MATIUS 8
8
Gororomaʾ Delemoknya Hwemok Yuba
(Mrk. 1:40-45; Luk. 5:12-16)
1Yesus ara meinik ab yanggalamok dara, longomek nimi nauba alak dobol yalamek. 2Ban salek enyek, gororomaʾ adya hyak malya ura delemoknya benyek Yesus ak yeilimok. Bera Yesus saramek sam koma lumugoka lebokja, ”Neklesilimnya o, anda or senemen dara, nak bokaʾ donaʾ elegananelem,” hyok. 3Dara Yesus adya benyek salawoka lebokaʾ ara, ”Nara or senewan. Anasa bokaʾ or dobgolul e!” hyok. Dara wene sab-sab gororomaʾ delemokaʾ ara dengaro lobok. 4#Im. 14:1-32Dara onoʾ Yesus adya benyek an, ”Wei, neyung o! Yok nim ek nara unuwanel aboka nekdo yabanaʾ ara mem. Bok alda Imik Neyung yuba lenaʾ gaknya bek amal dal bilom. Anya, anda aldib merewalamaʾ amba dara, Musa bedya unulululum aboka momnya dobok sok sunuwoka, Imik Neyung amba giboka elegel binilam,” hyok.
Roma Yin Bonaʾ Dubnya Bedya Wa Wenya Hwemok Yuba
(Luk. 7:1-10)
5Wera Yesus ara Kapernaum heikek wekel yanggok bok, Roma yin bonaʾ dubnya bedya Yesus ak yeiniboka, arawananelem aboka molowok. 6Benedya lebnemokaʾ ara, ”Wenelesilimnya o, nadya wa wenya bera ek sam neiklamla. Alda esonaʾ heiboka denewokaʾ ak manaʾ ok mabmoruwoka, oka nauba delemla,” hyok. 7Dara Yesus adya, ”Wera nara alak hwel binimna,” hyok. 8Bok yin bonaʾ dubnya bedya dara, ”Nara perobnya gomaʾ anasa, anda nadya ek ara yanggununesomaʾ anasa, anda yangganaʾ ara mem. Alda anja yub adya ok merewolul hemen dara, wera nadya wa wenya bera merewanamla. 9Anasa wera nababya nadya dubnya ulunel. Onoʾ na damumduk ara, mek yin bon nang ulumakaʾ ara, nadya yuba kelenyak. Nimi yin bonnya bek lebnadya, Bilom! wenyhen dara, alda balamla. Alda, Anyagan yalom! hen dara, yalamla. Anya nadya wa wenaʾanya bek lebnadya, Banyek unuwalom! hen dara, oruganaʾ ara keboka unulamla,” hyok.
10Yin bonaʾ dubnya bedya ban wenhyok yub enyek, Yesus ara kebok dara, hyak seilinya senewok. Anya alak diriga ban nang anyagan ulumekaʾ ak, ”Ban benyek na lokja. Nimi nidyaʾ Israeli nimi gangganek sam ara, ban dib senen ganya enera hnon mekaʾ eibnenggumsa! 11#Luk. 13:29Hyak dib nongaʾ ara ban! Nimi nidyaʾ yali sam ab hnon, kemban sam ab hnon, Abraham beb, Ishak beb, Yakub beb, neikaʾ hiboka Imik Neyung bedya wenesin heikek sam dero weknemab aboka yanamak. 12#Mat. 22:13, 25:30; Luk. 13:28Bok, alda Yahudi yokaʾ nim ara, gunaʾ senenggomaʾ ulumla heik sam doro boboganasil. Dara gunaʾ heikek ab, nimi dara, nauba soloma daboka engewoka si glengdaralamnemak,” hyok.
13Dara Yesus adya yin bonaʾ dubnya bek, ”Anja dib senelamaʾ adya, nidyaʾ unuwaso senelamnya nera gigiwoka unuwanamlaʾ anasa, or bilom,” hyok. Dara al ban salek eneba, ek wanya bera merewok.
Nimi Nauba Hwebsuk Yuba
(Mrk. 1:29-34; Luk. 4:38-41)
14Yesus ara Petrus bedyaʾ ek biniboka kemelemok enyek, Petrus aldogol gera poba neiknaʾ salamokaʾ anasa mamokaʾ ak eibuk. 15Yesus adya gel genedya soruka salamok salek enyek, wera alja poba neiknaʾ ara dengaboka merewok. Dara gel gera bukoka Yesus amba denaʾ youboka ulumok.
16Wera seleb sin dangal yabok dara, bisaʾ goloklesuk nimi nauba Yesus ak bo yeilimek. Dara Yesus adya yuba mousa hnonoknya nedya ok saboka, bisaʾ yakoka, neiklemek nimi nidyaʾ merellilisuk. 17#Yes. 53:4Yesus adya ban nidyaʾ unulumoknya nera, ununumnaʾ lelemoknya Yesaya bedya,
”Nunja hmeng usinaʾ dob salawoka, nunja neiklemabnya nera bo bilisuk,”
amoknya nenyek gigiwolulaʾ aboka umok.
top Yesus Adyaʾ Yuba Donaʾ Nim Dangalamak Yuba
(Luk. 9:57-62)
18Nimi hyak nauba Yesus ulumokaʾ ak ara ulumek. Wera Yesus adya nimi mandebnaʾ enyek eibuk dara, alja yuba doro diriga ban nang ek mek gek eer sam binimab aboka orugosuk. 19Dara Yahudi yuba neksinya ben hnon Yesus ak yeiniboka, ”Neyung neklesilimnya o, or hekmok ok an binimenaʾ ak ara, naba neikaʾ yabalemnenam!” hyok. 20Wenyek Yesus adya dara, ”Bei gam ara selengaʾ e ulumlakanya, wining ara eʾ ululabok, nimi dibaʾ me ak dara, huka beilinaʾ amba ekla hnon unggulumla,” hyok. 21Dara onoʾ ben hnon, alja yuba doro diriga bannya bedya Yesus ak, ”Neyung o, nara anak diriga yalamnenggenjok men dara, biniboka nadya neyung be soko lokol binimna anasa molowan,” aboka lebok. 22Bok Yesus adya alak lebnemokaʾ ara, ”Somoklomak nim era, sik moumen soko lokoldalanok, alda anda nak diriga yanenelem,” hyok.
Meka Namenaʾ Gebok Yuba
(Mrk. 4:35-41; Luk. 8:22-25)
23Dara, Yesus ara mek ekla bunaʾ ak bukoka bununaʾ ul yabok dara, alja yuba doro diriga ban nang eneba neikaʾ buka balamek. 24Buka balamek sab-sab, hyak senenggom kaboʾ dorogoka, mek ekla bunaʾ ara mek lobsenjaʾ adya waboka olomok. Bok, Yesus ara hogunga mamok. 25Dara alja yuba doro diriga ban nang era, Yesus ak biniboka bukiyiwoka, ”Neyung o! Blebsilom! Nunda hyak orowanabsil bar!” aboka lel yabek. 26Wera anasa, Yesus adya sikenek ara, ”Ugunda hekasa lok ganya bolum do? Ugunda mekaʾ ok dib senelelum nang ululum!” hyok. Dara onoʾ Yesus ara sekoka, kaboʾ ab mek ab dara, namenaʾ dolul aboka lebok enyek, wera mek gwan era hyak namenaʾ dok. 27Yesus yuba doro diriga ban nang era, hyak loka daboka, sik moumen leldalamekaʾ ara, ”Kaboʾ ab, mek yub ab dara, alja yuba keblaʾ anasa, har so ululanya do?” wenyaldalamek.
Nimi Penya Bisaʾ Ganya Gologosukaʾ Ak Hwebsuk Yuba
(Mrk. 5:1-20; Luk. 8:26-39)
28Yesus ara mek gek Gadara moka lanal byuk. Gadara sam ara nimi penya bisaʾ gologosuk nang era, nimi soko loknaʾ ak ab ara, Yesus ak yarek. Ban penya nang enera hyak yu lok anasa, nim ara sik ulurek pik ara mekaʾ yabenggulumek. 29Wera sik penya dara, lelerekja, ”Imik Neyung bedya me o, nuk ara hekaʾ hubnesilimjok yeililam do? Unuwanasusom salek era, anam bokaʾ anaba, anda nuk lobaʾ nenewoka malya gebsununaʾ yeililam de?” alarek.
30Wera sik ulurek ak ab dara, mok so ara, pama nauba yuʾ delemek. 31Dara ban bisaʾ dara, Yesus ak, ”Anda nim ek ab goboka yibinelum aboka oruganasilim dara, wera pam ak weklulum aboka oruganasilim,” hyek. 32Dara Yesus adya bisaʾ danyek, ”Bululum!” wenhyok dara, bisaʾ era goboka pam pik wekdo yibek. Wera pam gong dara, yeiriwoka mok soko abomok langa diniwoka mek gwanek sam malyingginiboka meka si deregoka somokdo yibek. 33Danyek pama weilimek nim era, sikda heikek biniboka, nidyaʾ ban unumoknya neb, penya nang ek Yesus adya unusukaʾ anyek anaso unuwal aboka nekek. 34Dara nimi nauba heik enyekan nim era, Yesus ak eibnobaʾ aboka bilimek. Wera nimi nidyaʾ ara Yesus ak eibek dara, alak nunja mok era lo binilam aboka lemek.
अहिले सेलेक्ट गरिएको:
MATIUS 8: LAINLC
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
