LITANGA 10
10
Visukululwi via vayaayi va Nuhu
(1 Zin. 1:5-23)
1Yivi ni visukululwi via vayaayi va Nuhu, Shemu, Hamu, na Jafeza. Vavaga yava vanyoola avana vayaayi inyima wi migelera jamazi.
2Vayaayi va Jafeza vaali, Gomeri, Magogi, Madai, Javani, Tubali, Mesheki na Tirasi. 3Visukululwi via Gomeri viali avandu va Ashikenazi, Rifazi na Togama. 4Visukululwi via Javani viali avandu va Elisha, Sipeini, Saipurasi na Rode. 5Vaali avaguuga va vandu vamenya ahimbi ku visulu vienyanza. Yivi nivisukululwi via Jafeza, ivimenyi muzihiiri nivivala viavo lugano na lugano vuli muganda nigumoloma lulimi lwagwo.
6Vayaayi va Hamu vaali, Kushi, Egebeti, Libia na Kanaani. 7Visukululwi via Kushi viali, Seba, Havila, Sabita, Raama na Sabuteka. Visukululwi via Raama viali avandu kutura Sheba na Dedani. 8Kushi yaali nu muyaayi walangwa Nimurodi, uwaali mundu wu kutanga mu lirova kuva ni zinguru zinene. 9Yaali muhimi munene kigira Yahova yamukonya, kandi nicho chagira avandu vavoola, “Vwakaveeye vulahi Yahova nakokoli kuva muhimi munene kuli Nimurodi!” 10Mulitanga vwamihi vwivwe vwali, Babiloni, Ereki na Akadi, viosi vivaga viali mu Babiloni. 11Kutura mukivala yicho yazia Asiria ma ni yumbaka madaala manene ga Nineve, Rehobozi Iri, Kala, 12na Reseni, agaveeye hagati ha Nineve ni lidaala linene lia Kala.
13Visukululwi via Egebeti viali avandu va Lidia, Anami, Lehabu, Nafutu, 14Pazurasi, Kasiluhi na ava Kerete ivisukulurwi via Vafilisitia vaatura ku.
15Avayaayi va Kanaani valii, Sidoni muyaayi wimbiri na Heenzi. 16Kanaani yaali kandi guuga wa avandu va Jebusi, Amori, Girigashi, 17Hivi, Riki, Sini, 18Rivadi, Zemari na Hamazi. Zihiiri lugano na lugano zia avandu va Kanaani zia randa, 19kuduuka lwi zinzako zia Kanaani ziatula Sidoni, mulovega lwa Gerari ahimbi Gaza, kandi mulovega lwa Sodoma, Gomora, Adama na Zeboiimu ahimbi Lasha. 20Yivi nivisukululwi via Hamu, ivimenyaa muzihiiri ziavo lugano na lugano kandi nivivala viavo lugano na lugano. Vuli muganda gwamoloma lulimi lwavo.
21Shemu muyaayi wanga Jafeza wukutanga kandi yaali guuga uwi zihiiri zia Eberi ziosi. 22Avayaayi va Shemu vaali, Elamu, Ashuri, Aripakishadi Ludi na Aramu. 23Visukululwi via Aramu viali avandu va Uzi, Huli, Gezerina, Mesheki. 24Aripakishadi yaali baba wa Shela na Shela yaali baba wa Eberi. 25Eberi yaali navayayi vaviri: mulala yalangwa Pelegi, kigira mu ing'inga yeeye avandu vi kivala vagavulanywa; kandi wundi yalangwa Jokitani. 26Visukululwi via Jokitani viali avandu va Alimodadi, Shelefu, Hazarimavezi, Jera, 27Hadoramu, Uzali, Dikila, 28Obali, Abimaeli, Sheba, 29Ofura, Havila na Jobabu. Yava vosi vaali visukululwi via Jokitani. 30Kivala cha vamenya mu chaali kutura Mesha kuduuka Sefari mukivala chi kiguru Ivugwi. 31Yivi ni visukululwi via Shemu, ivimenyaa muzihiiri ziavo lugano na lugano kandi ni vivala viavo lugano na lugano, vuli muganda gwamoloma lulimi lwagwo.
32Avandu yava vosi vaveeye visukululwi via Nuhu, ihiiri ku ihiiri kolondekana ku zihiiri ziavo lugano na lugano. Inyima wi migelera jamazi zihiiri ziosi zie lirova ziatula ku avayaayi va Nuhu.
अहिले सेलेक्ट गरिएको:
LITANGA 10: LOGOOLI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Bible Society of Kenya, 2019