Lk 13
13
Xivilelo xa kundruluka
1Ankameni lowo kavini van'wana lava vangabyela Yesu swa va Galileya, lava Pilato angapatrinyeta ngati yavu kun'we ni ngati ya swihari swa timhamba tavu. 2Yesu ayanguli aku ku vone: Xana n'wipimisa leswaku a va-Galileya lavo afa vali swidohi kutlula va-Galileya kulobye hinkwavu, leswi vanga kuma khombo ledro xana? 3Im'hi, nili ku n'wine kambe loko n'wingandruluki, n'witasuvisa xiswoswo na n'wine. 4Nambi vali lava va khume na ntlhanu na vararu, lava a xihondro xa Silowe xingavawela henhla xivadlaya, xana n'wipimisa leswaku afa veni nandru lowu wutlulaka wa vhanu hinkwavu lava vayakiki Yerusalema? 5Im'hi, nili ku n'wine kambe loko n'winga ndruluki, n'witasuvisa xiswoswo hinkwenu.
Nsinya wa kupfumala mihandru
6Yesu a yengesa avabyela xifaniso lexi: A mhunu afa ani nkuwa lowu wusimekiwiki alivhinyeni drakwe. Ata, atatadjula mihandru ku wone, angamikumi. 7Aku ku lweyi wa mudrimi: Lavisa! Kuhundri malembe mararu na nitatadjula mihandru ankuweni wolo ningamikumi. Wutreme; xana wuhonela yini a misava xana? 8A mudrimi ayangula aku ku yene: N'winyi wanga, ungawutrika ni lembe ledri, nitakela amatlhelweni ya wone, nitxhela vulongo; 9kumbe xana wutahumexa mihandru haxawu. Loko swingali tanu, utawutrema.
Yesu ahanyisa wansati hi Savata
10Yesu afa adondrisa a sinagogeni hi Savata. 11Afa kuni wansati, lweyi afaka axanisiwa hi moya wa mavabyi, ha khume dra malembe na ntlhanu na mararu (18). Afa awovekile angaswikoti ni kutrongo kuwololoka. 12Amuvoniki Yesu, amuvitana, aku ku yene: Wansati, u ntrhunxekile avuvabyini byaku. 13Ava amuntlhanteka ni mavoko, hi nomu-lo awololoka, adrumisa Xikwembu Nkulukumba. 14A n'winyi wa sinagoga avayangula na ahlundrukile hileswi Yesu amuholisiki hi siku dra Savata, abyela xitrhungu aku: Kuna ntlhanu wa masiku na drin'we lawa swifanekelaka kutira ha wone. Tanani ha wone n'witataholisiwa, kunge hi siku dra Savata. 15Kambe a Hosi yi muyangula yiku: N'wi vamandrendre! A mun'wana-ni-mun'wana wenu xana angantrhunxi a homu yake, kumbe mbongolo, axidelweni hi Savata, ayiyisa kunweni? 16Kambe lweyi, anga n'wana Abrahamu, Sathana angamuboha ha khume dra malembe ni ntlhanu na mararu (18), xana afa swingafanekeli akuva antrhunxiwa kubohiweni koloko hi siku dra Savata xana? 17Atiki Yesu ahlaya leswo, vava ni tingana avalala vakwe hinkwavu. Kambe a xitrhungu hinkwaxu xitrhava hi hinkwaswu leswi swakuxonga leswi swiyentxiwiki ha Yesu.
Nhleke ya sinapi#13:17 Sinapi i vito dra nsinya wa kukari, lowu wunga wukulu swinene kambe a nhleke ya wone i yitrongo ngopfu swinene.
(Mt 13:31-33; Mrk 4:30-32)
18Hileswo-ke, Yesu avabyela aku: Xana a Mfumu wa Xikwembu Nkulukumba wufana na yini? Nitawufanisa na yini xana? 19Wufana ni nhleke ya sinapi leyi mhunu ayitekiki ayayibyala xirambeni xakwe. Yimila, wuva nsinya lowu wukulu ngopfu lakakuva a tinyanyana titatatumbela atinkambyini ta wone.
20Atlhela aku: Nitafanisa a Mfumu wa Xikwembu Nkulukumba na yini? 21Wufana ni handrelo leyi a wansati ayitekiki, ayibehela mapeni ya mimpimu miraru makota makukumuka.
Ndlela ya vutomi lebyi byingahelikiki
(Mt 7:13-14,21-23)
22Yesu afa atifambela hi miti ni mitana adondrisa, na akhomi a ndlela ya kuya a Yerusalema. 23A mun'we mhunu aku ku yene: Hosi, xana lava vahulukaka i vakuhlawa xana? Kambe Yesu aku ku yene: 24Khinyelani kunhingena hi nyangwa leyi ya kukhuma hikusa nan'wibyela, lava vanyingi vatadjula kunhingena kambe vatahluleka. 25Kutaku loko a n'winyi wa yindlu asekeleki apfala nyangwa, n'witasungula kuyima ahandle n'wigongondra n'wiku: Hosi hipfulele. Kambe yone yitan'wiyangula yiku: Anitivi lomu n'wipfaka kone. 26Hi kone n'witakaku: Hadi, hinwa amahlweni kwaku, mfuri wadondrisile atihubyeni teru. 27A Hosi yitaku: Nan'wibyela nili: Anitivi lomu n'wipfaka kone. Sukani ku mine, n'wine hinkwenu vasomboloki. 28Hi kone kutakava ni swidrilo ni kuketrela ka menyo, loko n'wivona Abrahamu na Yisaki na Yakobe ni vaprofeta hinkwavu, aNfun'wini wa Xikwembu Nkulukumba, kasi n'wine n'witxukumetiwi ahandle. 29Vatapfa Vuxeni ni le Vupeladambu ni le N'walungu ni le Nyingitimu, vatatrhama kudeni aNfun'wini wa Xikwembu Nkulukumba. 30Xileswo vakone lava vakugamisa vatakava vakuranga; na swone vakone lava vakuranga vatakava vakugamisa.
Yesu atwela vurombe Yerusalema
(Mt 23:37-39)
31 # Lavisa Lk 3:1. Ankameni wolowo kati vambeni va Vafarisi, vaku ku yene: Suka la ufamba, hikusa Heroda adjula kukudlaya. 32Yesu aku ku vone: Fambani n'wiyabyela a buwana ledro, leswaku nihlongola mademoni, nahaholisa timbabyi namunhla ni mundruku, niva niheta hi siku dra vuraru. 33Ntsena kudjuleka nifamba namunhla ni mundruku ni mundlwana; hikusa aswifaneli leswaku a muprofeta adlayiwa a handle ka Yerusalema. 34Yerusalema, Yerusalema! Wene udlayaka vaprofeta, uva ukhandletela hi maribye varumiwa lava Xikwembu Nkulukumba avarumaka ku wene! Afa niswirandri kungani ke a kuhlengeleta vanaku swanga hi huku loko yihlengeleta switxuwana swa yone ahansi ka timpapa ta yone, kambe awuswirandranga! 35#Lavisa Mps 118:26. Lavisani a yindlu yenu yitasala vuswayone. Kambe nan'wibyela nili, n'wingahandrivoni, kukota kutlhasa siku ledri n'witakaku: Akutovokisiwe lweyi ataka hi vito dra Hosi.
अहिले सेलेक्ट गरिएको:
Lk 13: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
