Yhn 4
4
Kukhanelisana ni wansati wa mu-Samariya
1Kati loko Yesu ativi leswaku a vafarisi afa vayingeli leswaku yene afa akuma vadondrisiwa ni kubabatisa kutlula Yohana, 2(hambi swi tanu, afa ange yene Yesu lweyi afaka ababatisa, kambe afa ali vadondrisiwa vakwe), 3asuka Yudeya atlhelela Galileya. 4Afa afaneli kutremakanya hi ku tiko dra Samariya. 5Kutani aya tlhasa mutini lowu afaka vaku hi Sikari, kole Samariya, kusuhi ni nsimu leyi Yakobe afaka anyiki Yosefa, n'wanakwe. 6Kolahu afa kuni nhlovo ya Yakobe. Hileswo-ke Yesu atrhamisa nhlobyeni, hikusa afa akaralile hi kufamba. Afa wudjula kuva nkama wa nhlikanhi.
7Kutani kutatatlhasa lweyi wansati wa mu-Samariya ataka kuta ka mati. Yesu aku ku yene: Nihanani mati ninwa. 8A vadondrisiwa vakwe vone, afa vayi mutini akuya xava swakuda. 9#Fananisa na Lk 9:52-53. Lweyi wansati wa mu-Samariya aku ku yene: Leswi wene unga mu-Yuda, ukombelela yini mati ku mine ninga wansati wa mu-Samariya xana? A mhaka ya kone hileswaku a va-Yuda ni va-Samariya afa vangatolovelani. 10Yesu amuyangula aku: Loko afa utivi nyiko ya Xikwembu Nkulukumba ni leswaku i mani lweyi aliki nihanani ninwa, ana wene ukombeli ku yene, kutani yene afa atakunyika mati lawa mahanyaka#4:10 Mati lawa mahanyaka, kumbe mati lawa matrutrumaka: Yesu akhanela hi ndlela ya kukombisa swakukari; i mati lawa manyikaka vutomi (lavisa ndrimana ya 14 na 3:3 ni xikombisu). 11A wansati aku ku yene: Hosi, awuna xikelelo, ni nhlovo yiyetile! Kutani a mati lawa mahanyaka, ungamakuma kwini xana? 12Xana ungava nkulu ku Yakobe tatana weru, lweyi ahinyikiki nhlovo leyi, mfuri na yene anganwa ku yone, yene ni vana vakwe ni swifuyu swake xana? 13Yesu amuyangula, aku: Mun'wana-ni-mun'wana lweyi anwaka mati lawa atatlhela atwa tora. 14Kambe mun'wana-ni-mun'wana lweyi anwaka mati lawa nitakamunyika wone, angaka angahatlheli atwa tora ni siku ni drin'we; kambe a mati lawa nitakamunyika wone, matava ku yene nhlovo ya mati lawa mapfelelaka, manyika vutomi lebyi byingahelikiki. 15Lweyi wansati aku ku yene: Hosi, nihanani mati wolawo, nitaka ningahatwi tora, ni kuva ningahatita la nitaka mati.
16Yesu aku ku yene: Famba, uya vitana nuna waku, n'wita halenu. 17A wansati amuyangula, aku: Anina nuna. Yesu aku ku yene: Uhlayelamfuri loko uku, anina nuna, 18hikusa uvini ntlhanu wa vavanuna, kutani ni lweyi ungana yene swoswi, ahi nuna waku; kolahu uhlaya swone. 19A wansati aku ku yene: Hosi, naswivona leswaku u muprofeta. 20A vatatana veru vagandreli nhaveni leyi. Kasi n'wine n'wili: A mbangu lowu vhanu vafanelaka kugandrela ku wone hi le Yerusalema#4:20 A ntrhaku ka kufa ka Salomoni kavini kutravukana ka mimfumu: a wa N'walungu na ntrindra ali Samaria, ni wa Nyingitimu na ntrindra ali Yerusalema. 21Yesu aku ku yene: Pfumela ku leswi niswihlayaka wansati: A nkama wata, lowu n'wingatikigandrela Tatana na n'wili nhaveni leyi, nambi kuli Yerusalema. 22#Fananisa na Ezy 2:3; Rm 9:3-4. N'wine n'wigandrela leswi n'wingaswitivikiki; hine higandrela leswi hiswitivaka; hikusa kuhuluxiwa kuhuma ku va-Yuda. 23Kambe nkama wutlhasile, lowu vagandreli lava anga vone vatakagandrela Tatana hi Moya ni xihlayelamfuri; hikusa Tatana adjula vagandreli lava va kunhatu. 24Xikwembu Nkulukumba i Moya kutani swifaneli lava vamugandrelaka, vamugandrela hi Moya ni xihlayelamfuri. 25A wansati aku ku yene: Naswitiva leswaku, Mesiya, lweyi ahlayiwaka Kriste, awata; a siku atakata, atahitivisa hinkwaswu. 26Yesu aku ku yene: Hi mine yelweyi, nikhanelaka na wene.
27Hi nkama wolowo a vadondrisiwa va Yesu vatlhasa, vahlamala hi leswi akhanelaka ni wansati. Nambi swili tanu, akuvanga ni mun'we lweyi angaku: Udjula yini? Kumbe: Ukhanelela yini na yene xana?
28Kolahu lweyi wansati asiya hotro yake, aya mutini ayabyela vhanu, aku: 29Tanani, n'wivona mhunu lweyi anibyeliki hinkwaswu leswi ningaswiyentxa. Xana angava yene Kriste xana? 30Vahangahuma mutini vaya ku Yesu.
31A nkameni wolowo a vadondrisiwa vakwe vamukhongota, vaku: Mudondrisi, dana! 32Yesu aku ku vone: Nini swakuda, leswi n'wine n'wingaswitivikiki. 33A vadondrisiwa vavutisana vaku: Xana kungavana mun'wana mhunu lweyi amubuyiseliki swakuda xana? 34Yesu aku ku vone: A swakuda swanga hi kuyentxa kurandra ka lweyi anirumiki, ni kuhetisa ntiro lowu anirumiki kuwuyentxa.
35Xana an'witoloveli kuhlaya leswaku: Kahasali mune wa tihweti, kutani kutata ntrhovelo, xana? Vonani, mine nili: Tlakuxani mahlu n'wilavisa masimu mawupfile akuva matrhoveliwa. 36A mutrhoveli ayamukela hakelo drakwe, ahlengeleta mavele avutomini lebyi byingahelikiki. Angava lweyi abyalaka ni lweyi atrhovelaka vakota kutrhava kun'we. 37Hikolahu axihlaya-hlaya lexi xiliki: A mun'wana awabyala, a mun'wana awatrhovela. 38Na mine nin'wirumi kutrhovela lomu n'wingatirangakiki kone. Van'wana vatirele, n'wine n'wekuta hi kutrhovela swa nyuku wavu.
39A va-Samariya lava vakutala vamuti wolowo vapfumela ku Yesu hikola ka leswi swihlayiwiki hi wansati, loko ati: Anibyeli hinkwaswu leswi ningaswiyentxa. 40Kolahu, loko va-Samariya vatlhasi ku Yesu, vamuramba akuva atrhama na vone; ahangayatrhama kone masiku mabiri. 41Kutani kahangayengeteleka vunyingi bya lava vapfumeliki aritwini drakwe. 42Vahangaku ku wansati: Ahahapfumeli hinkonta ya ritu draku; hikusa na hine himuyingeli ha sweru, kutani haswitiva leswaku lweyi kunene i Muhuluxi wa misava.#4:42 A tindrimana ta 39-42 tini makombisela ya kuhambana ni Ivangeli ya vadondrisi va Nawu va vasinotika (Mt, Mrk, Lk) hi tlhelo dra va-Samaria (lavisa Mt 10:5-6; Lk 9:51-55). A tindrimana ta 4:1-42 tikombisa Yesu a movoneleni ya Yohana lweyi akhanelaka na asukela a mayentxeleni ya xi-Kriste ya khale, ntrhaku ka vukhongoti bya xihundla bya Paska. A ntlhamuxelo wa tindrimana leti wuyeti ngopfu kutlula leswi yitralisiwiki xiswone.
Kuhanyisiwa ka n'wana wa ndruna
(Mt 8:5-13; Lk 7:1-10)
43Antrhaku ka masiku lawo mabiri, Yesu asuka kolahu, aya Galileya, 44#Lavisa Mt 13:57; Mrk 6:4; Lk 4:24. hikusa yene ha vuswake afa ahlayelimfuri loko ati: A muprofeta anganikiwi xitxhavu atikweni drale kwavu. 45Hileswo-ke, kutiki loko atlhasi Galileya, a va-Galileya vamuyamukela, hi leswi afaka vavoni hinkwaswu leswi aswiyentxiki a Yerusalema, ankhubyini, hikusa na vone afa vave kone.
46Kutani Yesu nangweso atlhelela Kana wa Galileya, lomu afaka andruluti mati mayentxa vhinyo kone. Kolahu afa kuni ndruna#4:46 Hi Xigirika, a vito draku ndruna drihlaya a mhunu lweyi anga ntirweni wa vufumi, kufana ni mutireli wa Heroda Antipasi., leyi afaka yivabyeliwa hi n'wana wa djaha a Kapernawume. 47Loko ndruna leyo yiyingeli leswaku Yesu asukile Yudeya ata Galileya, yita ku yene, yitatamukombela leswaku afulamela aya hanyisa n'wana wa yone, lweyi afaka ali kusuhi ni kufa. 48Yesu aku ku yene: Loko n'wingavoni mahlolana ni swihlamaliso, an'wipfumeli. 49A ndruna yiku ku yene: Hosi, hingafulamela, na ndrisanyana wanga angasanganafa! 50Yesu aku ku yene: Famba, a n'wanaku awahanya. A mhunu lweyi akholwa ku ritu ledri Yesu amubyeliki drone, kutani afamba. 51Kutiki loko ahafulamela akuya kaya, a malandra yake mamutlhangaveta, ma mutivisa, maku: A n'wana ahanyile. 52Avavutisa nkama lowu n'wana a angasungula kuyapswa ha wone. Vaku ku yene: Avi tolo, hi nkama wa ntlhanu na mibiri wa lihungu, a kuhisa ka miri kumutrikiki. 53A tatana wakwe adrimuka leswaku hi wo nkama lowu Yesu angaku ku yene: A n'wanaku awahanya. Kutani yene ni vandangu wakwe hinkwavu, vapfumela.
54Ledri i hlolana dra vubiri ledri Yesu adriyentxiki loko asuki Yudeya ata Galileya.
अहिले सेलेक्ट गरिएको:
Yhn 4: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
