Genesis 6
6
5... Akngeyel arek, apmwangkwarr ahern-areny ingkerrenh anenh. Rernem apmwangkwarrant iterrenh. 6-7Ra iterrek renh-rnem ingkerrenh ywerrelhilemel atwetyek, atnwenth-rnem-then, thip-rnem-then, ahernel alheyel-rnem-then. Artwa apmwangkwarrarl aneyel-rnem-then ingkerrenh ywerrelhiletyek. “Atha renh-rnem mpwarey-angenh, atyeng awelhey-angenh-rneman. Ra iterrenh, apmwel renh-rnem mpwarekerr.” 8Akngey inkwerelhek artwa Noah ikwer, rarl ikwer inkwerelhemel awelhek rarl renh ilekek.
9-10Noah ra anyentant mwerran Akngey ikwer awelhek. Alerikw irrpety ikwerenh-rnem itnan ikwer-rnem-kenh Shem, Ham, Japheth.
11-12Akngeyel ingkerrenh iterl-arek, rernemarl apmwangkwarr anenh. 13Akngeyel Noah renh ilek, “Ahern nhel artwa ingkerrenh ahelant atwerreyel, mwerr aney-angenh. Atha ahern-areny ingkerrenh irrarlkeyenh ahern nhek. 14Arwerl mwerr-angker arterna, ntwa rtnwa arnwarnetyek warl-akert. Warl arnwarnetyek amentew-ament rwem-akert. Ankerel aperna kwen-then akwerr-ampeny-then. 15Arlpenty innga mpwara 130 metres-ek-atwety. Arlpaw innga mpwara, 25 metres-ek-atwety. Irrwerl innga mpwara, 15 metres-ek-atwety. 16Arwerl ilperr-ilperr-rnemarl irrwerlengan arrerna! Anker-anem aperneyna kwaty aylpekerran. Altywerarl ntwa arrernetyek arriwan ampepekan. Iwerr ingwer-ampenyek arrerna aylpenhey-alhayntetyek. Rwem irrpety irrwerl-akert mpwara!
17Atharl kwaty ilkwa tyarlewem-kety, ahern-areny ingkerrenh irrarlketyek. 18Atha ngenh innga ileyel, nga, anew ngwenh, alerengkw ngkwenh-rnem, ampengkw-rnem-then arrantherr rtnwa ilenhel arrantherr iteth anetyek, kwaty-kety. Ingkerrenh aker-rnem tywena, atnwenth-rnem-then, thip-rnem-then, ahernel alheyel-rnem-then. 19-20Atnwenth amarl-rnem-then irrwey-rnem-then anewart-anewart akngakeyna, rtnwewarl tywenemel. 21Amern akngerr-antey arrerna ikwer-rnem ngkweng-then. Ayeng ilkelheyel rernem iteth intem-antey anetyek.”
22Noah Akngeyek awelhek, rarl renh ilanthek.
अहिले सेलेक्ट गरिएको:
Genesis 6: aly
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Wycliffe Bible Translators, Inc. All rights reserved.