Yhn 6
6
Mahlolana ya kuyandrisa makati
(Mt 14:13-21; Mrk 6:30-44; Lk 9:10-17)
1Antrhaku ka leswo Yesu asuka awela tiva dra Galileya ledri valiki i Tiberiyasi#6:1 Tiva dra Galileya na kone afa dritiviwa hi vito draku Tiva dra Tiberiasi (6:23; 21:1) kumbe Tiva dra Genezareta (Lk 5:1 mavito lawa masukelaka ku miti mibiri, anga Tiberiasi na Genezareta). 2Alandriwi hi xitrhungu lexi xikulu lexi afaka xifamba naye, hikusa afa xivoni mahlolana lawa amayentxiki ya kuhanyisa timbabyi. 3Kutani Yesu antlhantukela nhaveni, ayatrhama ni vadondrisiwa vakwe.
4A nkhuvu wa Paska dra va-Yuda#6:4 A nkhuvu wa Paska wa va-Yuda wuhambanile ni nkhuvu wa Paska dra vukriste. afa wuli kusuhi. 5Kuti loko Yesu avoni leswaku a xitrhungu xikulu xita ku yene, aku ku Filipi: Xana hingaxava kwini makati akuva vhanu lava vatada xana? 6(Afa ahlaya leswo kuli kumudringa, hikusa yene n'winyi afa ativa leswi afaka ataswiyentxa.) 7Filipi amuyangula, aku: A makati ya madzana mabiri (200) ya madenari (mali ya ntlhohe) mangaka mangavayaneli nambi loko mun'wana-ni-mun'wana angakuma xikhemu lexitrongo ntse. 8A mun'wana wa vadondrisiwa vakwe, Andreyasi a makwa Simoni Petrosi, aku ku yene: 9#Fananisa ni II Vfm 4:42-44. Kuni ndrisanyana mun'we halenu, lweyi angani ntlhanu wa makati ya sevhada ni tinhlampfi tibiri; kambe kungayanela vangani ku vhanu lavanyingi swakunhati xana? 10Yesu aku: Trhamisisani vhanu. A byanyi afa byi byinyingi a mbangwini wolowo. Kutani vhanu vatrhamisa hansi; loko va hlayiwa, afa vadjula kutlhasa ntlhanu wa makume ya madzana (5.000) wa vavanuna, ntsena. 11Kutani Yesu ateka makati, kuti loko atlangeli Xikwembu Nkulukumba, ayavela vhanu lava afaka vatrhamisile; ayentxisa xiswoswo ni hi tinhlampfi, hinkwavu vada swivadringana. 12Loko vaxurile, aku ku vadondrisiwa vakwe: Hlengeletani mantlhantlha lawa masaliki, akuva kungatxukumetiwi ntxhumu. 13Vahlengeleta mantlhantlha ya ntlhanu wa makati ya sevhada, lawa masaliki, matata khume dra swihundru na swibiri (12).
14A vhanu lava vavoniki mahlolana lawa Yesu amayentxiki, vaku: Ha kunene, lweyi hi yene muprofeta lweyi afaka afanekeli kuta misaveni. 15Kambe Yesu, hi kutiva leswaku vadjula kuta, vatamuwutla akuva vamuyentxa mufumi, atlhelela nhaveni na ali vuswake.
Yesu afamba henhla ka mati
(Mt 14:22-33; Mrk 6:45-52)
16Loko dripela, a vadondrisiwa vakwe vafulamela nambyeni, 17kutani vanhingena byatrhwini, vasungula kuwelela Kapernawume; kusungula kumphuma, na Yesu angasita ku vone. 18Na swone a nambu afa wusungula kukarata hikusa mheho leyi yikulu afa yihunga hi ntamu. 19Kuti loko vaweti mpfuka wa makume mabiri ni ntlhanu, kumbe makume mararu ya mamisitada#6:19 Misitada, kuhlayiwa mpfuka wa kudringana dzana ni ntlhanu wa makume na mararu (180) wa mi metro., vavona Yesu na afamba henhla ka mati, atrhindrekela kusuhi ni byatrhu; kutani vatxhava. 20Kambe aku ku vone: Hi mine, n'wingatxhaveni. 21Afa vadjula kumunhingenisa abyatrhwini, kambe hi nomu-lo, a byatrhu driyakhisa a saveni laha afaka vakongoma kone.
Yesu, kati dra vutomi
22A siku ledri drintlantamaka, a xitrhungu lexi afaka xisali tlhelweni drin'wana dra nambu, xivona leswaku afa kungena byatrhu kone, loko dringe ledri avadondrisiwa vanganhingena ku drone, ni leswaku Yesu anganhingenanga kun'we ni vadondrisiwa vakwe; kambe vone vafambile na ve swavu. 23Kambe kuti mabyatrhu lawa mapfaka Tiberiyasi, matlhasa kusuhi ni mbangu lowu vangada makati ku wone, loko Hosi yitlangelile; 24Kuti loko ke vhanu vavoni leswaku Yesu ni vadondrisiwa vakwe afa vangehe kone kolahu, vanhingena mabyatrhwini wolawo, vawelela Kapernawume, vayadjula Yesu.
25Loko vamukumile ku tlhelo drin'wana dra nambu, vaku ku yene: Mudondrisi, xana utlhasi drini lomu? 26Yesu avayangula, aku: Nihlayelamfuri nili ku n'wine, n'wanidjula kunge hi leswi n'wingavona swikombiso, kambe hi leswi n'wingada makati n'wixura. 27N'wingatireleni swakuda leswi swibolaka, kambe tirelani swakuda leswi swingabolikiki, swinga leswi swinyikaka vutomi lebyi byingahelikiki. Leswi i swakuda leswi N'wana wa mhunu atakan'winyika swone, hikusa hi yene lweyi Xikwembu Nkulukumba Tatana amufungiki.
28Vahangaku ku yene: Hifanela kuyentxa yini a kutira mintiro ya Xikwembu Nkulukumba xana? 29Yesu avayangula, aku: A ntiro wa Xikwembu Nkulukumba hileswaku n'wipfumela ku lweyi amurumiki. 30Kutani vaku ku yene: Xana utira xikombiso xini xana, akuva hitaxivona, akuva hitapfumela ku wene? Xana utira yini? 31#Lavisa Khm 16:4-15; Mps 78:24. A vatatana veru vadi mana ahuleni, swanga heswi kutraliwiki leswaku: Avanyiki kuda kati ledri drihumaka Tilweni. 32Yesu avabyela aku: Nihlayelamfuri, nili ku n'wine: Moxe angan'winyikanga kati ledri drihumaka Tilweni, kambe Tatana wanga an'winyika kati ledri drihumaka Tilweni, ledri dringa drone. 33Hikusa a kati dra Xikwembu Nkulukumba hi ledri drixikaka hi le Tilweni, na drinyikaka a vutomi misava.
34Kolahu vaku ku yene: Hosi, hinyike kati droledro masiku hinkwawu. 35Yesu aku ku vone: Hi mine kati dra vutomi. Lweyi ataka ku mine, angavina ndlala ni siku ni drin'we, ni lweyi apfumelaka ku mine angavina tora ni siku ni drin'we. 36Kambe nin'wibyeli khale leswaku, nambi leswi n'winivoniki, an'wipfumeli. 37Hinkwaswu leswi Tatana aninyikaka, switata ku mine; kutani lweyi ataka ku mine, ningaka ningamutxukumeti ni siku ni drin'we. 38Hikusa nixiki hi le Tilweni, kunge kutatayentxa kurandra kwanga, kambe kuli kurandra ka lweyi anirumiki. 39Kutani akurandra ka lweyi anirumiki hi loku; hileswaku ningalahli ni mun'we wa hinkwavu lava aninyikiki vone, kambe nivapfuxa ku lifu vaya vuton'wini hi siku dra vugamu. 40Hikolahu-ke a kurandra ka Tatana wanga, hileswaku mun'wana-ni-mun'wana lweyi alavisaka N'wana, ava apfumela ku yene, avani vutomi lebyi byingahelikiki, kutani mine nitamupfuxa hi siku dra vugamu.
41Kutani va-Yuda va n'unun'uta hikola kwake, ni hi leswi atiki: Hi mine kati ledri drixikiki hi le Tilweni. 42Kutani vaku: Xana lweyi ahi yene Yesu n'wana Yosefa, lweyi hi tivaka tatana wakwe ni mamana wakwe xana? Kutani swoswi ahlayisa kuyini, loko aku: Nixiki hi le Tilweni. 43Yesu ayangula, aku: Kungaveni kun'unun'uta amakari kwenu. 44#Fananisa ni 6:39. Akuna mhunu lweyi angataka ku mine, loko Tatana lweyi anirumiki angamukokeli ku mine, kutani mine nitamupfuxa hi siku dra vugamu. 45#Fananisa na Ezy 54:13; Yr 31:33-34. Kutraliwi amabukwini ya vaprofeta: Hinkwavu vatadondrisiwa hi Xikwembu Nkulukumba. Hileswo-ke, mani na mani lweyi ayingeliki Tatana ni kudondra ku yene, ata ku mine. 46Ahileswaku kuni mhunu lweyi asamaka avona Tatana, loko ntsena ange lweyi ahumaka ku Xikwembu Nkulukumba avoniki Tatana.
47Nihlayelamfuri nili ku n'wine, lweyi apfumelaka, ani vutomi lebyi byingahelikiki. 48Hi mine kati dra vutomi. 49A vatatana venu vadi mana a mananga, kambe vafile. 50A kati ledri drixikaka hi le Tilweni hi drone ledri driyentxaka leswaku loko mhunu ada drone, angafi. 51Hi mine kati ledri drihanyaka ledri drixikiki hi le Tilweni; loko mhunu ada kati ledro atahanya hi la kungahelikiki, a kati ledri nitakanyika drone, i miri yanga; nin'winyika akuva n'wiva ni vutomi.
52A va-Yuda vakanetana ha vuswavu, vaku: Xana a mhunu lweyi angahinyikisa kuyini a miri yake akuva hida xana? 53Yesu aku ku vone: Nihlayelamfuri nili ku n'wine, loko n'wingadi miri ya N'wana wa Mhunu, ni loko n'winganwi ngati yake, an'wina vutomi andreni kwenu. 54Lweyi adaka miri yanga ni kunwa ngati yanga, ani vutomi lebyi byingahelikiki; kutani mine nitamupfuxa hi siku dra vugamu. 55Hikusa a miri yanga i swakuda ha kunene, ni ngati yanga i swakunwa ha kunene. 56Lweyi adaka miri yanga ni kunwa ngati yanga, atrhama ku mine, na mine nitrhama ku yene. 57Swanga hi leswi Tatana lweyi ahanyaka anirumiki, na mine nihanya hikola kwake, na yene lweyi anidaka atahanya hikola kwanga. 58Ledri hi drone kati ledrixikiki hi le Tilweni; adrifani ni ledri vatatana venu vadridiki, hikusa drone adri vasivelanga kufa; lweyi adaka kati ledri, atahanya hi la kungahelikiki.
59Yesu ahlayi timhaka leti loko adondrisa asinagogeni le Kapernawume.
Maritu ya vutomi lebyi byingahelikiki
60Loko vadondrisiwa lava vakutala va Yesu vayingeli leswo, vaku: A ritu ledri dra nonon'hwa; hi mani lweyi atakadriyingela xana? 61Kambe Yesu aswitiviki mbilwini yake leswaku a vadondrisiwa vakwe van'unun'uta hikola ka leswo, kutani aku ku vone: Xana a mhaka leyi yan'wikhunguvanyisa xana? 62#Fananisa ni 1:9-11; Yhn 1:51; Mnt 1:9-11. Switakuyini, a siku n'witaka vona N'wana wa Mhunu antlhatukela lomu afaka ekone khale xana? 63A Moya hi wone wuhanyisaka, a handle ka wone a mhunu anganakuyentxa ntxhumu. A maritu lawa nin'wibyelaka wone, i Moya ni vutomi. 64Nambi swili tanu, van'wana amakari kwenu a vapfumeli. Hikusa aswitivile ni le kusunguleni, leswaku hi vamani lava vangapfumelikiki ni leswaku lweyi atakamuwonga hi mani. 65Kuva loko ayengeta aku: Hikolahu nin'wibyeliki, niku: Akuna mhunu lweyi angataka ku mine, loko anganyikiwanga swone hi Tatana.
66Kusukela nkameni wolowo, lava vanyingi ku vadondrisiwa vakwe vatlhelela ntrhaku, vangahafambafambi na yene. 67Hi loko Yesu aku ku lava va khume na vabiri: Xana na n'wine n'widjula kutifambela xana? 68Simoni Petrosi ayangula aku ku yene: Hosi, hingaya ku mani xana? Uni maritu lawa manyikaka vutomi lebyi byingahelikiki. 69#Fananisa na Mt 16:16; Mrk 8:29; Lk 9:20. Kutani hine hini kupfumela ni kuswitiva leswaku hi wene Muhlawuleki wa Xikwembu Nkulukumba. 70Yesu avayangula aku: Xana ahi mine ningan'wihlawula, n'wine lava va khume na vabiri? Kasi mun'we ku n'wine i Diyavulosi#6:70 A vito draku Diyavulosi hi ntumbuluku wa drone dritlhamuxela: lweyi arambelaka, lweyi alumbetaka ava awonga! 71Afa ahlaya Yudasi, n'wana Simoni Iskariyota, hikusa hi yene afaka atiyimiseli ku muwonga, nambi leswi afaka ali mun'we wa lava va khume na vabiri.
अहिले सेलेक्ट गरिएको:
Yhn 6: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
