Markus 2
2
Yesus nen ap inggi iyok aborlok dek mende pano kagakike wene
(Matius 9:1-8; Lukas 5:17-26)
1At Yesus inggi mbere negenat o etoma welagikesik nen, yabunggane o Kapernaum unggi lagike. Unggi lagikesik nen, uma unggisikemo, akoni nen,
“At ebe uma werek o,” yiluk yisinem inasuk kolkuka. 2Inasuk kol diluk nen, akoni inebe dogalegat nandorli waguka. Wagukama uma nggerlekogonat, monggaraila inom nggerlekogonat nandorli wagukama, wene pano wene etnogo yogisasike. 3Yogisasinem, pa inebe 4 paga nen, ap omanggi inggi iyok aborlok dek mondok welagike mende o mberlagogo wolok Yesus oba waguka. 4Wolok wagukasik, Yesus oba wolok ungguwogoluk kagakuka mende, akoni nggerlek nen, ninggit diluk wolok ungguʼbugat agikemo, o warlengge paga dagasukasik, Yesus ebe werekma mot-morat warlengge sumbuk ndalogo nen, ap inggi iyok aborlok dek mende etnogo arlit engga ndalek noge yisi lagike mende paga mberlagogo kerle kunogo wusa ʼbisuka. 5Esigit diluk wusa ʼbisukama, at Yesus ilenggen kalok nen, men yisike.
“Ap yi inendainggen an noba panggot degasik nen wolok wagaka kigi,” yiluk ilenggen enggagat iyasikesik nen, ap inggi iyok aborlok dek mende etnogo men yogokike,
“Naʼbut o. Kat weyak kagako lagan mende an nen sagalogo deget digi o,” yiluk yogokike. 6Esigit diluk yogokonem, it ap Allah wene kolal mbalek indewerek mende amberek etoma korek dogolik, it-it inakla nen,
7“Ap yi wene yeke eti, nenaluk yeke. Nit akoni weyak kagarigogi mende eti it akoni amberek nen erlok sagalogo deget diyausak nogo? At Allah arligat nen erlok sagalogo deget diyaligogo mendeat, at yi nen Allah akla kai diluk endaga weyagat diligogo,” yiluk inakla ambasuka. 8Esigit diluk inakla ambasinem, at Yesus akla nen,
“It inakla esigit diluk ambiligogi,” yiluk eranogoat didiyasikesik men yogisasike,
“Kit kinakla esigit diluk ambaligogi eti nenaluk ambaligogi. 9An nen ap inggi iyok aborlok dek mende yi, wene yogosusak, ndak alte negen nggi ambegep.
Kat weyak kagarigogon mende eti arat sagalogo deget digi, yiluk yogoki eti alte negen mende yogoki ambegep a? At te,
Kebe melatluk nen, karlit engga ndalogo noge yiligogon mende yi korlalok lan o, yiluk yogosusak alte negen ambegep a? Dek o. Kebe melatluk lan, yiluk yogosumo angginat o. 10Anggin mendeat ogwe, an abat endak lasi wagagi etnogo agat oba yoma dogolik, akoni yi weyak ndi weyak kagarigogi mende an nenat sagalogo deget disi dogowagaluk, Allah nen indewerek danggike mende eti didanubagik nen, yogosik,” yiluk yogisasikesik, ap inggi iyok aborlok dek mende etnogo men yogokike,
11“Kebe melatluk nen, karlit engga ndalek yi korlalok kaguma lan o,” yiluk laʼbisikemo 12ap etnogo melatluk, direngga ndalek etnogo it ap yomenogo taʼbokogonat iniloba eranogoat korlalok dukisike. Esigit diluk dukisi nggorlek, it akoni yomenogo taʼbokogonat nen, men yisuka,
“Iya! Ninayuk o. Nit yoma alebat akoni amberek nen yigit diluk omanggi kagakonem kiligogi dek mende, kagake yi ninayuk o,” yiluk Allah pogorakuka.
Yesus nen Lewi ayonggo ʼbisikemo omborlik lagike wene
(Matius 9:9-13; Lukas 5:27-32)
13Esigit diluk kagat diluk yabunggane, at Yesus i yenggelek etnogo aik obangge lagike. Lagonem, akoni dogalegat at oba nandorli wagukama, wene yanggul isasikesik lagike. 14Wene yanggul isalok lago dogolik, ap Lewi, Alfeus aʼbut, kantor uang pemerintah inake nggino yiluk waganggo lagukama korek werekma ilenggen kasike. Ilenggen kalok nen,
“An nomborlik eme o,” yiluk yogokikemo, melatluk omborlik lagike. 15Lagikesik nen, at Lewi aguma Yesus imbisak unggisukasik akoni dogalegat, it ap uang pemerintah inake nggino yiluk waganggo laguka mende inebe dogalegat inom, it amberek weyak kagako laguka mende inom, Yesus omborlik lagukasikmo nogo nen, at Yesus ebe inom, at agoromi ane waganggo laguka mende yomenogo inom, kimbiri nuwogoluk korek lagonem, it inom nuwogoluk korek lagukaat. 16Esigit diluk nasi werekma, it ap Farisi mende Allah wene kolal mbalek indewerek mende amberek nen inilenggen nggolagiyasuka mende, it amberek weyak kagako laguka mende inom, it ap uang pemerintah inake nggino yiluk waganggo laguka mende inom, Yesus inom kimbiri nonggonem inilenggen nggolagiyalok, it ap Yesus agoromi ane waganggo laguka mende yomenogo men yogisasuka,
“At Yesus ap uang pemerintah inake nggino yiluk waganigogi mende inom, it akoni weyak kagarigogi mende inom, kimbiri omanggimo dambukogo niligogi yoma nenaluk,” yiluk yogisasuka. 17Esigit diluk yogisasinem, at Yesus asuk kolkikesik nen, men yogisasike
“It akoni inoba pano mende dokter lak nen u kagarinabuwagaluk inayonggo ʼbusak a? Dek o. Inoba u werek kalogat dokter lak inayonggo ʼbusak o. Eti kak, an akoni pano kagarigogi mende inayonggo ʼbigiluk wagagi ʼbuk. Akoni weyak kagarigogi mende eti inayonggo ʼbigiluk wagagi o,” yiluk yogisasike.
Sembayan yuwogoluk kimbiri ninggidek werlegat dogoligogi wene
(Matius 9:14-17; Lukas 5:33-39)
18Yabunggane, ininggi omanggi paga, at Yohanes agoromi ane waganggo laguka mende inom, it ap Farisi mende inagoromi inane waganggo laguka mende inom, sembayan yuwogoluk, kimbiri ninggidek werlegat welaguka. Esigit diluk werek nggorlek, it akoni amberek Yesus oba wagukasik nen, men yogokuka,
“Yesus. It Yohanes agoromi ane waganigogi mende inom, it ap Farisi mende inagoromi inane waganigogi mende inom, sembayan yuwogoluk kimbiri ninggidek werek nggorlegat, kat kagoromi kane waganigogi mende etomaat, esigit diluk kagakidek kimbiri niligogi eti nenaluk,” yiluk yogokuka. 19Esigit diluk yogokukama, at Yesus nen, men yogisasike,
“Ap omanggi age waganggo dogolik, at agarlagi irugi inayonggo ʼbigin mende inom dogolik, wam inom, kimbiri inom, ninggidek werlegat dogusak nogo? Dek o. Ap eti inom dogolik, esigit diluk ninggidek werlegat dogusak dek o. 20Mende, ap eti agarlagi irugi ʼbiyalok ebe wolok lugun oba weregat o. Esigit diluk wolok lamo etinemat, it eti ininggi omanggi kimbiri ninggidek werlegat dogogunat o,” yiluk yogisasike.
21Esigit diluk yogisasikesik omanggi men yogisasike,
“Akoni nen, su alep yirigogi mende liʼbilago kalok, kain ngget mende paga ʼbugunggarigogi dek. Esigit diluk ʼbugunggako kalok, kain ngget mende dinggikogo kagat lago dogolik, su eti nggogat liʼbilarik lausak o. 22Eti kak, akoni nen anggur enggen ambusu nggerat perelogo iyak domba owado mende pagaat kagarek akla kenarigogi dek. Esigit diluk kenasumo, iyak eti supogo ambusu ndiyalogo elamat lagik, iyak weyak kagat lagik, kagat lasunogo yiluk, anggur enggen ambusu ngget mende perelogo iyak ngget mende paga kenarigogi o,” yiluk yogisasike.
Akoni Yahudi mende Hari Sabat Allah ake werlegat werek nggorlek, Yesus agoromi gandum enggen mbalogo nilik laguka wene
(Matius 12:1-8; Lukas 6:1-5)
23Akoni Yahudi mende ininggi 7 paga Hari Sabat Allah ake werlegat dogoligogi etnogo omanggi paga at Yesus ebe inom, agoromi ane waganggo laguka mende yomenogo inom, gandum ai yagomangge lago dogolik, agoromi nen gandum enggen mbalik mbalik laguka. 24Mbalik lagukama, it ap Farisi mende nen, Yesus men yogokuka,
“Lakan! It yi nininggi 7 paga Hari Sabat Allah ake werlegat dogolik,
Esigit diluk kagasusak dek, yiluk wene mbalek werek mendeat mbaligogi yi nenaluk,” yiluk wenemuk mbalkuka. 25Esigit diluk wenemuk mbalkuka mende, at Yesus nen, men yogisasike,
“Ap Daud agoromi omborlik laguka mende inom kimbiri dek nen nonaik ʼbiyasikemo, at nen kagakike mende Allah wene paga kolal mbalek werek etnogo kit nen endaga wenakidek werek a? Endaga wenarigogiat o. 26At Daud nen, ap Abyatar it ap Allah indewerek mende inewe nggok dogolik Allah ago palekma Allah ake kagakonem oba unggiluk, roti Allah ake ʼbiyiligogi mende yugunat nausak mondok dek. It Allah indewerek mende arlek nausak, yiluk wene mbalek mendeat, at Daud nen nasikesik, agoromi omborlik laguka mende yomenogo wogisasikemo nasukaat, yiluk kolal mbalek werek etnogo endaga wenakidek werek nogo?” yiluk yogisasikesik wene omanggi men yogisasike,
27“Allah nen,
Kininggi 7 paga hari Sabat an nake werlegat dogono o, (Kel. 20:10)
yisike eti wene eti nggogot digiluk inebe winamet diyasike ʼbuk. Akoni inebe nggogot diyalok nen,
Kininggi 7 paga Hari Sabat an nake werlegat dogoni o, yiluk inebe inakeat yisike o. 28Esigit diluk yisike eti paga, nininggi 7 paga Hari Sabat Allah ake werlegat dogoligogi eti indewerek an abat endak lasi wagagi nebe yiat o,” yiluk yogisasike.
अहिले सेलेक्ट गरिएको:
Markus 2: DNA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
