Ta je huliwa 8
8
1KE Saulo minya ame ogâ anyin mok.
Ke haba hnyi bong eling ame kû gan hmâ but hna ovecâ ekalesia hnyi Jerusalema; ke adre me vese hia but ka hnyi ta je ke keihen hnyei Juda me Samaria, ke hake je aposetolo thiju. 2Ke haba tavat adre me outen Khong adre me konim Setefano, me tenge thungaû gan hmâ gan. 3Ke haba Saulo, e ame vekia okongoâ ekalesia, me dit ka hnyi ta je uma, me lelo but obaga me omomo, me ip ödra hnyi uma ceat.
4Anyin a wale haba tavat adre me oveseâ adre me he but ka hnyi je dok me khetâ hofuc. 5Me ame he but Filipo ka hnyi taun ien Samaria me khetâ Keriso kodra. 6Haba tavat adre me tha kap ta je hofuc ame ha Filipo, adre me long me wâ ta je haten e ame ânyâ. 7Anyin a ta je hanu ae kong adre me didrut ge tavat ae se hia ae hu gadra, adre me fuc hwege goranyai; ke se hia tavat ae mat, me tavat ae kong je cadra, adre so but. 8Ke e gan hmâ senyin hnyi taun eling.
9Ke wale ke at Simona ien, at bihihwakecin e hac hnyi taun eling, me me lâiâ gan at Samaria, haingen, e thibi at ae gan: 10ke ame kap e hnen tavat hia, hwân ge tavat ae ûhnyûkong ke ne o but ge tavat ae gan, haingödra, ka habe, Haba at ang me, man maniny Khong adre wenyö Gan Hmâ. 11Ke adre me kap e anyin ae beû hnen hna olaiʼ ödra ge anyin bihihwakecin. 12Ke adre hia but köp Filipo at khetâ ûthumetu ae so anyin dokhu dokhon Khong, me iö Iesu Keriso, me e ame bapataisoi ödra obaga me omomo. 13Ke haba Simona ame hnyi kap, kʼ adre hia but bapataisoâ, kʼ ame tha e bala me Filipo; ke e ame wâ je haten me je ûöman ae gan hmâ adre me ânyâ, me e ame lâiâ.
14A long ut ta je aposetolo hnyi Jerusalema a gʼ adre me kap soâ hofuc hwan Khong hnen at Samaria, me ödrin e kunö Peteru me Ioane kodra: 15ke ödru me he but me hic hobi kodra, me me hu gadra Hanu Kap: 16anyin ae tiga ca o kodra: ke adre hia but bapataisoi ödra thibi ka hnyi ien Than Iesu. 17Ke ödru me ip li hnyamödru hudrin, me ame o thö ködra Hanu Kap. 18Ke a wâ but Simona a gʼ adre me ham Hanu Kap ûnyi ge hna ip hnyamen li aposetolo, me e ame inâ ködru mone, 19me ha, ka habe, Ham but könya man e, me me he at oge me ip li hnyamok hon ka hu Hanu Kap. 20Me baba Peteru ame ha kâu, ka habe, A hnaûhango but ânyâm mone möu, anyin a u je ûnykûme he ka ûcû moniny ûnyi a ham bâûâ hnen Khong. 21Haba u, me ba gam ke ûnyi me hanymâm hnyi ûnyi eang: anyin ae ca wisa hnyekom hnyi hnyimakan Khong. 22Anyin a wale ietra ju ânyâm monu eang, me hic ka Than, ame ne he bi ka thang ut köu ûnykûmenen hnyekom. 23Anyin a oge me wâhmakhmeto a u bala but hnyin waada ae hiny, ke u hwenbâ hnyi hulo. 24Haba Simona ame thu, ka habe, Hic dʼöbu ka Than hobi könya, me me ba ûnyi ame he ka o könya hnyi ta je ûnyi öbe ha.
25Ke ödre hia but thumetoâ me ha hofuc hwan Than, me ödru me hmetu but Jerusalema ai, me khetâ ûthumetu ae so hnyi je taun ae se hia hnyi Samaria.
26Haba angela anyin Than ame ha kö Filipo, ka habe, Todrö, he thö ka hnyi hwaiöu, ka hnyi gethen ûheny Jerusalema Gaza ai: wale hnyebuba. 27Me e ame todrö me he: ke wâ bi ke at Aithiope, wale eunuka ae nua hanymen unyi Kanadaki, momo than Aithiope, kʼ ame tuö tang omjehen momo eling hia, kʼ ame o thö Jerusalema ai he ka hnyi hmi; 28ke e ame he hmetu ka hnyi hwaiöu, kʼ ame laba hon anyin kariota, me aû perofeta Isaia. 29Ke haba Hanu ame ha kö Filipo, ka habe, He hakekenyâ thö me tha he me kariota eling. 30Haba Filipo ame wadring kâu, me long hnen hna aû perofeta Isaia, me e ame ha, ka habe, U me ka ûnykûme e hnâm hna aû? 31Haingen, ka habe, Ame he ka kâmâu ka khanö nya, ke ba bi at ame owisa könya? Me e ame sumatö Filipo he ka ölö, me tha laba mē. 32Walang hna sihnalimen e ame aû, ka habe,
Adre me lelo e helâ me mamoe he ka hlingâ;
Ke helâ me nokon mamoe hnyi hnyimakan at ame sö leûnen, ame tet hnyibû,
Helâ minya e, ame ca khong hnyimen:
33Hnyi ûen hna oûhnyûkongoâ e adre hom gan anyin hna owisa:
Ke ie at ame he ka omanenâ anyin dö?
Anyin adre hom anyin möt ûheny ang hmeledrany.
34Haba eunuka ame thu kö Filipo, ka habe, Inya oge me hnei u, ia ame ha perofeta eang? hawa ka e bi, ame ne ke at bi? 35Haba Filepo ame fuc kâu, me omanenâ kâu Iesu, hwân hnyi hna sihnalimen eling. 36Ödru me tiga he eû hnyi gethen, me ödru me o but ka hnyi ke an; me ame ha eunuka ka habe, Walejo an; hawa, e kong he ka bapataisoi nya? 38Me e ame ha me me todru kariota: me ödru me tha utut ka hnyi an, wale Filipo me eunuka; me e ame bapataisoâ e. 39Ke ödru me ölö thö ûhedru hnyi an, haba Hanon Than ame hûgûnö Filipo but; ke ame ca wâ hmetu e hnen eunuka, anyin a e ame he senyinâ hnyi deny gethen. 40Ke adre ô Filipo hnyi Azota: ke e ame khetâ tilâ ûthumetu ae so hnyi ta je taun hia ke ne o but e ame o hnyi Kaisaria.
अहिले सेलेक्ट गरिएको:
Ta je huliwa 8: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
