Mrk 6
6
Yesu loko anga yamukeliwi a Nazarete
(Mt 13:53-58; Lk 4:16-30)
1Kuti loko Yesu aya atikweni dra kwavu, a vadondrisiwa vakwe vamulandra. 2Kutani loko Savata dritlhasile asungula a kudondrisa asinagogeni. Lava vanyingi vamuyingeliki vahlamala vaku: Xana lweyi aswikumi kwini leswi? Hi lebyi bya kuyini a vutlhari lebyi anyikiwiki byone? Ni mahlolana lawa yangi hi lawa mayentxiwaka ha yene? 3Xana lweyi, ahi yene lweyi wa muvatli, n'wana Maria ni makwa Yakobe, na Yosefa, na Yudasi, na Simoni? Xana a vamakwavu va vaxisati ava kola kweru, xana? Kutani vakhunguvanyeka ha Yene. 4#Lavisa Lk 4:24; Yhn 4:44. Kambe Yesu aku ku vone: A muprofeta angapfumali a xitxhavu, loko kungali atikweni dra kwavu, amaxakeni ni le ndlwini yake. 5Kutani angayentxanga kone, nambi drili hlolana drin'we, loko kunge kuntlhanteka a mavoko ku timbabyi tinge-tingani, atihanyisa. 6Ahlamala hi kukala kupfumela kwavu. Ahangatifambela hi miti adondrisa.
Yesu aruma a vadondrisiwa lava khume na vabiri
(Mt 10:5-15; Lk 9:1-6)
7Kutani avitana lava va khume na vabiri asungula a kuvaruma ha vabiri-vabiri, 8avanyika a ntamu wa kuhlongola mimoya leyi mimfani avaleleta leswaku vangateki ntxhumu wa ndlela, loko yinge nhonga ntsena; vangateki kati, ni hwama, ni mali a mabandini, 9kambe vayambala ntsena tintangu, mfuri vangayambali swiyambalu swibiri. 10Atlhela aku ku vone: Hinkwaku lomu n'witakanhingena kone, trhamisani, n'wikondra n'wisuka ku tiko ledro. 11Nakone loko ku mun'we mbangu vayala a kun'wiyamukela ni kun'wiyingiseta, sukani kone n'wiphumuna a ntrhuri#6:11 Kuphumuna a ntrhuri titangwini i xikombiso xa kutrema ka ntwananu wa kukari. Swikombisa leswaku a mupostola angana nandru ku lava avatisiki, nambi ku ntrhuri wa misava ya kone, lowu wungavaka wunamareli ku tintangu takwe. lowu wunga minengeni yenu, swanga xitiviso ku vone. 12Kutani a vadondrisiwa vafamba, vayakhongotela a vhanu leswaku vandruluka. 13#Fanisa na Ykb 5:14. Nakone vahlongola mademoni minyingi, vatota hi mafura a timbabyi tinyingi, vatihanyisa.
Kufa ka Yohana Mubabatisi
(Mt 14:1-12; Lk 9:7-9)
14A mufumi Heroda#6:14 Kuhlayiwa Heroda Antipasi, lweyi afumiki a Galileya. ayingeli swa Yesu, hikusa a vito drakwe afa dridrumile matlhelo hinkwawu, na van'we vaku: Yohana Mubabatisi apfukiki kufeni, hi swoswo-ke angani ntamu wa kuyentxa mahlolana. 15Kambe a van'wana afa vaku: Hi Eliya. A van'wana kambe, vaku: I muprofeta, swanga hi mun'wana wa vaprofeta. 16Kambe Heroda, aku awaswiyingela, aku: Kunene Yohana lweyi ningamutrema a nhloko, apfukile.
17Ha kunene Heroda hi ntshima yake, afa arumi vhanu kukhoma Yohana, vamupfalela abohelweni hinkonta ya Herodiyasi a nkata Filipi makwavu, hikusa afa amutekile akuva nsati wakwe. 18Yohana afa abyeli Heroda aku: Aswikufanelanga a kuteka a nsati wa makwenu. 19Nakone Herodiyasi afa anyenya Yohana Mubabatisi adjula ni kumudlaya, kambe afa angana ntamu wa kuyentxa leswo. 20Hikuva Heroda afaka atxhava Yohana, hi kumutiva leswaku i nuna wa kululama ni wa kuhlawuleka afa amuxirelela. Mfuri afa loko amuyingela, avaviseka ngopfu, kambe nambi swili tanu, afa anyoxa loko amuyingela.
21Kambe kutlhasa a siku drinene ku Herodiyasi. Loko Heroda ahambela a tindruna takwe, ni varangeli vayimpi, ni vakulu va-le-Galileya, a nkhuvu wa kudrimuka kubelekiwa kwake. 22Kutani a n'wana wa Herodiyasi#6:22 Man'wana matralwa mani swaku: An'wanakwe Herodiyasi. wa wanhwanyana anhingena akina. Atrhavisa Heroda ni lava vatrhamiki na yene akudeni, lakakuva a mufumi abyela lweyi wanhwanyana, aku: Kombela leswi uswirandraka, nitakunyika. 23Ayengeta amudumbisa, aku: Leswi utakakombela swone, nitakunyika, nambi kuli kukupumbela a mfumu wanga hi le makari.
24Lweyi wanhwanyana ahumiki ayavutisa a mamana wakwe aku: Xana nitakombela yini? A mamana wakwe aku: Kombela a nhloko ya Yohana Mubabatisi. 25Lweyi wanhwanyana anhingeniki hi kukahlula, akombela ku mufumi, aku: Nirandra leswaku uninyika swoswi-swoswi, ambakeni, a nhloko ya Yohana Mubabatisi. 26Kutani a mufumi avaviseka, kambe hinkonta ya kudumbisa kwake, ni hinkonta ya lava vatrhamiki akudeni, angakotanga kumuyalela. 27Ahatliki aruma mun'we ku masotxha, amuleleta a kubuyisa a nhloko ya Yohana. A musotxha ahangafamba ayatrema a nhloko ya Yohana, 28ayibuyisa hi mbaka, anyika lweyi wanhwanyana. A nhwanyana ayayinyika a mamana wakwe. 29Vaswiyingela a vadondrisiwa va Yohana vata, vateka a ntrumbu wakwe, vayawulahla axireni.
Yesu aphamela xitrhungu xa kutlula ntlhanu wa makume ya madzana (5000)
(Mt 14:13-21; Lk 9:10-17; Yhn 6:1-14)
30Loko a vadondrisiwa vabuyile vahlengeletani ku Yesu, vamudrungulela hinkwaswu leswi vaswitiriki, ni leswi vaswidondrisiki. 31Yene aku ku vone: Tanani, ahifambeni vusweru ambangwini wa hula mitawisa kutrongo. Hikusa a vhanu vanyingi afa vata, na vafamba lakakuva vone vangakumi ni nkama wakuda. 32Kutani vasuka hi byatrhu, vaya ku mbangu wa hula na vali vuswavu. 33Kambe a vhanu vanyingi vavavona loko vafamba vavativa, kutani vatrutrumela kone hi minenge vapfa mitini hinkwayu, vaya varangela.
34Aku ahuma abyatrhwini, Yesu avona xitrhungu xikulu. Axitwela vurombe hikusa afa xifana ni tihamba leti tingeke na mubyisi; asungula a kuvadondrisa mintxhumu minyingi. 35Loko dripela, a vadondrisiwa vatrhindrekela ku Yene vaku: Lavisa a mbangu lo i hula, na kone a dambu drapela. 36Vatlhelise vatiyela amasin'wini ni le mitini leyi mihitrandreliki, vayatixavela a swakuda. 37Kambe Yene avayangula aku: Vanyikani n'wine vada. Vaku ku yene: Xana hitayaxava makati ya madzana mabiri (200) ya mali ya ntlhohe#6:37 A mali ya ntlhohe afa yikombisa a muholo wa siku dra mutiri wa le masin'wini. Lavisa Mt 20:2. hitatavanyika vada xana? 38Yesu aku ku vone: Xana n'wini makati mangani, xana? Fambani n'wiyalavisa. Vone loko vaswitivile vayangula vaku: Ntlhanu wa makati na tinhlampfi tibiri.
39Kutani avaleleta leswaku vatrhamisisa a vhanu hinkwavu hi mintlawa-ntlawa, abyanyini lebyi bya lihlaza. 40Vahangatrhamisa hi mintlawa-ntlawa ya dzana (100), kumbe ya ntlhanu wa makume (50). 41Kutani ateka a makati ya ntlhanu ni tinhlampfi tibiri, alavisa atilweni atlangela Xikwembu Nkulukumba. Hi kulandra akhemelela a makati anyika a vadondrisiwa akuva vayavela a vhanu, na tone tinhlampfi tibiri avayavela hinkwavu. 42A vhanu vahangada hinkwavu vava vaxura, 43vava varolela a swibubyana swa makati ni minhluvi ya tihlampfi, vatata a swihundru swa khume na swibiri. 44Lava vadiki a makati afa vali vhanu va ntlhanu wa makume ya madzana (5.000).
Yesu afamba henhla ka mati
(Mt 14:22-33; Yhn 6:16-21)
45A ntrhaku ka leswo, Yene asindrisi a vadondrisiwa vakwe a kunhingena abyatrhwini, vamurangela halahaya Betsaida na yene ahahangalasa a xitrhungu. 46Kuti loko avahangalasile asuka aya anhaveni akuyakhongota. 47Amadambyeni afa a byatrhu drili makari ka tiva, na Yene asali ntlhaveni vuswake. 48Kuti loko avavona a vadondrisiwa na vaxaniseka hi kuweta, hileswi a mheho afaka yivayalela. Ata ku vone ankameni wa mpundru, na afamba hi le henhla ka lwandle, afa adjula a kuvahundra hi tlhelo aya mahlweni. 49A vadondrisiwa loko vamuvona, na afamba hi le henhla ka lwandle, vapimisa leswaku i xipoko, kutani vabandlukana hi kutxhava, 50hikusa hinkwavu afa vamuvonile kutani vatxhukisiwa, kambe Yene ahatla akhanela navu aku: Tiyisani timbilu; hi mine minga txhaveni! 51Ahanganhingena abyatrhwini ava kun'we na vone, kutani a mheho yimiyela. A vadondrisiwa vahlamala ngopfu. 52Hikusa afa vangayingelisisanga a swa makati, hi leswi afaka a timbilu tavu tinonon'hwa.
Yesu ahanyisa timbabyi a Genizarete
(Mt 14:34-36)
53Kuti loko vawelile, vaya tikweni dra le Genizarete vakhinsa kone. 54Loko vahumi byatrhwini, a vhanu vahatla vamutiva, 55hikola ka leswo a madrungula ya ku tlhasa kwake mahangalaka hi tiko ledro hinkwadru, vasungula a kubuyisa hi vunanu lava vavabyaka, hinkwaku lomu vayingelaka leswaku Yene akone. 56Mfuri hinkwaku lomu afaka vanhingena kone: amitanini, ni le switikwanini, a vhanu afa vabeka timbabyi atihubyini, vakombela akuva a timbabyi tikhumba a swiyambalu swake. Hinkwavu lava afaka vamukhumba, afa vahanyisiwa.
अहिले सेलेक्ट गरिएको:
Mrk 6: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
