Bikh. 18
18
Paulo elwacha mu Korinjo
1Enyuma wa kano, Paulo arura Ateni acha e Korinjo. 2Ebweeneyo anyoolayo Omuyaudi khukhwama Pondiasi lisina liewe bali Akwila, aba aamile e Butaliani no mukhasi wewe Pirisila, sikila omwami Kilautio aaba akhalake ali Bayaudi boosi barure mu Rumi. Paulo acha ababona, 3aamenya ne khukhola nabo kimilimo, sikila bosi baaba banabi be kamaeema nga niye. 4Buli endaalo eye Sabato, Paulo achiichanga mu Sinakooki ne alomaloma khu Bayaudi ne Bakiriki.
5Nga Sila ne Timoteo ne boola khukhwama Masedonia. Paulo aana siise siewe sioosi khukhwilwacha burume, ne aatinyilisia Bayaudi ali Yesu niye Kristo. 6Nga ne bamuyingania ne khuloma kamakhuwa kamabi khu niye, ariina ne khusiisimula lutamuusi lwe khu ngubo chewe ne khubaboolela ali, “Kamafuki kenywe kabe khu mwabene, sendikho ne bubi nanywe tawe. Khukhwama luno ne khu chiililila ndacha mu Be Chikholo.” 7Nio abalekha acha khumenya munju eyo mulala khu Be Chikholo niye balanga bali Tito Yusito, owasaayanga Wele. Enju yewe yaba siimbi ne sinakooki. 8Kurisipo, owaba omwimeelesi owe sinakooki, asuubila mu Mwami, alala ne be nju bewe boosi, ne babaandu babaandi bakali mu Korinjo baulila burume, basuubila, mala ba batiisibwa.
9Silo silala Paulo aaba ne kamalola nimwo, Omwami amuboolela ali, “Okharia tawe, chiililila khulomaloma okhafwa kumwoyo tawe, 10sikila ndi nawe. Se aliio yesi yesi olanyala khu khukholakho siosi siosi sibi tawe, sikila ndi ne babaandu bakali mu lukoba luno bali babase.” 11Nio Paulo amenya ebweeneyo kumwiiko mulala ne nusu ne ekisia babaandu elomo eya Wele.
12Nga omundu bali Kalio ne akholwa khuuba omuruki owa Akaya, Bayaudi babuusiana alala mala, batila Paulo, bamuyila mu koti. 13Ne baloma bali, “Omundu yuno, alakhakanga khuombelesia babaandu basaaye Wele mu ngila niyo lilaka likhafukiilila tawe!”
14Paulo aaba ali siimbi khulomaloma, ne omuruki Kalio aboolela Bayaudi abo ali, “Rekeeresia Bayaudi enywe! Abanga likhuwa lino lili khu bwonaki namwe khu mabi kakaandi kosi kosi andi libeele ng'ali khwise khukhwefwiilisia khwinywe. 15Ne sikila lili likhuwa lie khuyingana khuloondekhana ne kamakhuwa ne kamasina ke lilaka lienywe, khukhwola enywe mwabeene muling'oone. Ese senenya khuba omukhalaki owe bibiindu nga bino biri tawe.” 16Khwako abaoona barure mu koti. 17Nio boosi bafwakhila Sositini owaba omwimeelesi owe sinakooki mala bamupila ebweeni we koti. Ne omuruki Kalio se abukulamo lukeendo tawe.
Paulo akobola e Andioka lundi
18 #
Khub. 6.18
Paulo aamenya ne basuubili mu Korinjo khu ndaalo chingali, mala abalekha ambukha ne Pirisila ne Akwila bacha Siria. Nakhambukha e Senjirea tawe, abeka lichuune liewe sikila khukhwechuba nikhwo aaba ne echubile. 19Boola Efeso, Paulo alekhayo Pirisila ne Akwila, aacha mu sinakooki aayingana ne Bayaudi. 20Babaandu bamuboolela bali amenyekhoyo lukali, ne naye khufukiilila tawe. 21Ne nga ne aba narekukha, ababoolela ali, “Wele nasiima khakobole lundi koo.” Nio arura mu Efeso ne emeeli.
22Nga ne ola e Kaesarea, acha Yerusalemu akheesia ekanisa, mala acha e Andioka. 23Oli amalayo siise sitiiti siri, arurayo acha abirira mungoongo cha Kalatia ne Firikia, ne aatinyilisia basuubili boosi.
Apolo mu Efeso ne Korinjo
24Mu siise siene esio Omuyaudi mulala, lisina liewe bali Apolo, owasaalwa mu Alekisanduria, eecha Efeso. Aaba omulomalomi omulayi, lundi aaba owasoma lukali kamaandiko kamatakatifu. 25Aaba ekisibwa Engila eyo Mwami, ne silukuluku Apolo elwacha ne khukhwikisia bulayi kamakhuwa ka Yesu, ne kakhaba kario aba aamanya libatiisia lia Yoana liong'ene. 26Aarakikha khulomaloma mu sinakooki ne bunyindaafu. Ne Nga Pirisila ne Akwila bamuulila, bamubukula baacha naye engo mala bamwinioselia mu bwichufu Engila eya Wele. 27Siise esio Apolo akhalaka khucha e Akaya, nio basuubili ba baaba mu Efeso bamuramo kumwoyo lundi bamuyeeta khulwe khuandikila ebarwa basuubili ba baaba mu Akaya, bamwakaanile. Nga ne olayo, aaba owe buyeeti bukali khwaabo ba baaba ne basuubiile khubirira mu mwalaalo kwa Wele. 28Khulwe lilomaloma liewe lie kamaani, aaula Bayaudi mu maingano mu moni che babaandu nga ne aandalasia kamaandiko kamatakatifu ali Yesu niye Masiiya.
अहिले सेलेक्ट गरिएको:
Bikh. 18: LUBUKUSU
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Bible Society of Kenya, 2019
