Mphattuwelo 18
18
Aletto araru wa Aparahamu
1Nihuku nimoca ukati wo'thana Mwanene Nluku ahonkhumelela Aparahamu nonkomile wankhora wo heema aankhuruttunlyawe mmitthuucini co mooko co Manree. 2Aparahamu ahowusa miitho awe ni ahoona alopwana araru anamweemelenle wakhiviru. Woona wawe ahonwa wankhora wonkomilyawe ni wowaakuvyaca wene aheekamela ni ahooromela mpaka vathi. 3Aheera: Pwiya, wakhala wiira wanakiphwanela, nhipwahe wakarumeya enyu wooheemela. 4Kinaaruma wiira awaaniye maasi wiira nrapihe inyaa cinyu ni mmumule vathi mwiri ula. 5Kinaawuwiiherani iyolya wiira mphwanye ikuru, wahoolo nnaapwahaka ukhala wiira nhophiya wakarumeya enyu. Ale yahaakhulaca yiiraka: Aye, upanke toko cuulumacilyaa.
6Wowaakuvyaca wene, Aparahamu ahokela nheemani ni ahomwiirela Sara wiira ahaawule iphepa yootteela ya atthu araru, ni anyatte ni apanke mikatthe. 7Wahoolo ahorwaa muncicini ni ahonthanla mwamope omaana, ahonvaha ipottha awe wiira antthenkace wowaakuvyaca. 8Ahowaana nhuci wookikitthiya, ileeti ni ipilipica co'nama catthenkaciye ni ahaavahaca. Alyacak'ono, Aparahamu aheemelela wakhiviru na ale wantthuucini vale.
9Vano yahonkohaca yiiraka: Amwaaraa, Sara ayo, ari vayi? Ule ahaakhula eeraka: Ari nheemani mmwe. 10Vano aheera: Kinaawuphwanya tho mwahiyu yoola ukati ula, ni amwaaraa Sara kinhala waaphwanya anannyanre mwana. Sara eera eewaka moolumo ayo nari withela nkhora wo heema.#18.10 Aroma 9.9
11Aparahamu ni Sara yahooluvalaca venci ni Sara wahonvirela ukati wooyara. 12Phimaana ahothyaa veekhawe oopuwelaka wiira, kinooluvanlene wanaahala ukitteeliha tho nrima?
13Nanso Mwanene Nluku ahomwiirela Aparahamu: Sara uyo nothyani eeraka: Khweli kinaahala uyara mi kinooluvanlene? 14Ihaawo itthu inoolwanawe Mwanene Nluku? Kinaawuphwanya tho mwahiyu yoola ukati ula, ni Sara kinhala umphwanya nannyanre mwana. 15Vano Sara ahoova, phimaana ahoruna eeraka: Mi akithyele. Ule ahomwiirela: Uhirune, we uhothyaa.
Aparahamu naswalela uSotoma ni uKomora
16Vano alopwana ale warwaya yahoona uhitto nwo ilapo yo'Sotoma. Aparahamu ahaaveleela ni waaleeha. 17Vaavale Mwanene Nluku aheera: Kinanvithela Aparahamu itthu inhalaka upanka, 18ukhala wiira Aparahamu nohala ukhala athumwanaya ilapo yuulupale ni yo'kuru, ni mwa nlattu wo yooyo maloko othene anaarerihiya. 19Kontha mi kihonthanla wiira aahimerye asaanawe ayo ni ucuulu awe uyo wiira yiisunke mphironi mwa Mwanene Nluku, apankaka co'sariya ni ceekhweli wiira Mwanene Nluku anvahe Aparahamu citthu cinkhuluvelihilyawe.
20Mwanene Nluku aheera tho: Cinriyeleliyaya a Sotoma ni a Komora ciri cinci ni itampi caya nnyo cihotepa. 21Kinakhuruwela wonwo koone wakhala wiira cinhiminya nnyo ciri ceekhweli, cakhala cowoothiya kacuwele.
22Vano alopwana ale yahokhumaca arwaaka uSotoma nanso Aparahamu ahohala ninlelo ni Mwanene Nluku. 23Aparahamu ahomwaattamerya ni ahomwiirela: Unaantankanya nasariya wamoca ni nkaafiri? 24Kaahiki yakhalaka anasariya hansini (50) mparasa mmo, nanlelo nnaatankanya ni khannohala unemecera nipuro nno mwa nlattu wo waafenta anasariya hansini (50) ariwo ayo? 25Yukhaleni uttayi upanka yeeyo itthu iyo, umwiiva nasariya wamoca ni nkaafiri toko wiira oyeeli ayo anaalikana, yukhaleni uttayi! Khanhala wuuluma wo'sariya hukhumu o'lapo yothene?
26Mwanene Nluku ahaakhula eeraka: Mi kaaphwanyaka anasariya hansini (50) uSotoma nwo, mwa nlattu wo wafenta yaayo, kinaahala unemecera iparasa eyo yothene.
27Aparahamu ahaakulela tho eeraka: Kihocuwela wiira kihoocurwelani uwuulumanani Pwiya, mi kinari ntthupi ni ittura. 28Nanlelo kinaakoha: Kaahiki yahalaka athanu wiira aphiyere anasariya hansini (50)? Nnaatankanya isittatti eyo mwa nlattu wo yaayo athanu ayo? Uyo ahaakhula eeraka: Kaaphwanyaka nwo arupayini na thanu (45) akintankanya.
29Aparahamu ahaakhanyereriha eeraka: Kaahiki mwaaphwanyaka arupayini (40) paahi? Uyo ahomwaakhula eeraka: Mwa nlattu wo waafenta atthu arupayini (40) ayo, akintankanya.
30Vano ule ahopwaherera eeraka: Nhiviruwe Pwiya, nkilevele kuulume. Kaahiki mwaaphwanyaka talathini (30) paahi? Mwanene Nluku ahomwaakhula eeraka: Kaaphwanyaka talathini (30) akintankanya.
31Aparahamu aheera tho: Kihocuwela wiira kihoocurwelani uwuulumanani Pwiya. Kaahiki mwaaphwanyaka sirini (20)? Mwanene Nluku ahaakhula eeraka: Mwa nlattu wo waafenta sirini (20) ayo, akintankanya.
32Vano Aparahamu aheera tho: Nhiviruwe Pwiya, nanso nkilevele wiira kuulume ikwaha imoca paahi. Kaahiki mwaaphwanyaka khumi paahi? Mwanene Nluku ahaakhula eeraka: Mwa nlattu wo waafenta khumi ayo, akintankanya.
33Namanlene umuulumana Aparahamu, Mwanene Nluku ahokhuma ni Aparahamu ahoturuwela uwani.
अहिले सेलेक्ट गरिएको:
Mphattuwelo 18: NNI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2021, Wycliffe Bible Translators, Inc. All rights reserved.