Lk. 22

Ekwangwaani eye khukhwira Yesu

(Mat. 26.1-5; Mk. 14.1-2; Yn. 11.45-53)

1Siise sia Naikara elaangwa Pasaka, eye kumukaati kukhalimo limela, siaba siimbi. 2Ne basaayi bakhulu ne baandiki baba bariire babaandu, nio bakhaka mu bwikisi khunyoola engila, eye khukhwira Yesu.

Yuda afukiilila khuchaama Yesu

(Mat. 26.14-16; Mk. 14.10-11)

3Nio Sietani engila mu Yuda owalaangwa Isikarioti, owaba mulala khu barumwa ekhumi na babili. 4Khwako Yuda acha akachula ne basaayi bakhulu ne baliindi bakhulu nga nanyala achaama Yesu khu nibo. 5Basangaala, mala berusia khumuruunga chirupia. 6Nio Yuda afukiilisiana nabo mala arakikha khuyiima bubweyaangu bulayi bwe khuchaama Yesu khu nibo bamuambe babaandu bakali ne bakhaliio tawe.

Yesu arekekha khulia siakhulia sie Pasaka

(Mat. 26.17-25; Mk. 14.12-21; Yn. 13.21-30)

7Endaalo eye Kumukaati Kukhalimo limela ne khukhwira kamameeme ke siakhulia sie Pasaka nga yoola, 8Yesu aruma Petero, ne Yoana nabalakiilisia ali, “Cha mung'oone siakhulia sie Pasaka khulie.”

9Bamureeba bali, “Wenya khusing'oonele waena?”

10Abakobosia ali, “Ne mulikho mwingila mu lukoba mulakaanana omundu owe siseecha asutile esoongo eye kameechi. Muloondekho khukhwola munju nimwo alacha, 11mala mureebe omwene enju muli, Omwekisia areeba ali, ‘Lusiro siina nilwo ese ne babeeka base khulaliilamo siakhulia sie Pasaka?’ 12Alamwekesia lusiro luboofu mu korofa lulimo buli siindu, mu bwenomwo rekekha buli siindu.” 13Nio bacha mala banyoola buli siindu nga Yesu aba ne ababoolele, mala barekekha siakhulia sie Pasaka.

Lilikolooya lio Mwami

(Mat. 26.26-30; Mk. 14.22-26; 1 Bakor. 11.23-25)

14Nga esaa yoola, Yesu eekhala khu sialwa ne barumwa bewe. 15Nio ababoolela ali, “Nekoombile lukali khulia siakhulia sie Pasaka sino ne nanywe ne khaambwa tawe! 16Sikila muboolela enywe ndi, se ndilia lundi tawe khukhwola nga kaliba abuwaanga mu Bwami bwa Wele.”

17Yesu abukula sikoombe, ne nga amala khu khupa orio khu Wele aloma ali, “Bukula sino mala munywe. 18Sikila muboolela enywe ndi, khukhwama luno khuchiililila se ndanywa endali yino lundi tawe, khukhwola nga Bubwami bwa Wele buliicha.”

19Abukula kumukaati apa orio khu Wele akumesulamo mala abaelesia naloma ali, [“Kuno kuli kumubili kwase kuulikho kuaanwa khubeela enywe. Khola murio khulwe khu khukhebulila ese.” 20Mu ngila ne ng'ene, aabukula sikoombe enyuma we khukhwikolooya abaelesia aloma ali, “Sikoombe sino sili endakaano eya Wele embia eyichusiibwe ne kamafuki kase, kakachukhwa sikila enywe.]#22.20 Chibibilia chindala se chili ne kamakhuwa ka Yesu enyuma wa “kuno kuli kumubili kwase” mu 19 ne mu 20 tawe.

21“Ounjaama ali ano nase khu sialwa! 22Omwana wo Mundu alafwa nga Wele aabisia, ne kakhali omundu omuchaama ali ne silaamo!”

23Mala barakikha khureebana bali naanu olikho ocha khukhola kano.

Naanu omukali mu boosi

24 # Mat. 18.1; Mk. 9.34; Lk. 9.46 Kamayiingamo kaaba akari wabwe bali naanu oli omukhongo khu nibo boosi. 25#Mat. 20.25-27; Mk. 10.42-44 Ne kakhali Yesu ababoolela ali, “Babaami be babaandu Be Chikholo bekesia bunyali khu baandu babwe mala baruki belaanga babeene bali, ‘Basaale be babaandu.’ 26#Mat. 23.11; Mk. 9.35 Ne se kali kario khwinywe tawe, nakhali oli omukali lukali khwinywe khukhwola abe nga omwana khukhila boosi ne omwimeelesi khukhwola abe nga omukholi. 27#Yn. 13.12-15 Naanu oli omukali lukali, oyo owikhala a sialwa khulia namwe oyo oreera khu mesa? Se ali oyo owikhalanga a sialwa tawe ku? Ne kakhali Ese ndi akari wenywe nga omukholi.

28“Enywe mwachiililile khuba alala nase mu makhako kase, 29nga Paapa ne amba bunyali bwe khuruka, akhaba sesi ndamuelesia enywe bunyali obwo. 30#Mat. 19.28 Mulilia ne khunywa a sialwa siase mu Bwami bwase mala mwikhale khu ndebe mukhalakile chikholo ekhumi na chibili cha Isiraeli.

Yesu ang'oola ali Petero alamwekaana

(Mat. 26.31-35; Mk. 14.27-31; Yn. 13.36-38)

31“Simoni, Simoni! Rekeeresia, Sietani enyile akhubukule ewe akhuseese nga omulimi aseesanga engaanu. 32Ne kakhali nakhusabiile ewe Simoni ndi lisuubila liowo likhakwa tawe. Ne ungoboleele, khukhwola otinyilisie bawandaayo.”

33Petero amukobosia ali, “Omwami, ese nerekekha khubowa ne khukhwirwa alala ne nawe!”

34Ne Yesu amuboolela ali, “Ese khuboolela ewe Petero, ndi etaaywa ne khakholiokha siilo sia luno, olaba wanjikaanile khataru oli se umanyile tawe.”

Sibeeti, Elolooti ne Mbalu

35 # Mat. 10.9-10; Mk. 6.8-9; Lk. 9.3; 10.4 Nio Yesu areeba babeeka bewe ali, “Nga namuruma ne mukhali ne sibeeti, elolooti, namwe biraaro, mwataambakho sisiindu siosi siosi ku?” Bamukobosia bali, “Se khwataambakho siosi siosi tawe.”

36Yesu ababoolela ali, “Ne kakhali luno omundu yesi yesi oli ne sibeeti namwe elolooti khukhwola abukule; ne yesi yesi okhali ne mbalu tawe khukhwola akusie engubo yewe mala akule embalu. 37#Isa. 53.12 Sikila muboolela enywe ndi liiandiko lino khukhwola lichusibwe mwise, ‘Bamura alala ne babooni’; sikila kakaandikwa khwise kalechusibwa.”

38Babeeka bamuboolela bali, “Omwami, lola ano khuli ne chimbalu chibili.” Abakobosia ali, “Chanyalile.”

Yesu asabila khu sikulu sia Miseituni

(Mat. 26.36-46; Mk. 14.32-42)

39Yesu arura mu lukoba mala acha khu sikulu sia Miseituni nga buli lwoosi, babeeka boosi bacha naye. 40Nga boola khu sikulu, Yesu ababoolela ali, “Khemusabe mukhakhola murio mwakwa mwikhako tawe.”

41Nio abalekha esendakho sinao, mala asikama asaba ali, 42“Paapa, waaba ne wenya ndusieo sikoombe sie kumunyakhano sino. Ne kakhaba kario, likhaba lilienya liase busa tawe, ne kakhali lilienya liowo likholekhe.”

43[Malaika khukhwama mwikulu amubonekhela mala amutinyilisia. 44Asaba ne kamaani ne ali mu buchuuni bukali, lukesi lwewe lwaba nga kamafuki ne karoonya aasi.]#22.44 Chibibilia chindala se chili ne chinyilili chino tawe.

45Nga enyokha mwisaba akobola khu beeka bewe mala abanyoola balikho bakona sikila baba baluile ne khubeelela lukali. 46Ababoolela ali, “Siina sikila ne mukona? Khemwinyokhe musabe nio mukhakhola murio mwakwa mu makhako tawe.”

Yesu aambwa

(Mat. 26.47-56; Mk. 14.43-50; Yn. 18.3-11)

47Oli Yesu asiloma ario, sipupu siola siarangiriirwe no mundu olaangwa Yuda, mulala khu beeka ekhumi na babili, echa khu Yesu ne khumwekwayila. 48Yesu amuboolela ali, “Yuda, onyala wachaama Omwana wo Mundu khulwe khumwekwayila?”

49Nga babeeka ba baaba ne Yesu babona sicha khwekholekha bamuboolela bali, “Omwami, khurumikhire chimbalu chefwe?” 50Ne mulala khu nibo arema liiru lia nasioobi owo Omusaayi Omukhulu Lukali lie lubeka luseecha.

51Nio Yesu aloma ali, “Wanyala orio!” Nabukula liiru alikobosia khu murwe.

52Nio Yesu aboolela basaayi bakhulu ne baliindi be lukaangu ne babemeelesi ba baaba ne bechile khumuaamba ali, “Mwichile ne chimbalu ne chiruungu oli ese ndi omunuuli? 53#Lk. 19.47; 21.37 Nabelenge ne nanywe mu lukaangu buli endaalo mala se mwakhaka khu khumbamba tawe. Ne kakhali yino eli esaa yenywe ne bunyali bwe sisiilima.”

Petero ekaana Yesu

(Mat. 26.57-58,69-75; Mk. 14.53-54,66-72; Yn. 18.12-18,25-27)

54Nio baamba Yesu mala bamuila munju eyo Omusaayi Omukhulu Lukali. Petero aloondakho sinao. 55Oli babwana kumulilo akari we luuya lwe kumuse balikho boora, Petero yesi abekhalamo. 56Omukholi owe siikhasi nga amubona ekhaale asioso, amuungusa mala aloma ali, “Omundu yuno yesi abeele ne Yesu.”

57Petero ekaana ali, “Mukhasiwe, ese se mu manyile tawe!” 58Enyuma we siise sitiiti omundu okundi yesi aunguusa Petero mala aboola ali, “Ewe wesi oli mulala khwaabo.” Ne kakhali Petero amukobosia ali, “Munduwe, ese se ndi mulala khu nibo tawe!”

59Enyuma we saa ndala omundu okundi yesi akhayilila busa khuboola ali, “Ng'ali omundu yuno yesi abele ne Yesu sikila ali Omukalilaya!”

60Petero amukobosia ali, “Munduwe, olanialilisianga siina!”

Nio oli asikaana ario etaaywa yakholiokha. 61Omwami ekhebukha mala alola Petero, mala Petero aakhebulila elomo niyo Omwami aaba ne amubooleele ali, “Siilo sia luno etaaywa ne khaakholiokha tawe, olaba wanjekaanile khukhwola khataru.” 62Petero aarura enje aalila burafu po!

Yesu akholelwa siienyameno ne khu khupwa

(Mat. 26.67-68; Mk. 14.65)

63Babaandu ba baaba ne baliindile Yesu, bamukholela siienyameno ne khumuupa. 64Bamufuunikha chimoni ne khu mureeba bali, “Ng'oola! Naanu owama khu khuupa?” 65Mala bamuloma kamakhuwa kakaandi kamakali ke khumuseya.

Yesu ayiilwa ebweeni we kumuse

(Mat. 26.59-66; Mk. 14.55-64; Yn. 18.19-24)

66Nga endaalo yola, kumuse kwe babemeelesi, basaayi bakhulu, ne baandiki bebuusia alala, mala bareera Yesu ebweeni we kumuse. 67Bamureeba bali, “Khuboolele, ewe oli Kristo?”

Abakobosia ali, “Nakhamuboolela, se mulasuubila tawe, 68ne nakhamureeba lireeba se mulaangobosia tawe. 69Ne khukhwama luno khuchiliilila, Omwana wo Mundu alekhala kumukhono kumuseecha kwa Wele Owe Bunyali Bwoosi.”

70Nio boosi bamureeba bali, “Khwako ewe oli Omwana owa Wele?” Aabakobosia ali, “Enywe mwalomile murio.”

71Nabo baloma bali, “Buloli siina bubuundi nibo khwenya? Fwabeene khwauliile niko omwene aama khuloma.”

अहिले सेलेक्ट गरिएको:

Lk. 22: LUBUKUSU

हाइलाइट

शेयर गर्नुहोस्

कपी गर्नुहोस्