MATEO 9
9
Dejja jeojji shahuama' jaa jeo'yoajja jeomeeca'yapoa Jesosaa
(Mc 2.1-12; Lc 5.17-26)
1Majoya aje quijjepishana Jesosa bishe'aiyasijje anisohuaquiapoa ojjemiji baeyasijje besapoquio'oyaa. Oja meshineiyasijje oya ba'eñaqui'yapoa. 2Jesosa oja meshijo ani'yojo jeojjishahuama'yo, jeo'yoajja dejja yecapoa cuaa oque daqui equecuaquinijo jaa. Jesosaa oya o yejji epo pea-ai e'ejojonei ojo jjashahuabaqui'yani bamajje jama acapoa jeo'yoajja dejja ba'a: —Ecue bacua queabihui pocue. Eyaya mique mimishicuana cuijea'yonaje, chama'yo— jamaya acapoa.
3Majotii aniya Moisesja tehuehuohuijji poanicuana jjashahuabaquiapoa oja esohuiquipajjetii jama ba'a: “Joya nequi dejja queatainee mimiani Eyacuiñajjijo, oya Eyacuiñajji jayojja pea-ai poani poso jjabaquiani.” 4Jesosaja ca ebatii poa ma Moisesja tehuehuohuijji poanicuanaja ejjashahuabaquijji, jamajjeya oya jama poa onijje ba'a: —¿Apiojji acue quiana queaquehuanee jjashahuabaquiani ejo? 5Queacamajaneenee dejjaja mimishi cuijea'yojji. Queacamajaneenee dejja jeojjishahuama' jeomee'yojji pea-ai. 6Jjeya eyaya quiana bameeje eya Dejjapojji epo Eyacuiñajjiya queaca'a nequimeecani dejjacuanaja mimishicuana cuijea'yojji epojji.—
Majoya ohuaya jeo'yoajja dejja jama acapoa ba'a: —Nequisohua'yocue. Daqui equecuaquini mi jaajji poani dojo'yocue, mique equiyasijje poqui'yocue.—
7Jamajjeya aje jeo'yoajja dejja nequisohuanana'yomajje ojaya equiyasijje poqui'yapoa. 8Majo anicacuana o nequisohuanana'yonaje o jeo'yonaje pea-ai bamajje jjabaneineiquiapoa Jesosa queaca'anee poanijo. Jamajojoya aje Eyacuiñajji bihuiacapoa cuaa ohua dejjacuana queaca'a pomeecani pea jja-ajameequi'yojji epojji.
Jesosaa dejja Mateo bajjani iyaacapoa onijje epo'yojji
(Mc 2.13-17; Lc 5.27-32)
9Majoya aje Jesosa oja meshineijo ani poquiapoa majotii anicacuana baa. Ohuaya poquijeya oe dejja Mateo bajjani bacañaquiapoa. Oya Israelcuiñajjicuanaja bejjo Roma emeshimeseja yajji chichapoquiajji equisisijo aniapoa. Jesosaa oya jama acapoa ba'a: —Enijje po'yocue.— Jamajjeya Mateo nequisohuamajje onijjetii po'yohua poquiapoa.
10Majoya aje pea pojjajo Jesosa Mateoja equijo ijjiaijjianijo pea dejjacuana Roma emeshimeseja yajji bejjo chichapoquiajji poani poeapoa oja equiyasijje. Peacuana ma judiocuaa bacani queamimishi poani dejjacuana poepea-aiapoa oja equiyasijje. Majoya ma oque poeapoacuana mesasahuajo anioqueñapoa Jesosa o shajja-ajjajji poanicuana anichipineijo ojee onijje emimimimijji, eijjiaijjiajji pea-ai. 11Fariseocuaa Jesosa ma dejjacuananijje ojee ijjiaijjiani bamajje, o shajja-ajjajji poanicuana huohuiajjacapoa queaqueneya jama ba'a: —¿Apiojji miquiana sohuihuohuijji poani ijjiaijjiani ejjapeequijji Roma emeshimeseja bejjo chichapoquiajji poani dejjacuananijje, pea dejjacuana queamimishi poaninijje pea-ai ojee?—
12Jesosaa fariseo dejjacuana ojo jama poani shajja-ajjamajje saja-acapoa jama ba'a: —Joya yajayaja poani, manojjima eshicuijjibajji poani dejjajo jjashicuimeequica-ajja. Emanocuana caca oe jjashicuimeequicajji ojo. 13Ma yahuajonei tehuecapoa esohuijo jjashahuabaquicue miquianaja queaja'a ebajjijo yajja poanijje comaya esohui. Eyacuiñajji jama poa ba'a: “Miquianaja quia ehuone enaa jehui'yo mahuisoneitii pojjeama eya basapoani. Miquiaaya peacuana joya queamimishi poanajecuana pea-ai queapame apoquiaje bapea-aisapoani eya.” Jamaya poani oja esohui. Eya poeyanaje jiquio oyaneitii queapame jjabaquiani posocuana sa-ajjaa pojjeama. Eya caca poeyanaje mimishicuana sa-ajjaa o pea jjashahuabaquime pomee'yohua oja mimishicuanajo.—
Jesosaa huohuicapoa cuana bobi ijjiapojjima' eanijjijo so'o Eyacuiñajjinijje emimijji
(Mc 2.18-22; Lc 5.33-39)
14Majoya aje Juan ma ona iñajeanobiajji poani shajja-ajjajji poanicuaa Jesosaque jjanequichipiquimajje huohuiajjacapoa oya jama ba'a: —Ecuana, fariseo dejjacuana pea-ai queahuiso bobi ijjiapojjima' aniani so'o Eyacuiñajjinijje emimijji. ¿Yajjajje shai mi shajja-ajjajji poanicuana ca jama pea-ai po-ajja?—
15Jesosaa saja-acapoa cuana jama ba'a: —Bacue, fiesta ejjahuanaquijjijo joya poquije eiyaacuana queabihui poani dejja ejjahuanaquijji yanijo. Ma pojjajotii bobi ijjiapojjima' anica-ajja so'o pea-ai. Majoya quijje dejja ejjahuanaquijji dojocaje cuaa. O chama' bamajje Eyacuiñajjinijje emimijji ojaya epeejjicuana bobi ijjiapojjima' anije so'o queayeno poani ejjabameequijji.
16Jama pea-aiya ba'a: Daquichii huiñajo daqui eyacua isaca-ajja o jaca'yojji. Jama aca'yajje daqui eyacua peajja poaje'yo. Ejaca'yo daquichii jama pojjeama pea-ai poaje'yo, hua-ama. 17Oya jayojjaya uvajjajjana' eyacua shoca-ajja ejeechii esocojo. Majo shocajo ejeechii cuiapojojeacaje sesena'majje. Majoya uvajjajjana' jjashojeajeajeyoquije, ejeechii pea-ai jeajeacaje cuaa. Jamajjeya uvajjajjana' eyacua shocajji ejee eyacuaneijo pea-ai. Majotiiya oya queapame nequipoquije majo sho.— Jamaya Jesosaa huohuicapoa cuana.#9.17 Nota: Jiquio Jesosaja esohui jama poanijje ba'a: Beca ejjashahuabaquijji ejaa oya jayojja pojjeama. Beca pea-aijo jjashahuabaquica'yoajja. Jamajjeya joya ejjashahuabaquijji eyacuajo jjashahuabaqui'yosapoani ma yahuajo ejjashahuabaquijji echii cajaa aca'yojji.
Jesosaa Jairoja bacuase shequimeeca'yapoa
(Mc 5.21-43; Lc 8.40-56)
18Jesosa majo ejjachichaqui anicacuananijje mimiquijotii oe dejja judío etii poani poecuajiapoa Jesosaque. O nequi cojjaneijo oja ecuioshajjajo nequiñamajje ma dejja etiiya Jesosa jama acañapoa ba'a: —Jjeyanei ecue bacuase mano'yonaje. Poecuajicue o jaahuasijje eme huanañaquicue. Miya eme jama huanajo oya shequije'yo.—
19Jamajjeya Jesosa nequisohuamajje poquiapoa, o shajja-ajjajji poanicuana pea-ai ma dejja etii poaninijje oja bacuase emano'yo baa. 20Majoya Jesosa cuama poquianijo oe epona 12 shequiajame huiso queamano najjitii ani poechipiapoa Jesosa poquijeyasijje. Ma eponaa o nequiquiijje nequiñamajje Jesosaja daqui-ao cuema napacapoa. 21Oya epona oja sohuiquipajje jjashahuabaquiapoa jama ba'a: “Eya oja daqui-ao cuema napamajje na' huosaje'yo, majoneitiiya eya apoa poaje'yo.” 22Majoya Jesosa jjanequijeapajjaquiapoa o nequiyasijje o bajji. Oya jama poa ba'a: —Queabihuinee pocue ecue bacuase, miya e'ejojonei jjashahuabaqui'yanijjejojoya jjeyahua mi na' huosaje'yo.— Ohua jama acajeahuatii epona na' huosanana'yapoa
23Majoya aje quijjepishana Jesosaa judío etii poanija equi aniñaquimajje bacapoa música miajji poanicuana apoa epo nequi ebacua emano'yo mojeajjijo. Queahuisonee paca-ani janobajjimanei eponasho'ijo shajja-ajjacañaquiapoa Jesosaa. 24Jamajjeya Jesosaa huohuicapoa cuana jama ba'a: —Jiquiojo ani quiana jjeyahuanei cuayaquisocue esecueyasijje. Eponasho'i caca emano'yo pojjeama jaa. Oya ca ecahui jaa.—
Ohua jama acajje queahuisocuaa majo anicaa Jesosa soadojocapoa. 25Jesosa ca majo anicacuana huoojeacuayamajje esecueyasijje nobiquiapoa eponasho'i equecuayijjijo jaahuasijje. Ohua me iñacajje eponasho'i anisohuanana'yapoa. Majoya oya nequisohua'yapoa. 26Jamajojoya aje ma meshijo ba'ecacuaa Jesosaa eponasho'i shequimeeca'yonaje esohui shajja-ajjamajje huohuiquicapoa onijje ba'ecacuana, queahuesha ba'ecacuana pea-ai Jesosajo.
Jesosaa beca dejja cojjama' ani jjacojjaja'ameequica'yapoa
27Jesosa ma equijo ani cuayaquije'yo shajja-ajjamajje beca dejja cojjama' esecuejo nequiya oya ocueajjacapoa taaaquiya. Jama taaame poa ba'a: —Davidja osecua, miya che ecuanajo queayeno jjashahuabaquicue ecuana queapame pomee'yojjijo.—
28Jesosa pea equiyasijje nobiquiajo ma beca dejja cojjama' o aniyasijje jjanequichipiquiapoa. Jamajjeya Jesosaa oya huohuiajjacapoa jama ba'a: —¿A'a quiana jjashahuabaqui'yani ejo ecuea miquiana ejjacojjaja'ameequi'yojjijo?—
Oya saja-acapoa jama ba'a: —E'e, ecuana mijo jjashahuabaqui'yani, Emeshimesenei.—
29Majoya Jesosaa beca dejjaja ecojja napamajje oja emeya oya jama acapoa ba'a: —Miquiana queacojjaja'a jjeyahuanei jjabaquije'yo miquiana ejo e'ejojonei jjashahuabaqui'yanijjejojoya.—
30Jesosa onijje mimijeahuatiiya ma beca dejja cojjama' jjacojjaja'aquinana'yapoa. Majoya Jesosaa oya niñeshea-ajjacapoa jama ba'a: —¡A'a peacuana huohuiajja-ajjajji jiquio eya mi queacojjaja'a jjabameequi'yonajejo!—
31Jamatii ma beca cojjama' poanaje dejjaa poquipishana'yomajje ojjaña ma meshijo ba'ecacuana, queahuesha ba'eca pea-ai huohuicañaqui'yapoa Jesosaa oya jjacojjaja'ameequica'yonajejo.
Jesosaa dejja mimi'yoajja mimimeeca'yapoa
32Ma beca dejja cojjama' poanaje queacojjaja'a'yo poqui'yajo pea dejjacuaa oe dejja mimi'yoajja poani eshahuamase yamijji yecapoa Jesosaque. 33Jesosaa eshahuamase dejjaja yamijo nequi huoojeacuayajeaca'yajo dejja mimi'yoajja epo mimi'yapoa queaja'a. Oya queaja'a mimi'yani shajja-ajjamajje majo anicacuana jjabaneineiquicapoa Jesosajo. Jama mimime poa cuana ba'a: —De, jiquio eseja meshi Israeljo pea dejjaja jama ea'yojji esejaya bajjimanei.—
34Majo nequi fariseo dejjacuana ca jama poa ba'a: —Chojja de, edosiquiaa eshahuamasecuanameseya ca oya jama pomeecani queaca'a pea eshahuamase cuayameequi'yojji epojji— jamaya queaquehua mimiapoa Jesosajo.
Jesosaa queahuisocuana jja-ajameequica'yapoa
35Jesosaa queahuiso meshiyasijje esohui huohuicapoquiapoa judioja equi-aicuana ejjachichaquijjijo nequiya pea meshicuanahuasijje poquimajjeya. Esohui queapame Eyacuiñajjiya ojjañacuana huoojeacapoquijetii epojja poechipiani huohuicapoa. Pea pea manome epo jaacacuana jja-ajameequica'yapoa, huaquiameeca'yapoa pea-ai. 36Ma meshijo ba'ecacuana queayenotii ba'epoquiani, oja bajjimatii poani yajja pocajji queapame eba'ejji bamajje Jesosa queayenonee poa macuiñajjicuanajoya. Jiquio ecua ovejacuana o jaahuanajji chamajo queacamajanee poani jama pea-aiya Jesosaa bacapoa macuanaya queayenohua. 37Ma meshijo ba'eca queayenotii poani bamajje Jesosaa o shajja-ajjajji poanicuana jama huohuime acapoa ba'a: —E'ejojonei esejja'yojji queahuisonee ejahua ani. Jamatii o sejja'yojji epojjicuana ca oepojjinei nequi. 38Jamajjeya quiaa oe equemese ese sejjamee'yojji poani huohuiajjacue oja pea dejjacuana ehuoojeajjijo esejjapea-ai'yojji.—#9.38 Nota: Jiquio esohui esejja'yojji poanineijo pojjeama mimiani. Eyacuiñajjija esohuihuohuijji poanicuanajo ca oya Jesosa mimiapoa. Anosoai sejja'yojji poanicuana o sohuihuohuijji poani jama. Dejjacuana, eponacuana esejja'yo jayojja poani. Queahuisocuana apoa eshajja-ajjajji esohui jiquio ecua anosoai ejahua apoa esejja'yojji jama.
अहिले सेलेक्ट गरिएको:
MATEO 9: ESE
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Copyright Mision Nuevas Tribus, 2006
