Jɛ́nɛ́sì 1
1
Kà Gèɖèpɔ́ɔ̀ nyu ɖɛ séín mɛɛ kɛ
1Ɖé ɖɛ dè gbɔ múɛɛ, Gèɖèpɔ́ɔ̀ mɛ zɔ̃̌ɔ̀ dyɔɔ̀ kè ɓóɖó-kpàɔ̀. 2Ɓóɖó-kpàɔ̀ se ma kpoún kpá, ké ɔ mɔ̀ ma ɖɛ fóɖóún. Ké tíe kpɔ̃ ma ní nì ma ɓóɖó-kpàɔ̀ kɔ̃in nyɛɛ kɔ̃in. Ké Gèɖèpɔ́ɔ̀ Zùùɔ̀ nì ma níɔ̀ kɔ̃in.
3Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ce mɛ nì.” Ké ceɔ̀ nì ma. 4Ké Gèɖèpɔ́ɔ̀ dyé ma ceɔ̀ kà ɔ nɔ̀mɔ̀ dyíin nyɛ. Ké ɔ zaìn ma ceɔ̀ kè tíe-kpòɔ̀ gboi. 5Ké ɔ ɖáìn ma ceɔ̀ “Wé,” ké ɔ ɖáìn tíeɔ̀ “Hwuɖu.” Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ kĩ́ín-kĩ́ínɔ̀.
6Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ɖɛ ɖò mɛ nì níɔ̀ pṹa, ɓɛ́ ɔ kéɛ mú ge.” Ké ɔ nì ma ná. 7Kǎà Gèɖèpɔ́ɔ̀ nyu ma ní nì ma ɖɛɔ̀ xwíɖíiɛ ɔ kè ní nì ma ɖɛɔ̀ kɔ̃in nyɛɛ gboi zaìn. 8Ké ɔ ɖáìn ma ɖɛɔ̀ “Dyií dyi.” Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ sɔ̃́ nììnɔ̀.
9Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ní nìà ɓóɖó-kpàɔ̀ kɔ̃ɛɛ mɛ poìn dà dyúáɖò dyí, ɓɛ́ ɓóɖó dyɛ-dyɛ ké xwáɖáún wóɖó.” Ké ɔ nì ma ná. 10Ké Gèɖèpɔ́ɔ̀ ɖáìn ɓóɖó dyɛ-dyɛɔ̀ “Ɓóɖó-kpà,” ké ɔ ɖáìn ní ɓɛ́ ɔ poàìn dyíɛɛ “Dyóó.” Ké ɔ dyéɛ ma kà ɔ nɔ̀mɔ̀ dyíin nyɛ. 11Ké Gèɖèpɔ́ɔ̀ ɖá, “Ɖɛ séín mɛ mɛ ɓóɖó-kpàɔ̀ kɔ̃. Mɛɛ-ɖɛ̀ séín ɓěɔ̀ mɔ̀ ɓáá-ɖɛ̀ ɓě ɓɛ́ wa ɓéɖé dyúà ɓɛ́ ɔ dyi mɛ ní, ɔ mɔ̀ ɓáá-ɖɛ̀ dyúáɖòɔ̀ ɖò kɛ ɔ kè tòɖòò-cù ɓě ɓɛ́ wa ɓéɖé dyúà ɖé wa ɓo ɓě mú, ɓɛ́ wa dyi mɛ ní, wa mɔ̀ cu dyúáɖòɔ̀ ɖò kɛ.” Ké ɔ nì ma ná. 12Kǎà mɛɛ-ɖɛ̀ séín ɓě mɔ̀à ɓáá-ɖɛ̀ ɓě ɓɛ́ wa ɓéɖé dyúà ɓɛ́ ɔ dyi mɛ ní, ɔ mɔ̀ ɓáá-ɖɛ̀ dyúáɖòɔ̀ ɖò kɛ ɔ kè tòɖòò-cù ɓě ɓɛ́ wa ɓéɖé dyúà ɖé waà ɓo ɓěɔ̀ mú, ɓɛ́ wa dyi mɛ ní, wa mɔ̀ cu dyúáɖòɔ̀ ɖò kɛɛ nyu ma ɓóɖó-kpàɔ̀ kɔ̃ mɛɛ. Ké Gèɖèpɔ́ɔ̀ dyéɛ ma kà ɔ nɔ̀mɔ̀ dyíin nyɛ. 13Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ tã nììnɔ̀.
14Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ce ɓě mɛ nì ɖé dyɔɔ̀ dyí, ɓɛ́ wa ké wé kè hwuɖu gboi zaìn, kè ɓɛ́ wa ké ti ɓě kè wé ɓě ɔ kè zɔ̃ gbɔ-dè-dè ɓě da zà. 15Wa mɛ nì ɖé dyɔɔ̀ dyí, ɓɛ́ wa ké ɓóɖó-kpàɔ̀ ce nyí.” Ké ɔ nì ma ná. 16Kǎà Gèɖèpɔ́ɔ̀ nyu ma ce vɛ̀nɛ̀ sɔ̃́ ɓě mɔ̀à dyóɖóɔ̀ kè dɛ̀nɛ̀ɔ̀ kɛɛ mɛɛ. Ɔ mɛ ma dɛ̀nɛ̀ mɛ́nɛ́ɛ́ ɓěɔ̀ ɖekè. Dyóɖó kɔ̃̀ ce ɓúáà dyí ɓɛ́ ɔ zià dɛ̀nɛ̀ɔ̀ dyíɛɛ kɔ̃̀ wéɔ̀ wuɖuí, ké dɛ̀nɛ̀ kɔ̃̀ ce seà dyí ɓúá mìɔ kɛɛ kɔ̃̀ hwuɖuɔ̀ wuɖuí. 17Gèɖèpɔ́ɔ̀ dè ma wa ɖé dyɔɔ̀ dyí, ɓɛ́ wa ké ɓóɖó-kpàɔ̀ ce nyí, 18kè ɓɛ́ wa ké wéɔ̀ kè hwuɖuɔ̀ wuɖuí kɔ̃̀, ɔ kè ɓɛ́ wa ké ce kè tíe-kpò gboi zaìn. Ké ɔ dyéɛ ma kà ɔ nɔ̀mɔ̀ dyíin nyɛ. 19Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ hĩinyɛ nììnɔ̀.
20Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Fɔ̀ɔ̀-ɖɛ̀ ɓě mɛ dyíìn ɖé níɔ̀ gboi, ké fɔ̀ɔ̀-ɖɛ̀ ɓě mɔ̀ naà ɓě kɛɛ mɛ nì wãuń ɖé dyɔɔ̀ dyí.” 21Kǎà Gèɖèpɔ́ɔ̀ nyu ma fɔ̀ɔ̀-ɖɛ̀ vɛ̀nɛ̀ ɓě kè fɔ̀ɔ̀-ɖɛ̀ mɛ́nɛ́ɛ́ séín ɓě ɓɛ́ wa dyíìn ɖé níɔ̀ gboiɛ ɔ kè naà séín ɓěɔ̀ mɛɛ. Wa dú ɓěɔ̀ ɓéɖé ma kòɛ̌n. Ké ɔ dyéɛ ma kà ɔ nɔ̀mɔ̀ dyíin nyɛ. 22Ké ɔ po ma fɔ̀ɔ̀-ɖɛ̀ ɓěɔ̀ mana kɔ̃, ké ɔ ɖá, “Ɓě mɔ̀ ɖɛ ɓě nìà ɖé níɔ̀ gboɛɛ mu dúún zaìn, ɓɛ́ ɓě ké dyí vò, ɓɛ́ ɓě ké níɔ̀ gboi dyíìn, ké ɓě mɔ̀ naà ɓěɔ̀ kɛɛ mu dúún zaìn ɖé ɓóɖó-kpàɔ̀ kɔ̃.” 23Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ hm̀m̌ nììnɔ̀.
24Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Fɔ̀ɔ̀-ɖɛ̀ ɓě mɛ nì ɓóɖó-kpàɔ̀ kɔ̃. Wa mɔ̀ nyúà-ɖɛ̀ ɓě kè ɓíɖíi-dyi-nà-ɖɛ̀ ɓě ɔ kè xwáɖá-xwíɖíi-nìmìì ɓě ɓɛ́ wa dú ɓěɔ̀ ɓéɖé kòɛ̌n nyɛ.” Ké ɔ nì ma ná. 25Kǎà Gèɖèpɔ́ɔ̀ nyu ma xwáɖá-xwíɖíi-nìmìì kè nyúà-ɖɛ̀ ɔ kè ɓíɖíi-dyi-nà-ɖɛ̀ɛ̀ dú kò-kò séín ɓěɔ̀ mɛɛ. Ké ɔ dyéɛ ma kà ɔ nɔ̀mɔ̀ dyíin nyɛ.
26Hwɛ̀ ké Gèɖèpɔ́ɔ̀ cɛ̃ɛ ma, ké ɔ ɖá, “Ɓěà mɛ nyɔǔn-dyù, ɓɛ́ wa ké nì kà ɓěà nìà kɛ, ɓɛ́ wa ké zimii ɓěɔ̀ kè naà ɓěɔ̀ kè nyúà-ɖɛ̀ ɓěɔ̀ kè ɖɛ kã̀ìn séín ɓɛ́ wa nà ɓóɖó-kpàɔ̀ kɔ̃ dyiɛ ɔ kè ɓóɖó-kpà gànáɔ̀ wuɖuí kɔ̃̀.” 27Ɔ jèɛɛ, Gèɖèpɔ́ɔ̀ mɛ ma nyɔǔn-dyù kà ɔ mìɔùn nìà kɛ. Kà Gèɖèpɔ́ɔ̀ mìɔùn nyuà nìɛ̀ kɛɛ, kǎà ɔ mɛ ma nyɔǔn-dyù. Ɔ mɛ ma gàa kè màa. 28Ké ɔ po ma wa mana kɔ̃, ké ɔ ɖá, “Ɓě mu dúún zaìn, ɓɛ́ ɓě ké dyí vò, ɓɛ́ ɓě ké ɓóɖó-kpàɔ̀ kɔ̃ dyi dyíìn, ɓɛ́ ɓě ké fɔ̀ɔ̀-ɖɛ̀ ɓě mɔ̀à zimii ɓěɔ̀ kè naà ɓěɔ̀ ɔ kè ɖɛ kã̀ìn séín ɓɛ́ wa nà ɓóɖó-kpàɔ̀ kɔ̃ dyiɛɛ wuɖuí kɔ̃̀. Ɓě mu ɓóɖó-kpà gànáɔ̀ wuɖuí kɔ̃̀ùn.” 29Ké ɔ cɛ̃ɛ ma wa gbo ɖe, ké ɔ ɖá, “Ɓě tò ɖùǔ, ḿ nyí ɓě ɓáá-ɖɛ̀ nì ɓóɖó-kpàɔ̀ dà séín, ɓɛ́ wa nì dyɔ́ múɛ kè cu séín ɓɛ́ wa tòɖò ɓo nì dyúà múɛ, ɓɛ́ wa ké ɓěɛ̀ ɖii-ɖɛ̀ jǔ. 30Kɛɛ ḿ tò xwáɖá-vàǎ séín, ɓɛ́ wa ké ɖii-ɖɛ̀ jǔ ɓó fɔ̀ɔ̀-ɖɛ̀ séín mɔ̀à nimii séín nì ɓóɖó-kpàɔ̀ kɔ̃ɛ kè naà séín ɔ kè ɓíɖíi-dyi-nà-ɖɛ̀ séín nyɛɛ bìì.” Ké ɔ nì ma ná. 31Ké Gèɖèpɔ́ɔ̀ dyé ma ɖɛ séín ɓě ɔ ɖǎ ma nyuɛ kà wa nɔ̀mɔ̀ dyíin mìɔ kɛ. Ké zɔ̃ zɔ̃ ma, ké hwìo jǔ ma. Ɔ mɔ̀ wéɔ̀ mɛ̀nɛ̌ìn-ɖò nììnɔ̀.
अहिले सेलेक्ट गरिएको:
Jɛ́nɛ́sì 1: ƁB02
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bassa Bible © Bible Society Liberia, 2002.