Malakai 1
1
NA SOPENA 1.
1Na leo hi Iehova me ra tanoho me Israel hi Malakai.
2Inau amejeamiu mine, Iehova moaso. Maa amiu otoaso, Iniho omejeamamu paleve? Iso inie mosatuaha i Jekop, e mojoa? Iehova moaso: maa inau ameje Jekop; 3na lolou mohahara Iso, ave ra pilana vuti motautalu, arahu na vanuana ta me ra sanu ila hi ra utahau. 4Va i Itom moaso, Hije tosivei pele ra pilaja sanu, maa titamule, titasara pea taha marivu; maa Iehova moaso pale a, moaso, Ihire titasara pea, maa inau aitipa jovira: tau ra tajua tijurira, Na vanua hi na vei vasoosoo, tijurira mono, Ra tanoho me na vanua Iehova mopuri hire tuitui. 5Tau na matamiu tirioriova, amiu otoaso pa, Iehova mosale tohova neeva jujua jivi na vanua i Israel.
6Matuna moninima tahonae tamana, te tajua hi na varao itea moninima taho-nae na varese hina: va inau tamamiu, na ninima tahonae nau monie veae? va inau na varese himiu na ine nau monie veae? Iehova moaso meamiu, O varese hi na lotu, ra taha ninima oso na hiseu. Amiu otoaso, Amamaninima oso na hisemu paleve? 7Amiu otorahuvuso na pret oso me na pilau avaava hi na pea hi na, lotu. Amiu otoaso, Amamavei oso niho paleve? Rotea otoaso, Na avaava pile Iehova inie na sanu tipa. 8Otorahuvuso ra sanu taha pisi me na lotu, natuha mosaoso I otorahuvuso ra sanu tahalaho tihonahi me ra sanu taha rojo, natuha mosaoso! Oirahuvuso nie ta me na varese tahajia himu; inie iejieji suriho, e mojoa? inie ilaviho, e mojoa? Iehova moaso. 9Inau atuhaamiu, motahonae otousi Iehova, na lolona imalumu hije: na sanu naa momalua suriamiu: inie ilaviamiu, e mojoa? Iehova moaso. 10O motahonae itea himiu itirihoro ra matana pea hi na lotu, suria otovasurahi hapu tipa me na pilau avaava hi na lotu! Inau asaejieji suriamiu, Iehova moaso, aisalavi na pilamiu rahuvuso hi na havemiu. 11Suria majuri me na vanua veae na maso momaraha ae me na vanua veae momajojore ae na hiseu isale tohova me ra tanoho me ra vanua; me ra vanua vunuvunu tirahuvuso ta me na hiseu na insens me narahuvuso tahonae: suria na hiseu isale tohova me ra tanoho me ra vanua, Iehova moaso. 12Maa amiu otovei oso nie, rotea otoaso, Na avaava pile Ieliova moso, na vana hau hina me na hana monie na sanu tipa. 13Otoaso mono, O, na epemamu temalumulumu suria! otovotoa na vea, Iehova moaso; otolavi te sanu otoalasia, otolavi te sanu taha laho tihonahi, otolavi te sanu taha rojo; otolavi na rahuvuso pale ai: motahonae inau alavi a hi na havemiu, e mojoa? Iehova moaso. 14Maa moso na tajua taha jihajiha, na pilana sip lamane ae, maa molotu, morahuvuso ta me Iehova na sanu taha oso: suria inau na moli tahajia tohova, Iehova moaso, ra tanoho me ra vanua teine tohova na hiseu.
अहिले सेलेक्ट गरिएको:
Malakai 1: TLM9109
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
This is a historic text maintained by the British and Foreign Bible Society.