Shiyanso 2

1Baheene uwulanga, inyi ni fiinu fyona fina fili umo fyakwilana.

Ilijuva lya fungati

2-3Ilijuva lya fungati uNguluvi akhandi amalile insengo yaakwe iya kiwumba, ndeeno ilijuva ilyo wátuuyaga. UNguluvi wáliyimiilila ilijuva ilyo ilya fungati, wálibaagula live linofu kwa kiiva wátuuyaga.

Umuunu umugoosi nu mudala ku Edeni

4Isi siseene mola sa kiwumbwa kwa wulanga ni nyi. Ilijuva lilila uMutwa uNguluvi#2:4 UMutwa uNguluvi: Yimba iliswi Mutwa mu Maswi aMahensa. pina wáwumbaga uwulanga ni nyi, 5kukhandi kusiina fimelo fyofyona pashaanya ya nyi, kwa kiiva umwene akhandi asitonyeese inoonya mu nyi. Khanji, kukhandi kusiina umuunu wa kilima. 6Leelo, ifisansa fyahumyaga amalenga pansi pa nyi, gayalaalila mu nyi yoona.

7Baheene, uMutwa uNguluvi wámuwumbile umuunu mugoosi kwa lilongo lya nyi. Wámupuuhila mu mula imuyila ya wuumi, umuunu wáava muumi.

8Khanji wávyala ishiisi sha Edeni kunena. Umo wámuviikha umuunu uyo yuna akhandi amuwumbile. 9Mu shiisi umo, wálemfya shila mupishi guna gudobokhwa pa meeho na gufwaya kiliiwa. Paakhati naakhati ya shiisi kukhandi kuna mupishi gwa wuumi nu mupishi ugwa kimanya amanofu na mavi.

10Lino, ukho ku Edeni kukhandi kuna mukhoga guna guveyula amalenga mu shiisi. Kihuma apo, gwabagunkhana gaava makhoga gana. 11Ilitaawa lya mukhoga gwa wutasi gutambulwa Pishoni, ugo gugwene gupilima inyi yoona ya Havila, pina pana sahaabu. 12Isahaabu ya nyi yila nofu. Khanji kuna ngaagulwa yina yinunshilila yitambulwa Bedola na mangʼanga gina gingʼaala ngʼaala mandu aga lifungu likhome gina gitambulwa Shohamu. 13Ilitaawa lya mukhoga gwa wuvili gutambulwa Gihoni na gupilima inyi yoona iya Kushi.#2:13 Kushi: Inyi ya Kushi yisimanyikha wunofu kwa kiiva yikhandi uluvala lumonga ku nyi ya Mesopotamiya awu ku Esiyopiya. 14Ilitaawa lya mukhoga gwa wutatu gutambulwa Tigilisi na malenga gijenda ulubali lwa kunena lwa nyi ya Ashuulu. Ilitaawa lya mukhoga gwa wuna gutambulwa Efulaati.

15Ndeeno uMutwa uNguluvi akhandi amuviishile umuunu umugoosi uyo mu shiisi sha Edeni, ave iilima na kiyiyangalila. 16Wámulajisa umuunu uyo, wáaja, “Amakhomo ga mupishi gogoona ugwa mu shiisi ukwiliile kiilya. 17Leelo, usikhajelaga kiilya amakhomo ga mupishi ugwa kimanya amanofu na mavi, kwa kiiva ilijuva lina ukhalya hela, shiyooli ukhafwa.”

18Baheene uMutwa uNguluvi wáhiiva kiija, “Lusili lunofu umugoosi uyu ave mwene duguli. Nisimugahile umutanjilisaaji umunofu uwa kihwanana nu mwene.” 19Wáwumbaga kihuma mu lilongo inkhanu soona ni nyuni soona. Wámutwalila umugoosi uyo, kiija aloleele, asisipeele mataawa mashi. Shila litaawa lina akhandi ikisitambulila, lyava litaawa lyanave. 20Ndeeno, umugoosi uyo wásipeela amataawa inkhanu soona isa kidiimwa, inkhanu soona isa mu lihakha ni nyuni soona. Leelo, asikhawoneeshe umutanjilisaaji umunofu uwa kihwanana nu mugoosi uyo.

21Baheene, uMutwa uNguluvi wámuleetela umugoosi utulo tufuno, woope wágoneelela mandu. Apo wátoola uluvafu lwakwe lumo, pa luvafu pala wágubikha inyama. 22UNguluvi wálugaha uluvafu lula ulwa mugoosi lwava mudala, baheene wámutwala kwa mugoosi. 23Umugoosi uyo wáaja,

“Lino, uyu lifupa kihuma mu mafupa gangu,

nyama kihuma mu nyama yangu!

Uyu asiive itambulwa ‘mudala’,

kiiva ahumile mwa mugoosi.”

24Lulwene umugoosi akhamulekha uwiihe nu maayi waakwe, asiikhale nu mudala waakwe, ndeeno vavili awo vasiive muvili gumo.

25Umugoosi uyo nu mudala waakwe vakhandi bwinda, hata ndeeno vasikhaweene nsoni.

अहिले सेलेक्ट गरिएको:

Shiyanso 2: Shisangu

हाइलाइट

शेयर गर्नुहोस्

कपी गर्नुहोस्

तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्

IShiyanso nu Lufingo uLupya बारे थप जान्नुहोस्

Shiyanso 2

बाट लोकप्रिय बाइबल पदहरू
{{chapter}
}

सुन्नुहोस् Shiyanso 2

बाइबल:

Sangu

भर्जन: IShiyanso nu Lufingo uLupya - Shisangu

Shiyanso 2

Shiyanso 2

बाट लोकप्रिय बाइबल पदहरू {{chapter}}

सुन्नुहोस् Shiyanso 2

बाइबल:

Sangu

भर्जन: IShiyanso nu Lufingo uLupya - Shisangu

Shiyanso 2

बाट लोकप्रिय बाइबल पदहरू
{{chapter}
}