Lk 1
1
1 # Lavisa Mnt 1:1. Murandriwa Teofilo: Lava vanyingi vadringisile kudrungula matimu ya leswi swihumeleliki amakari kweru, 2na vadondrisi va Nawu leswi hingativisiwa hi lava vangaswivona hinkwaswu kusukela akusunguleni, na vandruluki malandra ya ritu. 3Nakone, na mine ntrhaku kakuva nikambisisi hi vunyaminyami hinkwaswu leswi swihumeleliki kusukela akusunguleni, nikumi leswaku swingaxonga kukutralela swone, hi ndlela ya longoloko, 4akuva utatiya ku leswi vakudondrisiki swone.
Kutivisiwa ka kubelekiwa ka Yohana Mubabatisi
5Ankameni wa Heroda, mufumi wa Yudeya, afa kuni muprista lweyi a vito drakwe afaka ali Zakariya, wa ntlawa wa Abiya. A nsati wa Zakaria, afa ali Elizabeta, wa vana va Aroni, muprista. 6Afa vali valulami hi vubiri byavu amahlweni ka Xikwembu Nkulukumba, vafamba milawini hinkwayu ni le swileletweni hinkwaswu swa Hosi, vangasoliwi ha ntxhumu. 7Kambe afa vangena vana hi leswi Elizabeta afaka ali xihiko, mfuri afa vaduhwalile hivubiri byavu.
8Siku drin'wana, Zakariya afa ali Tempeleni alandra ntiro wakwe swanga muprista, hikusa afa wuli nkama wakwe.#1:8 Hikusa hinawu, ku ntlawa wa vaprista lava vakulu, mun'we ku vone afa atamela ntiro wa le Tempeleni hi xipimu xa vhiki: lavisa 1 Mk 24:19; 2 Mk. 23:8. 9Afa wuli ntoloveto a makari ka vaprista, kuyentxa mpswhampswha akuvona leswaku i mani lweyi afanelaka kunhingena a Tempeleni akuva ahisa magandrelo vuhiselweni. 10Na ali kari ahisa magandrelo a vhanu afa vakhongota a handle. 11Kolahu kuhumelela ntrumi ya Hosi ku Zakaria, na yiyimi axineneni xa vuhiselo bya magandrelo. 12Kuti loko Zakariya avona ntrumi atxhuka kutani atala hi kutxhava. 13Kambe ntrumi yiku ku yene: Ungatxhavi Zakariya! Hikusa akukhongota kwaku Xikwembu Nkulukumba akuyingelile: Elizabeta, nsati waku, atakupswalela n'wana, utamutxhula vito dra Yohana.#1:13 Yohana hi xiheberu swikomba leswaku a Hosi ya swikota. 14Atava xitrhaviso ni kutrhavisisa ku wene, ni lava va kutala vatatrhavela kubelekiwa kwake. 15A n'wana atava nkulu amahlweni ka Xikwembu Nkulukumba. Angatinwa vhinyo nambi swakunwa swini ni swini swakubava loko apswaliwile, atava a tali hi Moya wa Kuxwenga. 16Atayentxa leswaku vanyingi va-Israyelea vatlhelela ku Hosi Xikwembu Nkulukumba wavu. 17Yene atafamba mahlweni ka Hosi, na ani moya ni ntamu swanga Eliya, akuva andruluta a timbilu ta vapswali ku vana, ni kundruluta lava va kuka-kuyingiseta vavani mayanakanyela ya valulami, ni kululamisela a Hosi a xitrhungu lexi xitibekiseliki.
18Kolahu Zakariya avutisa a ntrumi aku: Xana nitaswitiva hayini leswo, hikusa niduhwalile na yene a nsati wanga aduhwalili? 19A ntrumi yiyangula yiku ku yene: Mine ni Gabriyele. Ni le ntirweni wa Xikwembu Nkulukumba na Yene anirumi kutatakhanela na wene akuva nikunyika a madrungula lawa ya manene. 20Kambe, swanga hi leswi ungapfumelangakiki ku leswi nikubyeliki, utava mbheveve kukota kutlhasa a siku ledri switakahumelela, hikuva hinkwaswu switayentxeka ankameni wa kone.
21A vhanu lava afaka varindrela Zakariya, vahlamala hi kuhlwela kwake a Tempeleni. 22Loko yene ahumile, ahluleka kukhanela, kutani vone vayingelisisi leswaku ave ni xivoniso. Akhanela navu hi swikombiso ni kuya mahlweni na ali mbheveve.
23Loko Zakariya aheti masiku ya ntiro a Tempeleni, atlheleli kaya. 24Ntrhaku ka nkama wa kukari, Elizabeta avini nyimba, na angahumi ndlwini hi mpfhuka wa ntlhanu wa tihweti. 25A Hosi yiniyentxeli xiswoswo, hi kunivonisisa, akuva yihelisa a tingana#1:25 A wansati loko angabeleki afa avoniwa na ali wa tingana na kone afa swivoniwa swanga xikhatiso xa Xikwembu Nkulukumba. Lavisa Ms 30:23; I Sm 1:5-8; II Sm 6:23 Hx 9:11. tanga amahlweni ka vhanu.
A ntrumi yitivisa kubelekiwa ka Yesu
26Loko Elizabeta ani nyimba ya ntlhanu wa tihweti na yin'we, Xikwembu Nkulukumba arumi ntrumi Gabriyele amutini wa le Galileya lowu valiki i Nazarete, 27ku mun'we wa nhwanyana wa kuka-angasinativana ni wanuna, afaka abutiwi hi wanuna wa yindlu ya Davida, valiki hi Yosefa; a vito dra lweyi wa nhwanyana afa ali Maria. 28A ntrumi yitiki yinhingena lomu afaka ali kone yiku ku yene: Xawani, wene, ukumiki timpswalu leti tikulu! A Hosi yina wene. 29Kambe yene atxhuka hi kuyingela a maritu lawo, kutani ayanakanya leswaku xana alosela ledri i ledri dra kuyini. 30Kutani a ntrumi yiku ku yene: Ungatxhave Maria, hikusa ukumi timpswalu ku Xikwembu Nkulukumba! 31Vona, utavani nyimba, utabeleka a n'wana wa wandrisanyana, utakamutxhula vito dra Yesu. 32Yene atava nkulu, atahlayiwa N'wana wa Lweyi wa le henhla-henhla; Hosi, Xikwembu Nkulukumba atamunyika a xitrhamu-xa-vufumi xa Davida, tatana wakwe; 33atafuma hi la kungahelikiki a yindlu ya Yakobe, a mfumu wakwe wungativani vugamu.
34Kolahu Maria aku ku ntrumi: Xana switayentxisa kuyini, leswi ningasikinativana ni wanuna? 35Kambe a ntrumi yimuyangula yiku: A Moya wa Kuxwenga wutaxikela ahenhla kwaku, ni ntamu wa Lweyi wa le henhla-henhla wutakufukumeta swanga hi tlavi.#1:35 A tlavi, ku Testamente dra khale afa drikombisa a vukone bya Xikwembu Nkulukumba. Lavisa Khm 13:21-22, 19:16; 24:16. Hileswo-ke lweyi atakapswaliwa i wa kuxwenga, atatxhuliwa N'wana wa Xikwembu Nkulukumba. 36Na yene, Elizabeta a xaka draku atava ni n'wana wa wandrisanyana avuduhwatini byake. Lweyi afaka vaku aswinakukoteka kuvani vana, kambe swoswi ali ku hweti ya vuntlhanu na yin'we. 37Hikusa ku Xikwembu Nkulukumba akuna xa ntxhumu lexi xingakotekikiki ku swidumbisu swake hinkwaswu. 38Maria aku: Hi mine lweyi, ni nandra wa Hosi, aswiyentxeki ku mine swanga hi ritu draku. Kutani a ntrumi yisuka ku yene.
Maria ayendrela Elizabeta
39Amasikwini lawo, Maria asuki hi kukahlula aya atinhaveni, amutini wa Yuda, 40anhingena andlwini ya Zakariya, alosa Elizabeta. 41Loko Elizabeta ayingela kulosa ka Maria, a n'wana atxhuka anyimbeni yake. Kutani Elizabeta atala hi Moya wa Kuxwenga. 42Kutani abandlukana hi ritu dra kutlakuka aku: Wene u wa kukhenseka amakari ka vavasati hinkwavu, na kone kukhenseka a n'wana lweyi anganyimbeni yaku. 43Kutani xana ni mani mine akuva a mamana wa Hosi yanga aniyendrela? 44Hikusa loko niyingeli a kulosa kwaku a n'wana atxhukile hi kutrhava andreni kwanga. 45Na swone kukateki lweyi apfumeliki leswaku leswi Hosi yimubyeliki swone switayentxeka.
Lisimu dra Maria dra kudrumisa Hosi
46Kutani Maria aku:
A hika dranga dritwalisa Hosi
47ni moya wanga wutinyoxeli ku Xikwembu Nkulukumba Muhuluxi wanga,
48hikusa alavisi a kutitrongohata ka
nandra wakwe! Hikusa lavisani, akusukela swoswi
a vhanu va minkama hinkwayu vatanihlaya lweyi wa kukateka.
49Hileswi Lweyi wa ntamu aniyentxeliki leswi swikulu.
A vito drakwe drixwengile,
50ni lilondro drakwe dri le minkameni ni le minkameni,
ku lava vamutxhavaka.
51Atiri hi ntamu, hi voko drakwe.
Ahangalasi lava va kutikulisa akuyanakanyeni ka timbilu tavu,
52Awisi lava va ntamu aswitrhan'wini swavu swa vufumi,
ava atlakuxa lava va kutrongahateka.
53Axurisi lava va ndlala hi leswi swinene,
ava atlhelisa lava kufuya na vangena ntxhumu.
54Apfunisi Israyele a nandra wakwe,
na adrimuka a lirere drakwe,
55swanga hi leswi akhaneliki ku vatatana veru,
ku Abrahamu ni vana vakwe hi la kungahelikiki.
56Maria atrhami na Elizabeta tihweti tiraru, kutani atlhelela a kaya kwake.
Kubelekiwa ka Yohana Mubabatisi
57A nkama loko wutlhasile, Elizabeta aphuluki n'wana wa wandrisanyana. 58Lava vayakelaniki na yene ni maxaka yake vayingela leswaku a Hosi yikulisi a lirere dra Yone ku yene, vahangatrhava kun'we na yene.
59Loko a ndrisanyana atlhanganisi ntlhanu wa masiku na mararu, vayamusoka, na vadjula kumutxhula a vito dra tatana wakwe Zakariya. 60A mamana wakwe aku: Im'hi! Afanela kutxhuliwa vito dra Yohana. 61Vaku ku yene: Akuna mhunu amaxakeni yaku lweyi a vitaniwaka hi vito ledro! 62Vakwehleta a tatana wakwe leswaku xana adjula akuva a n'wana atxhulisiwa kuyini. 63Zakariya akombeliki xihleleti, atrala aku: Yohana hi dro vito drakwe. Vahlamala hinkwavu.
64Hi nkama wolowo Zakariya avulavula, asungula kutwalisa Xikwembu Nkulukumba. 65Kutani hinkwavu lava vayakelaniki navu, vakhomiwa hi kutxhava, ni le tikweni hinkwadru dra le tinhaveni ta le Yudeya vahangalasa timhaka leti tihumeleliki. 66Hinkwavu lava vatiyingeliki afa vatibekisa timbilwini tavu na vaku: Xana a n'wana lweyi atava lweyi wa kuyini? Nakone a voko dra Hosi ha kunene dri na yene.
Lisimu dra Zakariya
67Zakariya a tatana wa ntrongwana, atala hi Moya wa Kuxwenga aprofeta aku:
68A kukhensiwe Hosi Xikwembu Nkulukumba wa Israyele,
leswi ayendreliki ava atirula a tiko drakwe.
69Ahitumbuluxeliki a ntamu wa kuhuluxa,
andlwini ya Davida nandra wakwe.
70Swanga hi leswi angakhanela hi nomu wa vaprofeta
vakwe va kuhlawuleka, va minkama-ni-minkama ya khale:
71Leswaku atahihuluxa ku valala veru
ni le mandleni ya hinkwavu lava vahivengaka;
72akuva ayentxela a lirere ku vatatana veru,
ni kudrimuka a xipfumelelanu xakwe lexi xa kuxwenga;
73kunga kuhlambanya loku akuhlambanyeliki Abrahamu tatana weru,
74akuta hinyika akuhuluxiwa amavokweni ya valala veru, leswaku himugandrela na hingatxhavi ntxhumu, 75hi kuhlawuleka ni kululama amahlweni kwake, amasikwini hinkwawu ya kuhanya kweru.
76Na wene, n'wananga, utahlayiwa muprofeta wa Xikwembu Nkulukumba wa le Henhla-henhla.
Hikusa utafamba amahlweni ka Hosi, akuva
ubekisa ndlela ya yone.
77Akuva utivisa tiko drakwe ni leswaku Xikwembu Nkulukumba
adridrivaleli swihono swadrone leswaku dritahuluxiwa,
78hinkonta ya lirere ledri drikulu dra Xikwembu Nkulukumba weru,
hikusa a kuphatima ka dambu loko kupfaka henhla-henhla kutahiyendrela.
79Kuphatima loko kutavaninga lava
vahanyaka munyameni
ni le ntrhutini wa lifu
ni kufambisa a mikondro yeru andleleni ya kurula.
80Kutani a ntrongwana akula, aveni ntamu amoyeni, na kone ayitrhama huleni kukondra kutlhasa a siku dra kutivonekisa kwake ku Israyele.
अहिले सेलेक्ट गरिएको:
Lk 1: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
