Ioane 15
15
1INYA eang vine ae hnathu, ke Kamök at ame belökâ. 2E ame hom but ta je vheiny gak ame ca wa: ke haba ta je vheiny ae wa, e ame ânyâwia, me me wa gan dut. 3Öbun e kalaöt ut hnyi bong ang ge hofuc oge hia but ha köbun. 4Laba ju öbun eû hnyi hnyik, ke inya minya eû hnyi hnyibun. E ca khana vheiny he ka wa thibut, a ne ca tot hnyi vine; ke helâe e ca khanʼ öbun, öbun e ne ca laba eû hnyi hnyik. 5Inya ang vine, öbun ta je vheiny: Haba at ame he ka laba eû hnyi hnyik, inya minya eû hnyi hnyin, wale at ame wa gan dut: anyin ae ca khanʼ öbun ka ânyâ ke ûnyi öbun e ne ûsâkâûö mönya. 6A ne ca laba ke at eû hnyi hnyik, adre me he ka degec ut helâ me vheiny, me ame he ka meleca thö; ke adre me ûkhacaköuâ thö, me khûâ ka hnyi meic, me adre me thong degecâ but. 7Öbun e ne laba eû hnyi hnyik, ke hok ta je hofuc ame laba minya hnyi je hnyekubun, öbun e he ka sumâtâ ûnyi öbun e weny, me adre me he ka ânyâ hobi köbun. 8Hnân ogânö Cica, öbun ka he ka wa gan hmâ; ke helâe öbun e he ka bi latök. 9Inya oge me hnyok köbun helâ me Kamen ame hnyok könya: tet hmâ ju öbun hnyi anyik ibetengiö. 10Öbun e ne vheno anyik ta je hnanyibu, öbun e he ka tet hmâ hnyi anyik ibetengiö; helâ me inya oge me vheno hnanyibu anyi Cica me oge me tet hmâ hnyi anyin ibetengiö. 11Oge hia but ha köbun ta je ûnyi e, me me eû hnyi je hnyekubun anyik senyin, me me bekhöt dö anyibun senyin. 12Walang anyik hnanyibu, ka habe, Öbun e he ka ibetengiököu helâ me hnok hna betenge köbun. 13A ne he ke at ka ham anyin möt hobi kâu lahanen, e ba betenge ae beönua hon e. 14Öbun e ne he ka ânyâ ta je ûnyi oge hûna köbun, je lahanök öbun. 15Oge me ca ha hmetu, ka habe, lathnyaba; anyin ae ca khana athnyaba ûnyi a ânyâ tuhan: ke oge me hai öbun a lahanök; anyin a haba ta je ûnyi hia oge me löng ûnyi ga Cica, mʼ oge hia but omanenâ köbun. 16Öbun e ca ûco nya, ke oge me ûcʼ öbun, me otilʼ öbun, mʼ öbun e he ka he me wa, me tet hmâ ju wan gabun: me me he Kamen ka ham köbun ta je ûnyi hia öbun e he ka sumâtâ huyi iök. 17Oge me hûna köbun ta je ûnyi e, mʼ öbun e he ka ibetengiököu. 18A ne hûkötiʼ öbun hmeledrany, khanʼ öbun ju a ga bân ka hûkötiö nya. 19Öbun e ne je lahanen hmeledrany, ame he hmeledrany ka betenge ka lahanen: ke anyin a öbun ca lahanen hmeledrany, ke oge me ûcʼ öbun ûnyi eang hmeledrany, waleling me me hûkötiʼ öbun hmeledrany. 20Ûnykûme ju hofuc oge me ha köbun, ka habe, E ca gan athnyaba hon tuhan. Adre ne hia but oveci nya, adre me he bi ka oveci öbun; ke adre ne hia but vheno hok hofuc, adre me he bi ka vheno hobun hofuc. 21Ke adre me he ka ânyâ ta je ûnyi hia eling köbun can iök, anyin a ca khanʼ ödra at a kunö nya. 22Oge ne ca o ehac he ka thumetu ödra, ame ne ba anyidra monu: ke walang ang e ba ûnyi hnân haisoâ anyidra monu. 23Haba at ame hûkötiö nya, me e ame hûkötiö Cica minya. 24Oge ne ca mâdrâ unyidra ta je huliwa ae tiga ca mâdrâ ge at, ame ne ba anyidra monu: ke walang ang adre hia but wâ me hûkötiö Cica me inya minya. 25Waleling me me hwâdâ but hna sihnalimen hnyi anyidra hnanyibu, ka habe, Adre hia but hûkötiö nya ke ba can. 26Ke e ka o Ûhadruo wale oge me he ka kunâ köbun ûnyi ge Kamen, wale Hanon hnathu, at ame he but ûnyi ge Kamen, me e ame he ka ohnathu nya: 27ke öbun minya öbun e ohnatho, anyin a öbun e laba unyik ûnyi hnyi can.
अहिले सेलेक्ट गरिएको:
Ioane 15: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
