Ioane 4
4
1KE a wâ but Than a gʼ ame long hnen ta je Faresaio, ka habe, Iesu ame bi laten me bapataisoâ tavat ae se hia, ke wakhalet bi Ioane 2(ke so bi ame ca bapataisoi ödra ga Iesu, ke hnen laten), 3me e ame hna but Juda me he hmetu Galilaia ai. 4Ke hamen he ka he hanyâûâ Samaria. 5Me e ame o but hnyi ke taun hnyi Samaria, Sikara ien, e hakekeny ka hnyi utkânâ a ham Jekob ka nokon jia Josefa: 6eling an beli Jekob. Ke ame laba ju Iesu hon an anyin ae sënyin dut anyin he. Awa a siksiny eling. 7Me ame o but ke momo Samaria he ka se köiö: ke baingö Iesu kâu, ka habe, Habelik. 8Haba laten, me ödrin e he but ka hnyi taun he ka ûcû jeû. 9Ke haingen momo Samaria kâu, ka habe, Ieû gam, a u at Juda, kʼ u me sumatö köiö gak, kʼ iny momo Samaria bi nya? (Anyin ae ca iate at Juda me at Samaria.) 10Haba Iesu ame thu me ha ka momo, ka habe, A ne manen köu bwihlany anyin Khong, me at ame ha köu, Habelik; me u je he ka sumâtâ gan, me e ame he ka ham köu köien möt. 11Me haingen momo kâu, ka habe Than lö, e ba ûnyi gam hnân soû, ke dit an, ke ûnyi ua köien möt gam? 12Hawa, u gan hu Jekob hanen lakamöhmun, at a ham kohmun an ang, ke belen e, me lakon, me ta je haleny? 13Iesu ame thu me ha kâu, ka habe, Ame he ka beic hmetu tavat adre me ijem an ang: 14ke haba at ame he ka ijem an oge me he ka ham, me ame ca he hmetu bi ka beic nyiele balua; ke haba köiö oge me he ka ham kâu me ame he ka eû hnyi hnyekon wale an ame pupua ka hnyi möt ame ca ba balua. 15Haba momo ame ha kâu, ka habe, Than lö, ham but könya an e, mʼ inye ca beic hmetu, mʼ inye ca hmetu jem kââng he ka se köiö. 16Haingö Iesu kâu, ka habe, He thö ka hawâ jem âiâm. 17Haba momo ame thu, ka habe, E ba öiok Haba Iesu ame ha kâu, ka habe, E hnathu hnâm hna ha, ka habe, E ba âiâm: 18anyin a ödrin thabûng ehac lâiâm, ke haba at u me tha laba mē walang, me ca âiâm bi: waleling, e me hnathu hnâm hna ha. 19Haingen momo kâu, ka habe, Than lö, oge wâ but a u perofeta. 20Haba lakamöhmun adre me hmi hnyi bucen ang, ke öbun e ha, ka habe, E ûcû ka tavat he ka hmi hnyi Jerusalema. 21Iesu ame ha kâu, ka habe, Momo lö, labageju nya ju, a gʼ ame he ka o ûen öbun e ca he ka hmi ka Kamen hnyi bucen ang, ke ba minya bi hnyi Jerusalema. 22E ca khanʼ öbun hnobun hna hmi kâu; ke e khanʼ ohmun hnöhmun hna hmi kâu: anyin a ûnyi ge at Juda ûhomeli. 23Ke ame he ka o ûen, ke wale but ang, a gʼ ame he ka he tavat adre me hmi hnathu ka hmi ka Kamen hnyi hanu me hnathu: anyin a Kamen ame elâm tavat helâe he ka hmi kâu. 24Khong Hanu; ke hamen tavat adre me hmi kân he ka hmi hnyi hanu me hnathu. 25Haingen momo kâu, ka habe, E khanö nya a gʼ ame he ka o Mesia (adre hwenyi ien Keriso): ke hnyi ûen e ame o but, e ame he ka omanenâ köta ta je ûnyi hia. 26Iesu ame ha kâu, ka habe, Inya ang at ame ûhnenamö möu.
27Ke ame o but laten; ke ödrin e lâiâ anyin a e ame ûbnenamö me momo; ke so bi, e ba at ame ha, ka habe, Ieû u me elâm? ke, ieû e gam u me ûhnenamö me momo? 28Haba momo ame ip ju belen kaia me he ka hnyi taun, me ha ka tavat, ka habe, 29Ai öbun he ka hnyi wâ at ame hia but ha könya ta je ûnyi hia oge hia but ânyâ: hawa, ame ne e la Keriso? 30Me adre me he but ûhedra hnyi taun, me o kâu. 31Kʼ ödra tiga bec, me ame ûjengö e laten, ka habe, Kabi, ö u mē han dö. 32Ke haingen ködrin, ka habe, E hu ök ae ca khanʼ öbun. 33Anyin a wale, ame ûhnenamököuâ laten, ka habe, Ame ne hu at a hân? 34Haingö Iesu ködrin, ka habe, Walang ok, a oge me he ka mâdrâ weny at a kunö nya, me umo anyik huliwa. 35Hawa, ca hobun ang, ka habe, Vak biju ta tehi, me adre me menu? ke wâ bi, inya oge me ha köbun, ka habe, Bwele thʼ öbun, me wâ je hna belok a hmahmat ut ang he ka menu. 36Haba at ame hiny, me e ame kap hwaban, kʼ ame ûkhöûnâ troban hobi kâu möt ame ca ba; me me tha senyin at ame tā me at ame hiny. 37Waleling me me hnathu hna ha, ka habe, Ame tā hnen keʼat, kʼ ame hiny bi hnen ke at. 38Oge me kunʼ öbun he ka hiny hnobun hna ca huliwan: a hia but huliwa keihen, me öbun e didro ka hnyi anyidra ta je huliwa.
39Ke ame labageju kâu tavat Samaria ae se hia hnyi taun eling, can hofuc hwan momo, ka habe, E ame hia but ha könya ta je ûnyi hia thithö oge hia but ânyâ. 40Ke ame e but kâu tavat Samaria, me adre me sumâtâ e he ka tha laba mödra: me e ame laba eling lo li bong. 41Ke ame labageju tavat ae se hia hmonyin ûnyi ge hofuc a hwan; 42mʼ ödrin e ha bi ka momo, ka habe, Ohmun e ca hake labageju thibi ûnyi ge hwâm hofuc; anyin a ohmun e hnyi long ut me wâ a wale thibi e At omelö hmeledrany.
43Hwaban lo li bong e ame hna but dok e, kʼ ame he Galilaia ai. 44Anyin a Iesu ame ohnatho, a gʼ adre me ca ogânâ perofeta hnyi ka iny hnyei. 45E ame o hnyi Galilaia, me ame kap e ge at Galilaia, anyin adre me wâ ta je ûnyi e ame ânyâ hnyi Jerusalema hnyi bijeû: anyin adre me hnyi mwi minya hnyi bijeû.
46E ame o hmetu hnyi Kana hnyi Galilaia, waleji e ame wia hnyin köiö me me waina. Ke wale ke taben, kʼ ame mok nokon hnyi Kaperenauma. 47E ame long a gʼ ame o but Iesu hnyi Galilaia ûheny Juda, me e ame he but kâu, me sumâtâ e, me me he ka osoâ nokon; anyin ae hakekeny jut he ka mok. 48Haingö Iesu ame ha kâu, ka habe, Öbun e ne ca wâ ta je haten me ûöman, öbun e ca he bi ka labageju. 49Haingen taben kâu, ka habe, Than lö, he thö jem, e me tiga ca mok bi nokuk. 50Haba Iesu ame ha kâu, ka habe, He thö, a möt ut nokom. Haba at, me e ame labagejon hofuc a ha Iesu kâu, me e ame he. 51Ke e ame tiga he, me ame ûkhanö mē lathnyabainy me ödrin e ha kâu a gʼ ame mödrut nokon. 52Me e ame hnei ödrin ge ûen ioiny möt. Me ödrin e ha kâu, ka habe, a hna but e et hnen kahwa, hnyi awa a seveniny. 53Me ame wâhmakhmeto kamen ka habe, wale awa a ha hnyin kâu Iesu, ka habe, A mödrut nokom: me e ame labageju me anyin hia lap. 54Wale ûöman a loiny a ânyâ Iesu, waleji ge ibi ioiny hnyi Galilaia ûheny Juda.
अहिले सेलेक्ट गरिएको:
Ioane 4: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
