PĚNDARIADI 8
8
Kapapurạ u lěba
1Ruata e tawe miwu len Noakẹ̌ dingangu kal᷊awọu binatang apạewen dingange su ral᷊ungu kapal᷊ẹ̌ ene. Ruata e napatịu u anging, hakịu akẹ e nanětạ e nohọ. 2Kal᷊awọu simbul᷊u akẹ bọu al᷊ungu wanua ringangu kal᷊awọu tukadu akẹ su l᷊angị e nihěpingʼE. Tahiti e nawaesẹ̌, 3dingangu akẹ e mangkeng kạkaohọ e. Nal᷊iung 150 su ěllone tangu, akẹ e seng tawe tumanịu marangẹ. 4Su tanggalẹ̌ kapul᷊o pitune su wul᷊ang kapitune, kapal᷊ẹ̌ e nasilade su pusungu wul᷊udu Ararat. 5Akẹ e měngkatewe nohọ kụ su tanggalẹ̌ humotong su wul᷊ang u liwugẹ̌, manga pusungu wawul᷊urange nanětạ e himobẹ.
6Nal᷊iung ěpạ u pul᷊o su ěllone, i Noakẹ̌ e nanopẹ e těbangeng u kapal᷊ẹ̌ e, 7kụ napatěllạ u manụ gaga sěmbaụ. Manụ ene tawe nẹ̌sul᷊e sarang kapal᷊ẹ̌, kaiso měngkate tụtěllạ tamai-ramahi sarang dalulung e namara-mara. 8Bọu e i sie naměllọ u paluma sěmbaụ, pinẹ̌kakěllaěng, měnsang akẹ e seng nohọ. 9Kai ual᷊ingu akẹ limẹ̌bạ su kaguwạu dunia tangu paluma ene tawe nakạdeạ darorokange. Tangu nẹ̌sul᷊e kapia sorong kapal᷊ẹ̌ i sie; kụ i Noakẹ̌ e měngkatewe nangogoru limane ringangu něngal᷊ạ paluma e nisuẹ̌ su kapal᷊ẹ̌. 10I Noakẹ̌ e rel᷊ain nangampal᷊ẹ̌ pitu ěllo karěngụ e, kụ bọu e saụko naměllo u manụ u paluma. 11Nawawěllọe tangu, paluma ene nẹsul᷊e su anune piạ daungu zaitun melong su mohonge. Ene kinaěnnaěng i Noakẹ̌ u akẹ e seng saụ nohọ. 12Bọuten nangampal᷊ẹ̌ pitu ěllo kapia, i sie saụewe napatěllạ u paluma sěnsul᷊ẹ kapia; kụ sěnsul᷊e ene tangu manụ ene semben tawe nẹ̌bal᷊ị su anune.
13Su tempong i Noakẹ̌ umure 601 su taunge, su tanggalẹ̌ humotong bul᷊ang humotong, akẹ e seng naohọ. I Noakẹ̌ e nělekesẹ̌ atụ u kapal᷊ẹ̌ e, kụ bọu ene nakasilọ e runia nangělikụ e. I sie nakasilo nạung bowon dunia e seng namara.
14Su tanggalẹ̌ karuam pul᷊o pitune wul᷊ang karuane, ěntana e namarạ e kahěnga-hěngang. 15Bọu e Mawu Ruata e něhengetangke si Noakẹ̌, 16”Sěbangke wọu kapal᷊ẹ̌ ene e i kau ringangu kawingu, ringangu manga anạu ore lai manga kawingʼi sire e. 17Apasěbangko kěbị kal᷊awọu manụ u kinoaěng dingangu binatang bal᷊ine e, gaghuwạ arau lai rarodọ, tadeạu i sire wotonge měhite mělanagẹ̌ mal᷊awọ su kasěllahu dunia e.” 18Ene timumpạ e i Noakẹ̌ bọu kapal᷊ẹ̌ ene ringangu manga anạ e ringangu manga anạ e ringangkewen kawingʼi sire sěngkatau-sěngkatau. 19Kal᷊awọu manụ u kinoaěng, dingangu binatangu rul᷊unge, nasuẹ e nahunsěbang bọu kapal᷊ẹ̌ ene, tuhụewe komol᷊angu asal᷊ʼi sire.
I Noakẹ̌ nangonggọu sasěmba
20I Noakẹ̌ e nẹ̌koạ pananěmbaěng baugu Mawu. I sie nangal᷊ạ pẹ̌sěmbaụ bọu apang haghing manụ u kinoaěng, dingangu manga binatang bal᷊ine kụ mawal᷊iri e, mase piněllọe su pananěmbaěnge, nikoạ sasěmba tẹ̌tutungang su wowom pananěmbaěnge. 21Dal᷊uru mawěngi wọu sasěmba ene e makal᷊uasẹ̌ naungu Mawu e, hakịu i Sie něhengetangke su ral᷊ungu naunge, ”Iạ seng ta mẹ̌saụ mangane dunia e ual᷊ingu kakanoạ u taumata; Iạ masingkạ u roken deng mangudạ, sipirang u taumata e ral᷊akị. Kụ Iạ e semben tawe saụ mamate kal᷊awọu apan diadikang biahẹ̌, kere wuhu Takụ nikoạ e. 22Karěngụewen dunia ini wědang ene, sěntiniạ mang piạ musungu pěngangasị, musungu maměnsạ, musungu matěho, musungu matětị, musungu tahiti, ěllo ringangu hěbi.”
अहिले सेलेक्ट गरिएको:
PĚNDARIADI 8: SXN
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्