Ioane 12
12
1E tiga siks biju ta bong adre me he ka ânyâ paseka, me Iesu ame he Bethania ai, wale dok a laba hnyin Lazaro waleji a omelö ûheny hnyi hna mok. 2Me ödrin e bi sahac eling hobi kâu: ke haba Maretha ame bi aten; ke Lazaro ke at gadrin ame hnyi han mē. 3Maria ame hom litara tang muro ae hing narado ae gan hwaban, me hneû kâu li ca Iesu, me köt li can ge leûnen ban: ke unöngötö uma ge bunen muro. 4Me ame ha ke at unyin laten, jia Juda Isakariota, at ame he ka alecuâ e, 5ka habe, Ieû adre me ca ûco gan muro eang me hnân hwaban je denari a theri haded, mʼ adre me he ka ham ka ta je theduoc? 6Ame ca ha e anyin ame betenge ge ta je theduoc; ke anyin bi a e at venöu, ke e unyin tang, ke e ame hom ta je ûnyi hnyin tang. 7Iesu ame ha, ka habe, Ca hâiâ bi momo, e ame ip e hnân hobi kâu bong he ka konim nya hnyin. 8E bala unyibun ta je theduoc; ke oge me ca he bi nya ka laba bala unyibun. 9Me ame long houmonu a tavat Juda a e but ling: me adre me o thö ca hake ga Iesu thibi, ke adre me he minya ka ö Lazaro, waleji a omelö ûheny hnyi hna mok. 10Ke a ûhnenamö je taben tavat bihut he ka hlingö Lazaro minya; 11anyin ae se hia at Juda adre me he me labageju kö Iesu ûnyi gan.
12Haba nyi, e se hia tavat adre me he ka hnyi bijeû, ke adre me long a gʼ ame he ka o Iesu hnyi Jerusalema, 13me adre me bi lan pama me he ka ûkhanö mē, me hongot, ka habe, Hosana: hnahic hnen Than Isaraela, ame o but hnyi ien Than. 14Ke a wâ but Iesu ke asina ae tiga ûhnyûkong, me e ame tabâ e, helâ me hna sihnalimen, ka habe, 15U ca he ka ot, hlu nöku Ziona; wâ bi ame o but Tuhâm, ame tabâ nokon asina. 16Ame ca wâhmakhmetoâ laten ta je hofuc eling ûnyi hnyi can: ke adre hia but oganö Iesu, me ödrin e ûnykûme a gʼ adre hia but sihnalimen ta je ûnyi e gan, ke adre me ânyâ ta je ûnyi e kâu. 17Me ame ohnathoâ hnen tavat ae se hia a tha ödra mē waleji hnyi hnen hna hawo Lazaro ûnyi hnyi hnyin erkemok, me omelö e ûnyi hnyi hna mok. 18Wale minya me me ûkhanö mē tavat ae se hia, anyin adre long ut hnen hna mâdrâ ûöman eling. 19Anyin a wale haba ta je Faresaio adre me ûhnenamököuâ, ka habe, Wâ bi, a gʼ ame ca tubun: wâ bi, ame he hoton hmeledrany hia.
20Wale keihen ta je Heleni unyin tavat adre me he he ka hnyi hmi minya hnyi bijeû: 21me adre me he but kö Filipo at Bethesaida hnyi Galilaia, me hnö e, ka habe, Taböny, ohmun be hnyi ō Iesu. 22Filipo ame he me ha kö Anederea: haba Anederea me Filipo ödru me he me ha kö Iesu. 23Ke haba Iesu ame thu ködrin, ka habe, A o but awa he ka ogânâ Nokon at. 24E hnathu, e hnathu, inya oge me ha köbun, A ne kolu ka hnyi kânâ ke wan hwit, ke ame ca bobot bi, ame he ka hake mokut; ke a ne bobot, ame he ka wa se hia. 25Haba at ame hnyokâ anyin möt, me ame he ka ohia e; ke haba at ame hûkötiâ anyin möt eang hmeledrany, e ame he ka tuö e ke ne o but ka hnyi möt ame ca ba balua. 26A ne ke at ame he ka bi atök, e so e ame he hotuk; ke haba dok o ge me he ka laba hnyin, me ame he minya atök ka laba eling: a ne he ke at ka bi atök ame he Cica ka ogânâ e. 27E hlohlo hnyekuk walang ang; ke ieû oge me he ka ha? Cica lö, bethe omeli nya hnyi ûen ang. Ke so bi can e oge me o but ka hnyi ûen ang. 28Cica lö, ogânâ thö iâm. Me ame o but hofuc ûnyi hnyi drany, ka habe Oge hia but ogânâ, ke oge me he hmetu ka ogânâ. 29Haba tavat adre me ûtitilen eling adre me long me ha, ka habe, Hendreng ang: haingen keihen, ka habe, Angela ame fuc kâu. 30Iesu ame thu, ka habe, A ca o hofuc e hnân hobi könya, ke so bi hnân hobi köbun. 31Adre me he walang ang ka owisa hmeledrany: ke adre me he walang ang ka obâ tuhan hmeledrany ang. 32Ke haba inya, adre ne ogoranyi nya ûnyi eang hmeledrany, me oge me he bi nya ka lelo tavat hia thithö könya. 33E ame ha e, kʼ ame omanenâ bongon mok e ame he ka mekiny. 34Haba tavat ae se hia adre me thu kâu, ka habe, Ohmun e long ut ûnyi hnyi hnanyibu a gʼ ame he ka tethmâ Keriso nyiele balua: ieû gam u me ha a ga ûcû he ka ogöranyâ Nokon at? ia Nokon at eling? 35Haba Iesu ame ha kodra, ka habe, E okhulit biju melam unyibun. He thö e me tiga e unyibun melam, wâ e nye o but köbun lit: haba at ame he hnyi lit, me ca khana dok e ame he ka hnyin. 36Kap ju melam e me tiga e unyibun melam, mʼ öbun e lakon melam bi.
Iesu ame ha hofuc e, me ame he but, kʼ ame labö duöng gadra. 37Ke so bi, eja ke ne a ne ânyâ ta je ûöman ae se hia hnyi hnyimakodra, adre me ca labageju kâu: 38me me hwâdâ hofuc ho Isaia perofeta waleji e ame ha, ka habe,
Than lö, ia ame labageju ka hnöhmun hna thumeto?
Kʼ adre me omanenâ kö ia benyin Than?
39Anyin a wale e ca khanʼ ödra he ka labageju, anyin a haingö Isaia minya, ka habe,
40E ame owadruâ ta je emaködra, ke e ame okhötâ je hnyekudra;
Wâ adre nye wâ ge je emaködra, me ûnykûme ge je hnyekudra,
Wâ adre nye hmetu,
Mʼ iny omeli ödra but.
41Haba Isaia ame ha ta je ûnyi e, anyin a e ame wâ anyin hmanenang; kʼ ame hâiâ e. 42Ke so bi e se hia ta je taben adre me labageju kâu; kʼ adre me ca ha manenâ bi, can ta je Faresaio, wâ adre nye obʼ ödra but ûnyi hnyi sunago: 43anyin ae nua wedra a gʼ ame he ka ogânʼ ödra hnen tavat, hon wedra a gʼ ame he ka ogânʼ ödra hnen Khong.
44Ame ha hwegiâ Iesu, ka habe, Haba at ame labageju könya, me ame ca labageju bi könya, ke kâu minya bi at a kunö nya. 45Ke haba at ame ō nya; me ame wâ minya at a kunö nya. 46Inya oge me o mʼ inya melaminy hmeledrany, me me ca laba hnyi lit at ame labageju könya. 47Ke a ne long hok hofuc hnen ke at, kʼ ame ca vheno bi, oge me ca he bi nya ka owisa e, anyin oge me ca o he ka owisa hmeledrany, ke so bi he ka omelö hmeledrany. 48Haba at ame digic nya, kʼ ame ca kap bi hok hofuc, me hu bi at ame owisa kâu: haba hofuc, waleji oge me ha, me wale at ame he ka owisa kâu hnyi bong a obiny. 49Anyin a inya oge me ca fuc a ka ûnyi gak; ke haba Kamen, wale at a kunö nya, me e ame hna könya hnanyibu a hanymök he ka ha, me ûnyi minya oge me he ka ûnö. 50Ke e khanö nya a haba anyin hnanyibu, me möt ame ca ba balua: me haba ta je hofuc oge me ha, me helâ me hnen Kamen hna ha könya, me wale hnok hna ha.
अहिले सेलेक्ट गरिएको:
Ioane 12: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
