege Nowa, Lameki vbanyide gambe livbandre mazana ni livbandre na mana magumi ni livbandre (595) myaga, a gu velega talo nya sanana nya vama ni vanyamayi. 31Gu pata yatshavbo, Lameki vbanyide tanga nya livbandre na mavili mazana ni livbandre na mavili magumi ni livbandre na mivili (777) myaga, afa.
32Nari ni tanga nya livbandre mazana (500) myaga, Nowa a di velega Semi, Kami ni Jafeti.
अहिले सेलेक्ट गरिएको:
Genesi 5: BGE2014
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
A Bíblia em Gitonga © Bible Society in Mozambique, 2014.