Ioane 2
2
1HABA hnyi bong a kuniny me adre me ânyâ faipoipo hnyi Kana hnyi Galilaia; eling hinyö Iesu: 2ke adre me hao Iesu me laten ka hnyi faipoipo. 3Ke a um dö waina, me haba hinyö Iesu ame ha kâu, ka habe, E ba but waina gadra. 4Haba Iesu ame ha kâu, ka habe, Bai lö, ieû gam könya? e tiga ca o ûök. 5Haba hinyen ame ha ka je lathnyaba, ka habe, Haba ûnyi e ame he ka ha köbun, ânyâ thö. 6Ke e hu eling je kaia veto a siks, adre me ip hnân okâlâotâ helâ me hwakecin at Juda, ûsa lo ame ne kun ta bath tulutiny. 7Haingö Iesu ködrin, ka habe, Öunöngötâ thö je kaia ge köiö. Me ödrin e öunöngötâ ke ne o but hnyi hnyimen. 8Haingen ame ha ködrin, ka habe, Sâû thö walang ang, me hom dö ka taben bijeû. Me ödrin e hom. 9Ke a hia but taben bijeû drem cubecâ köiö adre wia me me waina, ke ca khana bi dok a ûnyi hnyin (ke e khana bi lathnyaba tavat adre sâû) haba taben bijeû ame hawâ at a tep faipoipo, 10me ha kâu, ka habe, Hwakecin tavat he ka khenâ bânâ waina ae so; ke e ka hia but ijem gânâ, adre hom waina ae kong: ke haba u, u je tuö waina ae so ke ne o but ang. 11Wale ûöman a ânyâ Iesu a bân hnyi Kana hnyi Galilaia, me omanenâ anyin hmanenang; haba laten ödrin e labageju kâu.
12Hwaban e, e ame he Kaperenauma ai, e, me hinyen, me je liamekeiny mē, me je laten: ke ca se je bong adre me laba eling.
13E hakekeny jut paseka anyin at Juda, ke haba Iesu ame he Jerusalema ai. 14Me e ame wâ hnyin uma kap tavat adre me ûco je bolok, me mamoe, me biny, ke tavat adre me wia mone, adre me ûlalabainy: 15me e ame hom je ong to hnân osö, me obʼ ödrin hia ûnyi hnyin uma, me ta je mamoe, me bolok; me hingâlâ degecâ ta je mone anyin tavat adre me wia mone, me ohnyimenâ hnyikânâi ta je laulau; 16me e ame ha ka tavat ûco je biny, ka habe, Hom dö ta je ûnyi eang ûheny ang; ca wia bi uma umo Cica, me me uma ûcû. 17Haba laten adre me ûnykûme hna sihnalimen, ka habe, A hia but uto nya hnen weny ae gan hmâ ka umâm uma. 18Me ame thu at Juda me ha kâu, ka habe, Ieû haten u me he ka omanenâ kohmun, a u me ânyâ ta je ûnyi e? 19Iesu ame thu me ha ködrin, ka habe, Kia but uma eang, me oge me he ka otilâ hmetu e hnyi ta bong a kun. 20Me haba at Juda adre me ha, ka habe, Fâte siks je huna adre otilâ hnyin uma eang, ke u me he ka otilâ e hnyi ta bong a kun? 21Ke haba uma e ame ha, me, wale a unyin. 22Ke hnyi ûen ame möt hmetu thö e ûheny hnyi hna mok, me ame ûnykûme laten a gʼ ame ha helâe; ke ödrin e kap hna sihnalimen me hofuc a ha Iesu.
23Tiga e bi hnyi Jerusalema hnyi bijeûiny paseka, ödra se hia adre me labageju ka hnyi ien, anyin adre me wâ ta je ûöman e ame ânyâ. 24Ke haba Iesu ame ca ka hna e kodra, anyin a e ame wâhmakhmetoâ tavat hia, 25ke ca ûnyi hnathu kâu a gʼ ame he at ka omanenâ hwakecin at; anyin a e ame wâhmakhmetoâ ta je ûnyi eû hnyi hnyin at.
अहिले सेलेक्ट गरिएको:
Ioane 2: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
