Mrk 9
9
1Yesu atlhela aku ku vone: Nihlayelamfuri nan'wibyela: Van'we ku lava vayimiki kola vangakhumbiwi hi lifu vangasinavona a Mfumu wa Xikwembu Nkulukumba wuta hi ntamu.
Kundrulutiwa ka Yesu
(Mt 17:1-13; Lk 9:28-36)
2Antrhaku ka masiku ya ntlhanu na drin'we, Yesu ateka Petrosi na Yakobe na Yohana, avayisa anhaveni ya kuleha na vali vuswavu, kutani andrulutiwa amahlweni kwavu, 3a swiyambalu swake swiphatima swiva swa ntlhohe kufana ni xitrhwatrhwa; lakakuva kungena muhlampswi amisaveni lweyi angakotaka ku swibasisisa xiswoswo. 4Kutani a vadondrisiwa vavona Moxe na Eliya vahumelela ku vone, vakhanela na Yesu. 5Petrosi aku ku Yesu: Mudondrisi, i swahombe loko hitrhamisa kola! Ahiyakeni mintronga miraru: Mun'we wuva waku, mun'wana wuva wa Moxe, mun'wana kambe wuva wa Eliya. 6Ke, afa angativi leswi ahlayaka swone, hikusa vone afaka valinikutxhava ngopfu. 7#Lavisa Mrk 1:11; Fanisa ni Mps 2:7; Ezy 42:1. Kutani a tlavi drihumelela, drivafukumeta, ni ritu ledri dripfaka tlavini driku: Lweyi i N'wananga lweyi arandrekaka muyingelani! 8Kutani a vadondrisiwa vahatla valavisa a matlhelo hinkwawu vangahavoni mhunu loko ange Yesu ntsena kun'we na vone.
9Loko vafulamela hansi ka nhava, Yene avalaya leswaku vangabyeli mhunu leswi vaswivoniki, loko N'wana wa Mhunu angasinapfuka-kufeni a makari ka vafi. 10Vone vabekisa a ritu ledro atimbilwini tavu, na vavutisana leswaku xana a kupfuka-kufeni, amakari ka vafi he swakuyini? 11#Fanisa na Mlk 3:23. Vamuvutisa vaku: Ha yini a vatrali vaku Eliya afanela a kuranga ata? 12#Lavisa Ezy 53:3; Mps 22:1-18. Yene aku ku vone: Eliya swifanekeli aranga ata ha kunene, atlhelisela hinkwaswu akululameni. Nakone xana ku Matralwa kutraliwi yini hi N'wana wa Mhunu, swaku atavaviseka ngopfu ni kudreliwa? 13Kambe nan'wibyela leswaku Eliya atile mfuri vamuyentxi hinkwaswu leswi vangaswirandra, swanga heswi kutraliwiki hinkonta yake.
Yesu ahanyisa a wa mimoya leyi mimfani
(Mt 17:14-21; Lk 9:37-43a)
14Loko vatlhasa ku vadondrisiwa van'wana, vavona xitrhungu xikulu lexi xivatrhandreliki, ni vatrali lava vakanetanaka navu. 15A xitrhungu hinkwaxu xaku ximuvona xihlamala xitrutruma xiyamulosa. 16Kutani Yene avavutisa aku: Xana n'wikanetana yini na vone? 17Mun'we axitrhungwini ayangula aku ku Yene: Mundondrisi, nitisi a n'wananga ku wene, angani moya wa mbheveve. 18Hinkwaku lomu wu mukhomaka, wamutlatlalata, kutani a mufana asungula a kutlhutlha ni duvi, aketrela menyo, awomelela. Nikombeli a vadondrisiwa vaku leswaku vahlongola a moya lowo kambe vahlulekile.
19Kambe Yene avayangula aku: Yoo! Lixaka ledri dringapfumelikiki! Xana nitava na n'wine kuyagama kwini? Xana nitan'wilehisela mbilu kuyagama kwini? Buyisani a mufana lweyo ku mine. 20Kutani vamutisa ku Yene. A moya lowu afaka wuli ku mufana lweyo, loko wuvona Yesu, wuhatla wumutrekatrekisa hi ntamu, awa hansi, ava apfingalava ahumexa duvi. 21Yesu avutisa a tatana wakwe aku: Xana swamuhumeleli swiyentxa leswi hi nkama wini? Ayangula aku: Swasunguli na ahali ntrongo. 22Mfuri wumutxukumeti kunyingi andrilweni kumbe amatini akuva wumusuvisa. Loko uswikota, hipfune uhiyentxela vurombe! 23Yesu aku ku yene: Loko kuli kuswikota; hinkwaswu swakoteka ku lweyi apfumelaka. 24A tatana wa ndrisanyana ahatla abandlukana aku: Napfumela, kambe niyengeteleli kupfumela kwanga!
25Yesu avoniki xitrhungu lexi xitrutrumeliki ku yene, atshinya a moya lowu mfani aku ku wone: We moya wa mbheveve ni kuka ungayingeli, nakuleleta nili: huma ku ndrisanyana, ungahanhingeni ku yene! 26A moya wubandlukana wumutrekatrekisa hi ntamu wuhuma. A ndrisanyana andruluka swanga hi loko afile, lakakuva lava vanyingi vaku afile. 27Kambe Yesu amukhoma hi voko, amusekelekisa, yene ayima.
28Kuti loko Yene atlheleli ndlwini, a vadondrisiwa vakwe vamuvutisa na vali vuswavu vaku: Hine hihluleki ha yini kuwuhumexa? 29A vayangula aku: A lixaka ledri adrina kuhuma loko kunge hi kukhongota (ni kutitrona).
Yesu avulavula kambe hi lifu drakwe
(Mt 17:22-23; Lk 9:43b-45)
30Yesu ni vadondrisiwa vasuka kolahu vatremakanya hi dra Galileya, kambe Yesu afa angarandri kutibyiwa hi mhunu. 31Hikusa afa adondrisa a vadondrisiwa vakwe aku ku vone: A N'wana wa Mhunu atanyiketiwa amavokweni ya vhanu. Vatamudlaya, kambe atapfuka loko kuhundri masiku mararu. 32Kambe vone afa vangadriyingeli a ritu ledro, na kone afa vatxhava a kumuvutisa.
Lweyi nkulu a Mfun'wini wa Matilo
(Mt 18:1-5; Lk 9:46-48)
33Kutani vatlhasa a Kapernawume. Loko vali ndlwini, Yene avutisa a vadondrisiwa aku: Xana afa mikhanela yini andleleni? 34Kambe vone vamiyela, hikusa andleleni afa vakanetani hileswaku lweyi anga nkulu hi mani. 35Yene, atiki atrhamisa, avitana lava va khume na vabiri aku ku vone: Loko mhunu adjula kuva lweyi wa kuranga, atava lweyi wa vugamu ni nandra wa hinkwavu.
36Kutani atekiki ntrongwana, amuyimisa amakari kwavu, amuxingara, aku ku vone: 37Lweyi ayamukelaka mun'we wa vatrongwana vanga hi lava hi vito dranga awaniyamukela, na kone lweyi aniyamukelaka angayamukeli mine, kambe ayamukela lweyi anirumiki.
Lweyi angalwiki na hine, ayima na hine
(Lk 9:49-50)
38Yohana aku ku Yene: Mundondrisi, hivoni mhunu ahlongolaka mademoni hi vito draku, kambe himutsimbile, hi leswi angahilandrikiki. 39Kambe Yesu aku: N'wingamutsimbeni hikusa akuna mhunu lweyi atakahamba a mahlolana hi vito dranga, atakakota kuhatla anihleva. 40Hikusa lweyi angalwikiki na hine, ayima na hine. 41Hikusa lweyi ataka n'winwisa a ntrheko wa mati hi vito dranga hi leswi n'winga vaka Kriste, nihlayelamfuri nan'wibyela nili, angaka angalahlekeliwi hi hakelo drakwe.
Ungayise van'wana a kudoheni
(Mt 18:6-9; Lk 17:1-2)
42Yesu aku: Lweyi atakayisa kudoheni mun'we wa lava vatrongo lava vapfumelaka ku mine, swingava swahombe ku yene loko atrimbeleliwa ribye dra kusila anhan'wini, atxukumetiwa likhulwini. 43Loko a voko draku drikuyisa akudoheni, dritreme. I swahombe ku wene a kunhingena avutomini, atilweni na uni voko drin'we, kutlula loko uya akheleni, andrilweni lowu wungatimekiki na una mavoko mabiri. [ 44Laha swivungu swingafikiki ni laha ndrilo wungatimekiki.#9:44 A ndrimana leyi ayikumeki ku matralwa manyingi ya Khale. ] 45Ni loko a nenge waku wukudohisa wutreme. I swahombe ku wene kunhingena Tilweni na uni nenge wun'we kutlula loko utxukumetiwa akheleni na una minenge mibiri. [ 46Lomu a swivungu swingafikiki ni ndrilo wungatimekiki#9:46 A ndrimana leyi ayikumeki ku matralwa manyingi ya Khale.] 47Ni loko a tihlu draku drikudohisa drisuse. I swahombe unhingena a Mfun'wini wa Xikwembu Nkulukumba na una tihlu drin'we ntsena, kutlula loko una mahlu mabiri utxukumetiwa kheleni, 48#Fanisa na Ezy 66:24. lomu a swivungu swingafikiki, ni ndrilo wungatimekiki. 49Hikusa lweyo ni lweyo atalungiwa hi ndrilo, kufana ni loko a munyu wulunga a swakuda. 50A munyu i ntxhumu lowu wunene, kambe loko wone wupswhama, xana wutanandrikisa ha yini ke? Djulani, mun'wana-ni-mun'wana akulunga a vutomi byake, n'wihanya hi kurula hinkwenu van'we ni van'wana.
अहिले सेलेक्ट गरिएको:
Mrk 9: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
