Lk 24
24
Kupfuka ka Yesu kufeni
(Mt 28:1-10; Mrk 16:1-8; Yhn 20:1-10)
1Hi siku dra kusungula dra vhiki, ampundrwini wa vuxa, a vavasati vatlhasa xireni, na vatameli mafura ya kunun'hwela lawa mabekisiwiki. 2Vakuma ribye dri pfinguliwi kule ni xira. 3Vanhingeniki, vangawukumi ntrumbu wa Hosi Yesu. 4Vaku nava hakarateka ha swone, lavisani vavanuna vabiri, vahumelela, vayima na vone, na vayambali swiyambalu leswi swakuphatima. 5Vavani kutxhava, vakaramelisa liso ahansi. Kambe vavanuna vaku ku vone: Xana n'widjulela yini lweyi ahanyaka ku lava va kufa? 6Drimukani leswi angan'wibyelisa xiswone, loko ahali Galileya, 7leswaku N'wana wa Mhunu swifanekeli anyiketiwa mavokweni ya vhanu va swihono, avambiwa, kutani atapfuka hi siku dra vuraru. 8Vahanga drimuka maritu ya Yesu. 9Vasukiki xireni, vaya bika hinkwaswu leswo ku lava va khume na mun'we ni ku van'wana hinkwavu. 10Afa ali Maria wa Magadala, na Yuhwana, na Maria mamana wa Yakobe; navo van'wana lava afaka vali navu, vayabikela vapostola swoleswo. 11Kambe ku vapostola a maritu lawu afa mahamba swanga hi xihitana, vangapfumeli. 12Kambe Petrosi asuka atrutrumela xireni. Ayahlomela, avona makapulana ntsena, ahanga kutimukela kaya kwake, na ahlamala hi leswi swiyentxekiki.
Vadondrisiwa andleleni ya Emawusi
(Mrk 16:12-13)
13Hi siku droledro, lavisani, vabiri ku vone, afa vaya mutini lowu wunga kule na Yerusalema hi mimpfhuka ya khume dra makilometro ni ntlhanu, a vito dra wone anga Emawusi. 14Andleleni afa vatikhanelela hi timhaka hinkwatu leti tiyentxekiki. 15Vaku na vahavulavula, vavutisana, Yesu hi ntshima yake atrhindrekela ku vone, afamba na vone. 16Kambe a mahlu yavu afa maxireliwile, mahluleka kumutiva. 17Yesu ahangaku ku vone: I maritu muni lawa n'wivutisanaka ha wone, la ndleleni na n'wihlunamile? 18A mun'we ku vone a vito drakwe afaka ali Kleyopasi, ayangula aku ku yene: Xana akuva wene vuswaku ku vayaki va Yerusalema, lweyi angativikiki leswi swiyentxekiki kone a masikwini lawa xana? 19Aku ku vone: Hi leswakuyini xana? Vaku ku yene: Aswa Yesu wa le Nazarete, lweyi afaka ali muprofeta wa ntamu, akutireni ni le kudondriseni, amahlweni ka Xikwembu Nkulukumba ni le ku tiko hinkwadru. 20Ni leswaku a vaprista lava vakulu ni tindruna teru vangamunyiketa akuyavanyiseliwa kufa, vava vamuvamba. 21Kambe hine afa hidumba leswaku atava yene lweyi atakavani kutirula Israyele! Kambe kutani i siku dra vuraru na timhaka leti tiyentxekile. 22Kambe avan'we vavasati va le kweru vahihlamalisi ngopfu; vavindruki vaya xireni, 23avawukumanga a ntrumbu wakwe. Vabuya navaku, vavoni mahlolana ya swirun'wa leswi switiki, awahanya. 24A van'wana ku va-kweru, vasuka vaya xireni, vaya kuma swili swoswi a vavasati vahlayisiki xiswone, kambe Yesu avamuvonanga.
25Yesu aku ku vone: Yo! Vhanu lava vakuka vangayingeli, lava vatimbilu leti tinanaka kupfumela hinkwaswu leswi vaprofeta vangahlaya swone! 26Xake, afa swingafanekeli Kriste atwa kuvaviseka, ava anhingena kuphatimeni kwake? 27Ahangasungula ku Moxe ni vaprofeta hinkwavu, a vatlhavukanyisa aMatralweni hinkwawu, a timhaka leti tikongometaka yene.
28Vatrhindrekela mutini lowu afaka vaya ku wone; kambe Yesu ahamba swanga hi loko adjula kukhaluta. 29Kambe vone vamuphikelela vaku: Trhama na hine namuhla, hikusa i madambu, ni dambu dripelile mfuri. Yesu ahanganhingena atrhama navu. 30Kuti loko atrhami navu akudeni, ateka kati atlangela ku Xikwembu Nkulukumba, akhemelela avayavela. 31A mahlu yavu mahangapfuleka, vamutiva; kambe yene avanyamalalela. 32Vone vabyelana vaku: Xana a timbilu teru afa tingapfuri a ndreni kweru, loko ahavulavula na hine andleleni, ahi pfuletela Matralwa?
33Vasukiki hi nkama wolowo, vabuyela Yerusalema, vaya kuma lava va khume na mun'we na vahlengeletani kun'we ni lava afaka vali navu, 34lava valiki: Kunene Hosi yi pfukile! Yi tivonekisi ku Simoni! 35Na vone lava vapfiki hi le Emawusi, vadrungula leswi swihumeleliki ndleleni, ni leswi atibyiwiki hi vone a kukhemeleleni ka kati.
Yesu loko ahumelela ku vapostola
(Mt 28:16-20; Mrk 16:14-18; Yhn 20:19-23; Mnt 1:6-8)
36Vaku na vahakhanela, Yesu ayima makari kwavu, aku ku vone: A kurula akuve na n'wine. 37Kambe vone vakhindlimuka vatxhava, vapimisa leswaku vavona xintrhuti. 38Yesu aku ku vone: Xana n'wikhindlimukela yini? Xana a miyanakanyu leyi ya kunhatu mihumelelela yini atimbilwini tenu? 39Lavisani mandla ni minkondro yanga, leswaku hi mine hi ntshima yanga. Nitevetelani n'wivona, a xintrhuti axina miri ni marambu swanga hi leswi n'winivonaka ninganaswu. 40Atiki avabyela leswo, avakomba a mandla yake ni minkondro yake. #24:40 A man'wana matralwa ama nayu ndrimana leyi. 41Vaku na vangasipfumela hinkonta ya kutrhava ni kuhlamala, aku ku vone: Xana n'wini swakuda kola xana? 42Vamunyika nhluve wa nhlampfi leyi ya ku woxiwa. 43Ateka ada mahlweni kwavu.
44Yesu ahangaku ku vone: Hiwo maritu lawa ningan'wibyela, loko nahali na n'wine niku: Swifanekeli kuhetiseka hinkwaswu leswi swingatraliwa hinkonta yanga aNawini wa Moxe ni le madrunguleni ya vaprofeta ni le Swidrumiseni. 45Kahangava kone apfulaka swifuva swavu, akuva vayingelisisa Matralwa 46aku ku vone: Switralisiwi xiswoswo, leswaku Kriste atatwa kuvaviseka, apfuka makari ka lava vakufa hi siku dra vuraru, 47kutadondrisiwa matiko hinkwawu hi vito drakwe akundruluka, ni kudrivaleliwa ka swihono, akusungula hi Yerusalema. 48N'wine n'wi timboni ta mintxhumu leyi. 49Lavisani, nitan'wirumela leswi n'widumbisiwiki swone ha Tatana. N'wine trhamani kola Yerusalema, n'wikota n'wiyambexiwa ntamu wa le henhla.
Kuntlhantuka ka Yesu atilweni
(Mrk 16:19-20; Mnt 1:9-11)
50Kutani Yesu avayisa ahandle ka muti, kuyatlhasa Betaniya. Atlakuxa mavoko henhla, avakatekisa. 51Na ahavakatekisa, akutravukana navu, antlhantukelisiwa Tilweni. 52Vone vamugandrela, kutani vatlhelela Yerusalema hi kutrhava loku kukulu, 53afa vava kone a Tempeleni masiku hinkwawu, vatwalisa Xikwembu Nkulukumba.
अहिले सेलेक्ट गरिएको:
Lk 24: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
